ਸਰੀ, (ਏਕਜੋਤ ਿਸੰਘ): ਬੀ.ਸੀ. ਦੇ ਕਈ ਇਲਾਕਿਆਂ ਵਿੱਚ ਲਗਾਤਾਰ ਪੈ ਰਹੇ ਭਾਰੀ ਮੀਂਹ ਅਤੇ ਵਧ ਰਹੇ ਤਾਪਮਾਨ ਕਾਰਨ ਹੜ੍ਹਾਂ ਦਾ ਖ਼ਤਰਾ ਗੰਭੀਰ ਰੂਪ ਧਾਰਦਾ ਜਾ ਰਿਹਾ ਹੈ । ਰਿਵਰ ਫੋਰਕਾਸਟ ਸੈਂਟਰ ਨੇ ਸੂਬੇ ਦੇ ਵੱਖ-ਵੱਖ ਹਿੱਸਿਆਂ ਵਿੱਚ ਨਦੀਆਂ ਦੇ ਪੱਧਰ ਵਧਣ ਸਬੰਧੀ ‘ਹਾਈ ਸਟ੍ਰੀਮਫਲੋ ਐਡਵਾਈਜ਼ਰੀ’ ਅਤੇ ‘ਫਲੱਡ ਵਾਚ’ ਜਾਰੀ ਰੱਖੀ ਹੋਈ ਹੈ । ਜਲ ਮੰਤਰਾਲੇ ਵੱਲੋਂ ਜਾਰੀ ਇੱਕ ਤਾਜ਼ਾ ਬਿਆਨ ਵਿੱਚ ਚੇਤਾਵਨੀ ਦਿੱਤੀ ਗਈ ਹੈ ਕਿ ਤੱਟਵਰਤੀ ਬੀ.ਸੀ. ਵਿੱਚ ਮੀਂਹ ਦਾ ਇੱਕ ਲੰਬਾ ਸਿਲਸਿਲਾ ਚੱਲ ਰਿਹਾ ਹੈ, ਜਿਸ ਕਾਰਨ ਨਦੀਆਂ ਵਿੱਚ ਪਾਣੀ ਦਾ ਵਹਾਅ ਤੇਜ਼ ਹੋ ਗਿਆ ਹੈ । ਖ਼ਾਸ ਕਰਕੇ ਕੇਂਦਰੀ ਤੱਟ (Central Coast) ਦੇ ਇਲਾਕਿਆਂ ਵਿੱਚ ਸਥਿਤੀ ਵਧੇਰੇ ਸੰਵੇਦਨਸ਼ੀਲ ਬਣੀ ਹੋਈ ਹੈ, ਜਿਸ ਕਾਰਨ ਉੱਥੇ ਹੜ੍ਹਾਂ ਦੀ ਨਿਗਰਾਨੀ ਸਖ਼ਤ ਕਰ ਦਿੱਤੀ ਗਈ ਹੈ । ਮੌਸਮ ਵਿਭਾਗ ਅਨੁਸਾਰ ਸ਼ੁੱਕਰਵਾਰ, 20 ਮਾਰਚ ਤੱਕ ਹੋਰ ਮੀਂਹ ਪੈਣ ਦੀ ਸੰਭਾਵਨਾ ਹੈ, ਜਿਸ ਵਿੱਚ ਦੱਖਣੀ ਤੱਟ ‘ਤੇ ਸਭ ਤੋਂ ਵੱਧ ਬਾਰਿਸ਼ ਹੋਣ ਦਾ ਅਨੁਮਾਨ ਹੈ ।
ਦੱਖਣੀ ਤੱਟ ‘ਤੇ ਮੀਂਹ ਦਾ ਪ੍ਰਭਾਵ ਆਉਣ ਵਾਲੇ ਦਿਨਾਂ ਵਿੱਚ ਹੋਰ ਵਧ ਸਕਦਾ ਹੈ । ਮੰਤਰਾਲੇ ਨੇ ਚੇਤਾਵਨੀ ਦਿੱਤੀ ਹੈ ਕਿ ਮੌਜੂਦਾ ਐਡਵਾਈਜ਼ਰੀਆਂ ਨੂੰ ਇਸ ਹਫ਼ਤੇ ਦੇ ਅੰਤ ਤੱਕ ਹੋਰ ਉੱਚੇ ਪੱਧਰ ‘ਤੇ ਲਿਜਾਇਆ ਜਾ ਸਕਦਾ ਹੈ । ਇਸ ਦੇ ਨਾਲ ਹੀ ਵਧਦੇ ਤਾਪਮਾਨ, ਭਾਰੀ ਵਰਖਾ ਅਤੇ ਤੇਜ਼ ਹਵਾਵਾਂ ਕਾਰਨ ਪਹਾੜੀ ਇਲਾਕਿਆਂ ਵਿੱਚ ਬਰਫ਼ੀਲੇ ਤੋਦਿਆਂ (Avalanche) ਦਾ ਖ਼ਤਰਾ ਵੀ ਬਹੁਤ ਜ਼ਿਆਦਾ ਵਧ ਗਿਆ ਹੈ । ‘ਐਵਲੈਂਚ ਕੈਨੇਡਾ’ ਨੇ ਸੈਲਾਨੀਆਂ ਅਤੇ ਬੈਕਕੰਟਰੀ ਉਪਭੋਗਤਾਵਾਂ ਨੂੰ ਸਖ਼ਤ ਹਦਾਇਤ ਕੀਤੀ ਹੈ ਕਿ ਉਹ ਇਸ ਹਫ਼ਤੇ ਦੌਰਾਨ ਖ਼ਤਰਨਾਕ ਪਹਾੜੀ ਖੇਤਰਾਂ ਤੋਂ ਦੂਰ ਰਹਿਣ । ਭਾਵੇਂ ਕਿ ਕੁਝ ਥਾਵਾਂ ‘ਤੇ ਮੀਂਹ ਦੀ ਰਫ਼ਤਾਰ ਮਾਮੂਲੀ ਘਟੀ ਹੈ ਅਤੇ ਨਦੀਆਂ ਦਾ ਪੱਧਰ ਨੀਵਾਂ ਹੋਣਾ ਸ਼ੁਰੂ ਹੋਇਆ ਹੈ, ਪਰ ਵੀਰਵਾਰ ਅਤੇ ਸ਼ੁੱਕਰਵਾਰ ਨੂੰ ਮੁੜ ਭਾਰੀ ਮੀਂਹ ਪੈਣ ਦੀ ਸੰਭਾਵਨਾ ਹੈ, ਜਿਸ ਕਾਰਨ ਪਾਣੀ ਦਾ ਵਹਾਅ ਆਪਣੇ ਸਿਖਰ ‘ਤੇ ਪਹੁੰਚ ਸਕਦਾ ਹੈ ।
ਵੈਨਕੂਵਰ ਆਈਲੈਂਡ ‘ਤੇ ਹਾਲਾਤ ਨੂੰ ਦੇਖਦੇ ਹੋਏ ਰਿਵਰ ਫੋਰਕਾਸਟ ਸੈਂਟਰ ਨੇ ਉੱਤਰੀ ਅਤੇ ਪੱਛਮੀ ਹਿੱਸਿਆਂ ਲਈ ਪਹਿਲਾਂ ਜਾਰੀ ਕੀਤੀ ‘ਫਲੱਡ ਵਾਚ’ ਨੂੰ ਹੁਣ ‘ਹਾਈ ਸਟ੍ਰੀਮਫਲੋ ਐਡਵਾਈਜ਼ਰੀ’ ਵਿੱਚ ਬਦਲ ਦਿੱਤਾ ਹੈ ।
ਟਾਪੂ ਦੇ ਬਾਕੀ ਹਿੱਸਿਆਂ ਲਈ ਪੁਰਾਣੀ ਚੇਤਾਵਨੀ ਅਜੇ ਵੀ ਬਰਕਰਾਰ ਹੈ । ਜ਼ਿਕਰਯੋਗ ਹੈ ਕਿ ਐਤਵਾਰ, 15 ਮਾਰਚ ਨੂੰ ਖੇਤਰ ਵਿੱਚ ਇੱਕ ‘ਐਟਮੌਸਫੇਰਿਕ ਰਿਵਰ’ ਨੇ ਦਸਤਕ ਦਿੱਤੀ ਸੀ, ਜਿਸ ਤੋਂ ਬਾਅਦ ਤਾਪਮਾਨ ਵਿੱਚ ਗਿਰਾਵਟ ਆਉਣ ਕਾਰਨ ਭਾਰੀ ਬਰਫ਼ਬਾਰੀ ਹੋਈ ਸੀ । ਪਰ ਸੋਮਵਾਰ ਨੂੰ ਤਾਪਮਾਨ ਮੁੜ ਵਧਣ ਕਾਰਨ ਬਰਫ਼ ਪਿਘਲਣੀ ਸ਼ੁਰੂ ਹੋ ਗਈ ਅਤੇ ਉੱਤਰੀ ਵੈਨਕੂਵਰ ਆਈਲੈਂਡ ‘ਤੇ ਭਾਰੀ ਮੀਂਹ ਪਿਆ । ਸੋਮਵਾਰ ਨੂੰ ਕਈ ਨਦੀਆਂ ਵਿੱਚ ਪਾਣੀ ਦਾ ਵਹਾਅ ਤੇਜ਼ੀ ਨਾਲ ਵਧਿਆ, ਜਿਸ ਵਿੱਚ ਸਿਮਪਸਨ ਕ੍ਰੀਕ ਅਤੇ ਪਿਊ ਕ੍ਰੀਕ ਵਰਗੀਆਂ ਨਦੀਆਂ ਵਿੱਚ 10 ਤੋਂ 20 ਸਾਲਾਂ ਦੇ ਰਿਕਾਰਡ ਪੱਧਰ ਦਾ ਵਹਾਅ ਦਰਜ ਕੀਤਾ ਗਿਆ ਹੈ ।
ਬ੍ਰਿਟਿਸ਼ ਕੋਲੰਬੀਆ ਵਿੱਚ ਨਦੀਆਂ ਦਾ ਪੱਧਰ ਵਧਿਆ, ਭਾਰੀ ਮੀਂਹ ਅਤੇ ਹੜ੍ਹਾਂ ਦੇ ਖ਼ਤਰੇ ਕਾਰਨ ਹਾਈ ਅਲਰਟ ਜਾਰੀ
