ਡੈਲਟਾ ਵਿੱਚ ‘ਯੂਥ ਵੀਕ’ ਅਤੇ ‘ਯੂਥਾਪਾਲੂਜ਼ਾ’ ਦੀਆਂ ਰੌਣਕਾਂ, ਨੌਜਵਾਨਾਂ ਲਈ ਮੁਫ਼ਤ ਪ੍ਰੋਗਰਾਮਾਂ ਦਾ ਐਲਾਨ

ਸਰੀ, (ਏਕਜੋਤ ਸਿੰਘ): ਡੈਲਟਾ ਸਿਟੀ ਵੱਲੋਂ ਇਸ ਬਸੰਤ ਰੁੱਤ ਦੌਰਾਨ ਸਥਾਨਕ ਰੀਕ੍ਰਿਏਸ਼ਨ ਸੈਂਟਰਾਂ ਵਿੱਚ 10 ਤੋਂ 18 ਸਾਲ ਦੇ ਨੌਜਵਾਨਾਂ ਲਈ ਵਿਸ਼ੇਸ਼ ਅਤੇ ਮੁਫ਼ਤ ਪ੍ਰੋਗਰਾਮਾਂ ਦੀ ਲੜੀ ਸ਼ੁਰੂ ਕੀਤੀ ਜਾ ਰਹੀ ਹੈ। ‘ਯੂਥ ਵੀਕ’ ਅਤੇ ਨਵੇਂ ਸ਼ੁਰੂ ਕੀਤੇ ਗਏ ‘ਯੂਥਾਪਾਲੂਜ਼ਾ’ ਰਾਹੀਂ ਸ਼ਹਿਰ ਦੇ ਨੌਜਵਾਨਾਂ ਵੱਲੋਂ ਸਮਾਜ ਵਿੱਚ ਪਾਏ ਜਾਂਦੇ ਵਡਮੁੱਲੇ ਯੋਗਦਾਨ ਦਾ ਜਸ਼ਨ ਮਨਾਇਆ ਜਾਵੇਗਾ। ਡੈਲਟਾ ਦੇ ਮੇਅਰ ਜਾਰਜ ਵੀ. ਹਾਰਵੀ ਨੇ ਇਸ ਸਬੰਧੀ ਜਾਣਕਾਰੀ ਦਿੰਦਿਆਂ ਦੱਸਿਆ ਕਿ ਇਹ ਸਮਾਗਮ ਨੌਜਵਾਨਾਂ ਨੂੰ ਸਰਗਰਮ ਰਹਿਣ, ਆਪਣੀ ਸਿਰਜਣਾਤਮਕਤਾ ਦਿਖਾਉਣ ਅਤੇ ਭਾਈਚਾਰੇ ਨਾਲ ਡੂੰਘਾ ਸਬੰਧ ਬਣਾਉਣ ਦਾ ਇੱਕ ਬਿਹਤਰੀਨ ਮੌਕਾ ਪ੍ਰਦਾਨ ਕਰਨਗੇ। ‘ਯੂਥ ਵੀਕ’ ਦੇ ਮੁੱਖ ਸਮਾਗਮ 1 ਮਈ ਤੋਂ 7 ਮਈ ਤੱਕ ਚੱਲਣਗੇ, ਜਦਕਿ 8 ਮਈ ਨੂੰ ਇਸ ਦਾ ਸ਼ਾਨਦਾਰ ਸਮਾਪਨ ‘ਯੂਥਾਪਾਲੂਜ਼ਾ’ ਨਾਮਕ ਸਮਾਗਮ ਨਾਲ ਹੋਵੇਗਾ।
ਸਾਲ 2026 ਵਿੱਚ ਪਹਿਲੀ ਵਾਰ ਸ਼ੁਰੂ ਕੀਤਾ ਜਾ ਰਿਹਾ ‘ਯੂਥਾਪਾਲੂਜ਼ਾ’ ਨੌਜਵਾਨਾਂ ਲਈ ਵਿਸ਼ੇਸ਼ ਖਿੱਚ ਦਾ ਕੇਂਦਰ ਰਹੇਗਾ। 8 ਮਈ ਨੂੰ ਨੌਰਥ ਡੈਲਟਾ ਰੀਕ੍ਰਿਏਸ਼ਨ ਸੈਂਟਰ ਵਿਖੇ ਨੌਜਵਾਨਾਂ ਲਈ ਬਾਰਬੀਕਿਊ ਦਾ ਪ੍ਰਬੰਧ ਹੋਵੇਗਾ ਅਤੇ ਨੌਰਥ ਡੈਲਟਾ ਸੈਂਟਰ ਫ਼ਾਰ ਆਰਟਸ ਵਿਖੇ ਉਹ ਓਪਨ ਸਟੇਜ ‘ਤੇ ਆਪਣੀ ਕਲਾ ਦਾ ਪ੍ਰਦਰਸ਼ਨ ਕਰ ਸਕਣਗੇ। ਇਸ ਤੋਂ ਇਲਾਵਾ ਸ਼ਾਮ ਵੇਲੇ ਇੱਕ ਵਿਸ਼ੇਸ਼ ‘ਸਾਈਲੈਂਟ ਡਾਂਸ ਪਾਰਟੀ’ ਵੀ ਕਰਵਾਈ ਜਾਵੇਗੀ। ਇਨ੍ਹਾਂ ਜਸ਼ਨਾਂ ਦੀ ਤਿਆਰੀ ਵਜੋਂ ਸ਼ਹਿਰ ਵੱਲੋਂ ‘ਪਾਥ ਟੂ ਯੂਥ ਵੀਕ’ ਪ੍ਰੋਗਰਾਮ ਵੀ ਚਲਾਇਆ ਜਾ ਰਿਹਾ ਹੈ, ਜਿਸ ਵਿੱਚ 23 ਅਤੇ 30 ਅਪ੍ਰੈਲ ਨੂੰ ਆਈਸ ਕਰੀਮ ਐਡਵੈਂਚਰ ਅਤੇ 26 ਅਪ੍ਰੈਲ ਨੂੰ ਤੈਰਾਕੀ ਦੀਆਂ ਮੁਫ਼ਤ ਕਲਾਸਾਂ ਸ਼ਾਮਲ ਹਨ। ਨੌਜਵਾਨਾਂ ਨੂੰ ਇਹਨਾਂ ਗਤੀਵਿਧੀਆਂ ਵਿੱਚ ਹਿੱਸਾ ਲੈਣ ਲਈ ਇੱਕ ਬਿੰਗੋ ਕਾਰਡ ਚੁਣੌਤੀ ਵੀ ਦਿੱਤੀ ਗਈ ਹੈ।
ਸਮਾਗਮਾਂ ਦੇ ਵੇਰਵਿਆਂ ਅਨੁਸਾਰ 1 ਮਈ ਨੂੰ ਵਾਲੀਬਾਲ ਟੂਰਨਾਮੈਂਟ ਕਰਵਾਇਆ ਜਾਵੇਗਾ। 2 ਮਈ ਤੋਂ 6 ਮਈ ਦੇ ਵਿਚਕਾਰ ਵੱਖ-ਵੱਖ ਆਰਟਸ ਸੈਂਟਰਾਂ ਵਿੱਚ ਮਲਟੀਮੀਡੀਆ ਆਰਟ ਵਰਕਸ਼ਾਪ ਅਤੇ ਪਰਸਨਲਾਈਜ਼ਡ ਟੋਟ ਬੈਗ ਬਣਾਉਣ ਦੇ ਸੈਸ਼ਨ ਰੱਖੇ ਗਏ ਹਨ। 7 ਮਈ ਨੂੰ ਡਗਲਸ ਜੇ. ਹਸਬੈਂਡ ਡਿਸਕਵਰੀ ਸੈਂਟਰ ਵਿਖੇ ਪੌਪ ਆਰਟ ਐਡਵੈਂਚਰ ਦਾ ਆਯੋਜਨ ਹੋਵੇਗਾ। ਇਹ ਸਾਰੇ ਪ੍ਰੋਗਰਾਮ ਬ੍ਰਿਟਿਸ਼ ਕੋਲੰਬੀਆ ਦੇ ਸੂਬਾਈ ਯੂਥ ਵੀਕ ਜਸ਼ਨਾਂ ਦਾ ਹਿੱਸਾ ਹਨ। ਸਿਟੀ ਪ੍ਰਸ਼ਾਸਨ ਨੇ ਸਪੱਸ਼ਟ ਕੀਤਾ ਹੈ ਕਿ ਇਹ ਸਾਰੇ ਪ੍ਰੋਗਰਾਮ ਪੂਰੀ ਤਰ੍ਹਾਂ ਮੁਫ਼ਤ ਹਨ ਅਤੇ ਨੌਜਵਾਨ ਡੈਲਟਾ ਸਿਟੀ ਦੀ ਵੈੱਬਸਾਈਟ ‘ਤੇ ਜਾ ਕੇ ਆਪਣੀ ਰਜਿਸਟ੍ਰੇਸ਼ਨ ਕਰਵਾ ਸਕਦੇ ਹਨ। ਇਹ ਉਪਰਾਲਾ ਨੌਜਵਾਨਾਂ ਨੂੰ ਸਮਾਜਿਕ ਤੌਰ ‘ਤੇ ਜੋੜਨ ਲਈ ਇੱਕ ਮਹੱਤਵਪੂਰਨ ਕਦਮ ਸਾਬਤ ਹੋਵੇਗਾ। This report was written by Ekjot Singh as part of the Local Journalism Initiative.