ਟਰੰਪ ਸਮਰਥਕਾਂ ਵਿੱਚ ਵਧੀ ਨਾਰਾਜ਼ਗੀ

ਸਰੀ, (ਏਕਜੋਤ ਸਿੰਘ): ਅਮਰੀਕਾ ਦੇ ਰਾਸ਼ਟਰਪਤੀ ਡੋਨਾਲਡ ਟਰੰਪ ਦੇ ਸਭ ਤੋਂ ਮਜ਼ਬੂਤ ਵੋਟਰਾਂ ਵਜੋਂ ਜਾਣੇ ਜਾਂਦੇ ਈਸਾਈ ਸੱਜੇ-ਪੱਖੀ ਸਮਰਥਕਾਂ ਅਤੇ ਆਮ ਵੋਟਰਾਂ ਵਿੱਚ ਹੁਣ ਨਿਰਾਸ਼ਾ ਦੀ ਲਹਿਰ ਦੇਖਣ ਨੂੰ ਮਿਲ ਰਹੀ ਹੈ। ਟਰੰਪ ਦੇ ਲਗਾਤਾਰ ਬਦਲ ਰਹੇ ਵਿਵਹਾਰ ਅਤੇ ਵਿਵਾਦਪੂਰਨ ਫੈਸਲਿਆਂ ਨੇ ਉਹਨਾਂ ਦੇ ਵਫ਼ਾਦਾਰ ਸਮਰਥਕਾਂ ਨੂੰ ਇੱਕ ਨਵੀਂ ਦੁਬਿੱਧਾ ਵਿੱਚ ਪਾ ਦਿੱਤਾ ਹੈ। ਹਾਲ ਹੀ ਦੇ ਦਿਨਾਂ ਵਿੱਚ ਰਾਸ਼ਟਰਪਤੀ ਦੇ ਅਨਿਸ਼ਚਿਤ ਰਵੱਈਏ, ਧਾਰਮਿਕ ਹਸਤੀਆਂ ਨਾਲ ਟਕਰਾਅ ਅਤੇ ਆਰਥਿਕ ਫੈਸਲਿਆਂ ‘ਤੇ ਨਾਕਾਮੀ ਨੇ ਉਹਨਾਂ ਦੇ ਸਿਆਸੀ ਭਵਿੱਖ ‘ਤੇ ਸਵਾਲੀਆ ਚਿੰਨ੍ਹ ਲਗਾ ਦਿੱਤੇ ਹਨ। ਖਾਸ ਤੌਰ ‘ਤੇ ਈਸਾਈ ਵੋਟਰਾਂ ਵਿੱਚ ਉਹਨਾਂ ਪ੍ਰਤੀ ਨਾਰਾਜ਼ਗੀ ਵਧਦੀ ਜਾ ਰਹੀ ਹੈ, ਜੋ ਪਹਿਲਾਂ ਉਹਨਾਂ ਦੀ ਹਰ ਗਲਤੀ ਨੂੰ ਨਜ਼ਰਅੰਦਾਜ਼ ਕਰ ਦਿੰਦੇ ਸਨ, ਪਰ ਹੁਣ ਰਾਸ਼ਟਰਪਤੀ ਦਾ ਰਵੱਈਆ ਉਹਨਾਂ ਦੇ ਸਬਰ ਦੀ ਸੀਮਾ ਤੋਂ ਬਾਹਰ ਹੁੰਦਾ ਜਾ ਰਿਹਾ ਹੈ।
ਟਰੰਪ ਦੀਆਂ ਈਸਾਈ ਧਰਮ ਦੇ ਮੁੱਖ ਆਗੂ ਪੌਪ ਵਿਰੁੱਧ ਤਾਜ਼ਾ ਟਿੱਪਣੀਆਂ ਗਤੀਵਿਧੀਆਂ ਨੇ ਕਈ ਵੱਡੇ ਵਿਵਾਦਾਂ ਨੂੰ ਜਨਮ ਦਿੱਤਾ ਹੈ। ਰਾਸ਼ਟਰਪਤੀ ਨੇ ਵਿਦੇਸ਼ੀ ਮੁਹਿੰਮਾਂ ਲਈ ਰੱਬ ਦੇ ਸਮਰਥਨ ਦਾ ਦਾਅਵਾ ਕੀਤਾ ਹੈ ਅਤੇ ਦੁਨੀਆ ਦੀ ਇੱਕ ਸਭ ਤੋਂ ਪੁਰਾਣੀ ਸਭਿਅਤਾ ਨੂੰ ਤਬਾਹ ਕਰਨ ਦੀ ਧਮਕੀ ਦਿੱਤੀ ਹੈ। ਈਸਟਰ ਸੰਡੇ ਦੇ ਮੌਕੇ ‘ਤੇ ਉਹਨਾਂ ਦੁਆਰਾ ਲਿਖਿਆ ਗਿਆ ਇੱਕ ਲੇਖ, ਜਿਸ ਵਿੱਚ ਅਪਸ਼ਬਦਾਂ ਅਤੇ ‘ਪ੍ਰੇਜ਼ ਬੀ ਟੂ ਅੱਲ੍ਹਾ’ ਵਰਗੇ ਸ਼ਬਦਾਂ ਦੀ ਵਰਤੋਂ ਕੀਤੀ ਗਈ ਸੀ, ਨੇ ਉਹਨਾਂ ਦੇ ਕੱਟੜ ਈਸਾਈ ਸਮਰਥਕਾਂ ਨੂੰ ਹੈਰਾਨ ਕਰ ਦਿੱਤਾ ਹੈ। ਇਸ ਤੋਂ ਇਲਾਵਾ, ਇੱਕ ਪ੍ਰਸਿੱਧ ਅਮਰੀਕੀ ਮੂਲ ਦੇ ਪੋਪ ਨਾਲ ਉਹਨਾਂ ਦਾ ਟਕਰਾਅ ਅਤੇ ਸੋਸ਼ਲ ਮੀਡੀਆ ‘ਤੇ ਆਪਣੀ ਤੁਲਨਾ ਯਿਸੂ ਮਸੀਹ ਨਾਲ ਕਰਨ ਵਾਲੀ ਤਸਵੀਰ ਸਾਂਝੀ ਕਰਨ ਨੇ ਧਾਰਮਿਕ ਭਾਈਚਾਰੇ ਵਿੱਚ ਭਾਰੀ ਗੁੱਸਾ ਪੈਦਾ ਕਰ ਦਿੱਤਾ ਹੈ। ਕਈ ਧਾਰਮਿਕ ਆਗੂ ਹੁਣ ਟਰੰਪ ਦੀ ਖੁੱਲ੍ਹ ਕੇ ਆਲੋਚਨਾ ਕਰ ਰਹੇ ਹਨ, ਜਿਨ੍ਹਾਂ ਦਾ ਮੰਨਣਾ ਹੈ ਕਿ ਰਾਸ਼ਟਰਪਤੀ ਨੇ ਆਪਣੀਆਂ ਹੱਦਾਂ ਪਾਰ ਕਰ ਦਿੱਤੀਆਂ ਹਨ।
ਸਿਰਫ਼ ਧਾਰਮਿਕ ਹੀ ਨਹੀਂ, ਸਗੋਂ ਆਰਥਿਕ ਪੱਧਰ ‘ਤੇ ਵੀ ਟਰੰਪ ਨੂੰ ਆਪਣੇ ਹੀ ਪੁਰਾਣੇ ਸਮਰਥਕਾਂ ਦੇ ਵਿਰੋਧ ਦਾ ਸਾਹਮਣਾ ਕਰਨਾ ਪੈ ਰਿਹਾ ਹੈ। ਅਮਰੀਕਾ ਦੇ ਛੋਟੇ ਕਾਰੋਬਾਰੀ ਟਰੰਪ ਦੀਆਂ ਨੀਤੀਆਂ ਤੋਂ ਬਹੁਤ ਦੁੱਖੀ ਹਨ ਉਨ੍ਹਾਂ ਅਨੁਸਾਰ, ਵਧਦੀਆਂ ਕੀਮਤਾਂ ਕਾਰਨ ਵਪਾਰ ਕਰਨਾ ਮੁਸ਼ਕਲ ਹੋ ਗਿਆ ਹੈ ਅਤੇ ਅਰੀਜ਼ੋਨਾ ਵਿੱਚ ਡੀਜ਼ਲ ਦੀ ਕੀਮਤ 6 ਡਾਲਰ ਪ੍ਰਤੀ ਗੈਲਨ ਤੱਕ ਪਹੁੰਚ ਗਈ ਹੈ। 2024 ਵਿੱਚ ਟਰੰਪ ਨੂੰ ਵੋਟ ਪਾਉਣ ਵਾਲੇ ਕਾਰੋਬਾਰੀਆਂ ਦਾ ਕਹਿਣਾ ਹੈ ਕਿ ਰਾਸ਼ਟਰਪਤੀ ਅਰਥਵਿਵਸਥਾ ਬਾਰੇ ਝੂਠ ਬੋਲ ਰਹੇ ਹਨ, ਜਦਕਿ ਜ਼ਮੀਨੀ ਪੱਧਰ ‘ਤੇ ਹਰ ਕੋਈ ਆਰਥਿਕ ਤੰਗੀ ਦਾ ਸਾਹਮਣਾ ਕਰ ਰਿਹਾ ਹੈ। ਟਰੰਪ ਨੇ ਜੰਗਾਂ ਨੂੰ ਰੋਕਣ ਦਾ ਵਾਅਦਾ ਕੀਤਾ ਸੀ, ਪਰ ਇਰਾਨ ਨਾਲ ਜੰਗ ਸ਼ੁਰੂ ਕਰਕੇ ਉਹਨਾਂ ਨੇ ਆਪਣੇ ਵਾਅਦੇ ਤੋਂ ਉਲਟ ਕੰਮ ਕੀਤਾ ਹੈ, ਜਿਸ ਕਾਰਨ ਰਿਪਬਲੀਕਨ ਪਾਰਟੀ ਦੇ ਵੋਟਰ ਹੁਣ ਖੁਦ ਨੂੰ ਠੱਗਿਆ ਹੋਇਆ ਮਹਿਸੂਸ ਕਰ ਰਹੇ ਹਨ।
ਵੱਡੀ ਗਿਣਤੀ ਵਿੱਚ ਸਮਰਥਕ ਹੁਣ ਰਾਸ਼ਟਰਪਤੀ ਦੇ ਵਿਰੁੱਧ ਹੁੰਦੇ ਦਿਖਾਈ ਦੇ ਰਹੇ ਹਨ। ਲਿਬਰਟੇਰੀਅਨ ਵਿਚਾਰਧਾਰਾ ਵਾਲੇ ਲੋਕ ਅਤੇ ਸੋਸ਼ਲ ਮੀਡੀਆ ਦੇ ਪ੍ਰਭਾਵਸ਼ਾਲੀ ਸਮੂਹ ਵੀ ਐਪਸਟਾਈਨ ਫਾਈਲਾਂ, ਇਮੀਗ੍ਰੇਸ਼ਨ ਅਤੇ ਇਰਾਨ ਦੇ ਮੁੱਦਿਆਂ ‘ਤੇ ਟਰੰਪ ਦੇ ਕੰਮਾਂ ਤੋਂ ਹੈਰਾਨ ਅਤੇ ਪ੍ਰੇਸ਼ਾਨ ਹਨ। ਇਸ ਦਾ ਸਿੱਧਾ ਅਸਰ ਆਉਣ ਵਾਲੀਆਂ ਮੱਧਕਾਲੀ ਚੋਣਾਂ ‘ਤੇ ਪੈਣ ਦੀ ਸੰਭਾਵਨਾ ਹੈ। ਕਈ ਰਿਪਬਲਿਕਨ ਆਗੂ ਹੁਣ ਇਹ ਚਾਹੁੰਦੇ ਹਨ ਕਿ ਟਰੰਪ ਉਹਨਾਂ ਦੀ ਚੋਣ ਮੁਹਿੰਮ ਵਿੱਚ ਬਹੁਤ ਜ਼ਿਆਦਾ ਸਰਗਰਮ ਨਾ ਹੋਣ, ਕਿਉਂਕਿ ਉਹਨਾਂ ਦੇ ਵਿਵਾਦਪੂਰਨ ਅਕਸ ਕਾਰਨ ਵੋਟਾਂ ਦਾ ਨੁਕਸਾਨ ਹੋ ਸਕਦਾ ਹੈ। ਰਿਪਬਲੀਕਨ ਪਾਰਟੀ ਨੂੰ ਛੋਟੇ ਚੰਦੇ ਦੇਣ ਵਾਲੇ ਲੋਕਾਂ ਦੀ ਗਿਣਤੀ ਵਿੱਚ ਵੀ ਵੱਡੀ ਗਿਰਾਵਟ ਦਰਜ ਕੀਤੀ ਗਈ ਹੈ।
ਅਮਰੀਕੀ ਸਿਆਸਤ ਵਿੱਚ ਇਸ ਸਮੇਂ ਟਰੰਪ ਲਈ ਚੁਣੌਤੀਆਂ ਲਗਾਤਾਰ ਵਧ ਰਹੀਆਂ ਹਨ। ਇੱਕ ਪਾਸੇ ਜਿੱਥੇ ਉਹਨਾਂ ਦੇ ਧਾਰਮਿਕ ਆਧਾਰ ਨੂੰ ਠੇਸ ਪਹੁੰਚੀ ਹੈ, ਉੱਥੇ ਹੀ ਦੂਜੇ ਪਾਸੇ ਆਰਥਿਕ ਮੋਰਚੇ ‘ਤੇ ਨਾਰਾਜ਼ ਵੋਟਰ ਉਹਨਾਂ ਤੋਂ ਦੂਰ ਹੋ ਰਹੇ ਹਨ। ਜੇਕਰ ਇਹ ਰੁਝਾਨ ਜਾਰੀ ਰਿਹਾ, ਤਾਂ ਰਿਪਬਲਿਕਨ ਪਾਰਟੀ ਲਈ ਆਉਣ ਵਾਲੀਆਂ ਚੋਣਾਂ ਵਿੱਚ ਆਪਣੀ ਪਕੜ ਬਣਾਈ ਰੱਖਣਾ ਮੁਸ਼ਕਲ ਹੋਵੇਗਾ। ਰਾਸ਼ਟਰਪਤੀ ਦੇ ਆਪਣੇ ਹੀ ਸਮਰਥਕ ਹੁਣ ਉਹਨਾਂ ਦੇ ਬਿਆਨਾਂ ਨੂੰ ਸੱਚਾਈ ਤੋਂ ਦੂਰ ਮੰਨਣ ਲੱਗੇ ਹਨ, ਜਿਸ ਦਾ ਅੰਦਾਜ਼ਾ ਇਸ ਗੱਲ ਤੋਂ ਲਗਾਇਆ ਜਾ ਸਕਦਾ ਹੈ ਕਿ ਲੋਕ ਹੁਣ ਉਹਨਾਂ ਦੀਆਂ ਗੱਲਾਂ ਨੂੰ ਮਹਿਜ਼ ‘ਕਹਾਣੀਆਂ ਅਤੇ ਝੂਠ’ ਕਹਿ ਕੇ ਨਕਾਰ ਰਹੇ ਹਨ। ਆਉਣ ਵਾਲੇ ਮਹੀਨੇ ਇਹ ਸਪੱਸ਼ਟ ਕਰਨਗੇ ਕਿ ਕੀ ਟਰੰਪ ਆਪਣੇ ਇਸ ਟੁੱਟਦੇ ਹੋਏ ਸਮਰਥਨ ਨੂੰ ਮੁੜ ਜੋੜ ਸਕਣਗੇ ਜਾਂ ਨਹੀਂ।।