ਸਰੀ ਵਿੱਚ ਨਿਯਮਾਂ ਦੀ ਉਲੰਘਣਾ ਕਰਨ ਵਾਲਿਆਂ ਦੀ ਹੁਣ ਖੈਰ ਨਹੀਂ: ਮੇਅਰ ਬਰੈਂਡਾ ਲੋਕ

ਸਰੀ, (ਏਕਜੋਤ ਸਿੰਘ): ਸਰੀ ਸਿਟੀ ਕੌਂਸਲ ਨੇ ਸ਼ਹਿਰ ਦੀਆਂ ਦੋ ਪ੍ਰਮੁੱਖ ਜਾਇਦਾਦਾਂ ਦੇ ਟਾਈਟਲ ‘ਤੇ ਕਾਨੂੰਨੀ ਨੋਟਿਸ ਦਰਜ ਕਰਨ ਦੇ ਸਖ਼ਤ ਨਿਰਦੇਸ਼ ਦਿੱਤੇ ਹਨ। ਇਹ ਕਾਰਵਾਈ ਉਹਨਾਂ ਮਕਾਨਾਂ ਵਿਰੁੱਧ ਕੀਤੀ ਗਈ ਹੈ ਜਿੱਥੇ ਬਿਨਾਂ ਲੋੜੀਂਦੇ ਬਿਲਡਿੰਗ ਪਰਮਿਟਾਂ ਅਤੇ ਸਰਕਾਰੀ ਨਿਰੀਖਣ ਦੇ ਵੱਡੇ ਪੱਧਰ ‘ਤੇ ਉਸਾਰੀ ਅਤੇ ਤਬਦੀਲੀਆਂ ਕੀਤੀਆਂ ਗਈਆਂ ਸਨ। ਮੇਅਰ ਬਰੈਂਡਾ ਲੋਕ ਨੇ ਮੰਗਲਵਾਰ ਨੂੰ ਇਸ ਫੈਸਲੇ ਦੀ ਪੁਸ਼ਟੀ ਕਰਦਿਆਂ ਕਿਹਾ ਕਿ ਸ਼ਹਿਰ ਪ੍ਰਸ਼ਾਸਨ ਗੈਰ-ਕਾਨੂੰਨੀ ਉਸਾਰੀ ਦੇ ਮਾਮਲੇ ਵਿੱਚ ‘ਜ਼ੀਰੋ-ਟੌਲਰੈਂਸ’ ਦੀ ਨੀਤੀ ਅਪਣਾ ਰਿਹਾ ਹੈ। ਉਹਨਾਂ ਸਪੱਸ਼ਟ ਕੀਤਾ ਕਿ ਨਿਵਾਸੀਆਂ ਦੀ ਸੁਰੱਖਿਆ ਨੂੰ ਪਹਿਲ ਦੇਣਾ ਅਤੇ ਨਿਯਮਾਂ ਦੀ ਪਾਲਣਾ ਯਕੀਨੀ ਬਣਾਉਣਾ ਸ਼ਹਿਰ ਦੇ ਵਿਕਾਸ ਕਾਰਜਾਂ ਦੀ ਮਰਿਆਦਾ ਨੂੰ ਬਣਾਈ ਰੱਖਣ ਲਈ ਜ਼ਰੂਰੀ ਹੈ। ਵੇਰਵਿਆਂ ਅਨੁਸਾਰ 12464 77A ਐਵੇਨਿਊ ਸਥਿਤ ਜਾਇਦਾਦ ‘ਤੇ ਦੋ-ਮੰਜ਼ਲਾ ਵਾਧਾ ਕਰਕੇ ਦੋ ਰਿਹਾਇਸ਼ੀ ਯੂਨਿਟ ਬਣਾਏ ਗਏ ਸਨ। ਇਸ ਦੇ ਨਾਲ ਹੀ ਪੱਛਮੀ ਪਾਸੇ ਇੱਕ ਹੋਰ ਦੋ-ਮੰਜ਼ਲਾ ਵਾਧਾ, ਗੈਰੇਜ ਵਿੱਚ ਰਿਹਾਇਸ਼ੀ ਇਕਾਈ ਅਤੇ ਘਰ ਦੇ ਮੂਹਰਲੇ ਪਾਸੇ ਇੱਕ ਡੈੱਕ ਦੀ ਗੈਰ-ਕਾਨੂੰਨੀ ਉਸਾਰੀ ਕੀਤੀ ਗਈ ਸੀ। ਦੂਜੇ ਮਾਮਲੇ ਵਿੱਚ, 13466 87A ਐਵੇਨਿਊ ਸਥਿਤ ਘਰ ਵਿੱਚ ਕਈ ਰਿਹਾਇਸ਼ੀ ਇਕਾਈਆਂ ਦਾ ਵਾਧਾ ਕੀਤਾ ਗਿਆ, ਜਿਸ ਵਿੱਚ ਬੇਸਮੈਂਟ ਵਿੱਚ ਕਈ ਯੂਨਿਟ, ਦੋ ਡੈੱਕ ਅਤੇ ਇੱਕ ਵਾਧੂ ਇਮਾਰਤ ਵਿੱਚ ਰਿਹਾਇਸ਼ੀ ਇਕਾਈ ਸ਼ਾਮਲ ਹੈ। ਇਹ ਸਾਰੀਆਂ ਤਬਦੀਲੀਆਂ ਸ਼ਹਿਰ ਦੇ ਬਿਲਡਿੰਗ ਨਿਯਮਾਂ ਦੀ ਸ਼ਰੇਆਮ ਉਲੰਘਣਾ ਕਰਕੇ ਕੀਤੀਆਂ ਗਈਆਂ ਸਨ। ਕਮਿਊਨਿਟੀ ਚਾਰਟਰ ਦੀ ਧਾਰਾ 57 ਦੇ ਤਹਿਤ ਇਹ ਨੋਟਿਸ ਦਰਜ ਕੀਤੇ ਗਏ ਹਨ, ਜੋ ਭਵਿੱਖ ਵਿੱਚ ਇਹਨਾਂ ਜਾਇਦਾਦਾਂ ਨੂੰ ਖਰੀਦਣ ਵਾਲੇ ਵਿਅਕਤੀਆਂ ਅਤੇ ਜਨਤਾ ਨੂੰ ਅਣਅਧਿਕਾਰਤ ਢਾਂਚਿਆਂ ਬਾਰੇ ਚੇਤਾਵਨੀ ਦੇਣਗੇ। ਇਹ ਇੱਕ ਅਜਿਹਾ ਕਾਨੂੰਨੀ ਉਪਾਅ ਹੈ ਜੋ ਸ਼ਹਿਰ ਵਿੱਚ ਉਸਾਰੀ ਦੇ ਮਿਆਰਾਂ ਨੂੰ ਇੱਕਸਾਰ ਰੱਖਣ ਵਿੱਚ ਮਦਦ ਕਰਦਾ ਹੈ। ਪ੍ਰਸ਼ਾਸਨ ਨੇ ਨਿਵਾਸੀਆਂ ਨੂੰ ਅਪੀਲ ਕੀਤੀ ਹੈ ਕਿ ਜੇਕਰ ਉਹ ਕਿਤੇ ਵੀ ਸ਼ੱਕੀ ਜਾਂ ਗੈਰ-ਕਾਨੂੰਨੀ ਉਸਾਰੀ ਹੁੰਦੀ ਦੇਖਦੇ ਹਨ, ਤਾਂ ਉਹ ਤੁਰੰਤ 604-591-4370 ‘ਤੇ ਫ਼ੋਨ ਕਰਕੇ ਜਾਂ ਈਮੇਲ ਰਾਹੀਂ ਸ਼ਿਕਾਇਤ ਦਰਜ ਕਰਵਾਉਣ। ਸ਼ਹਿਰ ਦੇ ਵਿਕਾਸ ਵਿੱਚ ਨਿਯਮਾਂ ਦੀ ਪਾਲਣਾ ਕਰਨਾ ਹਰ ਨਾਗਰਿਕ ਦੀ ਜ਼ਿੰਮੇਵਾਰੀ ਹੈ। This report was written by Ekjot Singh as part of the Local Journalism Initiative.