ਓਨਟੇਰੀਓ ਦੇ ਪੰਜਾਬੀ ਟਰੱਕ ਡਰਾਈਵਰ ਨੂੰ ਮੈਨੀਟੋਬਾ ਹਾਦਸੇ ਮਾਮਲੇ ‘ਚ ਸ਼ਰਤਾਂ ਨਾਲ ਜ਼ਮਾਨਤ

ਸਰੀ, (ਏਕਜੋਤ ਸਿੰਘ): ਓਨਟੇਰੀਓ ਦੇ ਇੱਕ ਪੰਜਾਬੀ ਮੂਲ ਦੇ ਟਰੱਕ ਡਰਾਈਵਰ ਨਵਜੀਤ ਸਿੰਘ ਨੂੰ 2024 ਦੇ ਇਕ ਘਾਤਕ ਸੜਕ ਹਾਦਸੇ ਮਾਮਲੇ ‘ਚ ਅਦਾਲਤ ਵੱਲੋਂ ਸ਼ਰਤਾਂ ਉੱਪਰ ਜ਼ਮਾਨਤ ਮਿਲੀ ਹੈ। 26 ਸਾਲਾ ਨਵਜੀਤ ਨੂੰ ਆਪਣਾ ਪਾਸਪੋਰਟ ਅਤੇ ਡਰਾਈਵਿੰਗ ਲਾਇਸੈਂਸ ਜਮ੍ਹਾਂ ਕਰਵਾਉਣ, ਡਰਾਈਵਿੰਗ ਨਾ ਕਰਨ, ਓਨਟੇਰੀਓ ਦੇ ਇਕ ਨਿਰਧਾਰਤ ਪਤੇ ‘ਤੇ ਰਹਿਣ ਅਤੇ ਮੈਨੀਟੋਬਾ ਪੁਲਿਸ ਕੋਲ ਹਫ਼ਤੇਵਾਰ ਹਾਜ਼ਰੀ ਲਗਾਉਣ ਵਰਗੀਆਂ ਸ਼ਰਤਾਂ ਨਾਲ ਰਿਹਾਅ ਕੀਤਾ ਗਿਆ ਹੈ। ਪੁਲਿਸ ਦੇ ਅਨੁਸਾਰ, ਨਵਜੀਤ ਨੂੰ ਇੱਕ ਹਫ਼ਤਾ ਪਹਿਲਾਂ ਟੋਰਾਂਟੋ ਦੇ ਪੀਅਰਸਨ ਅੰਤਰਰਾਸ਼ਟਰੀ ਹਵਾਈ ਅੱਡੇ ‘ਤੇ ਗ੍ਰਿਫ਼ਤਾਰ ਕੀਤਾ ਗਿਆ ਸੀ, ਜਦੋਂ ਉਹ ਇਥੋਪੀਅਨ ਏਅਰਲਾਈਨਜ਼ ਦੀ ਉਡਾਣ ਰਾਹੀਂ ਕੈਨੇਡਾ ਵਾਪਸ ਆਇਆ। ਉਸ ਉੱਤੇ ਮੈਨੀਟੋਬਾ ਦੇ ਵਿਨੀਪੈਗ ਨੇੜੇ 15 ਨਵੰਬਰ, 2024 ਨੂੰ ਹੋਏ ਇਕ ਹਾਦਸੇ ਵਿੱਚ ਦੋ ਜਾਨਾਂ ਦੇ ਜਾਣ ਦਾ ਦੋਸ਼ ਹੈ। ਇਸ ਹਾਦਸੇ ਵਿੱਚ 35 ਸਾਲਾ ਸਾਰਾ ਉਂਗਰ ਅਤੇ ਉਸਦੀ ਧੀ ਅਲੈਕਸਾ ਦੀ ਮੌਤ ਹੋ ਗਈ ਸੀ।
ਕਰਾਊਨ ਅਟਾਰਨੀ ਮਾਈਕਲ ਹਿਮਲਮੈਨ ਨੇ ਅਦਾਲਤ ਨੂੰ ਦੱਸਿਆ ਕਿ ਜਾਂਚਕਰਤਾਵਾਂ ਦਾ ਮੰਨਣਾ ਹੈ ਕਿ ਨਵਜੀਤ ਸਿੰਘ ਹਾਈਵੇਅ ‘ਤੇ ਲਗਭਗ 91 ਕਿਲੋਮੀਟਰ ਪ੍ਰਤੀ ਘੰਟਾ ਦੀ ਗਤੀ ਨਾਲ ਟਰੱਕ ਚਲਾ ਰਿਹਾ ਸੀ, ਜਿੱਥੇ ਗਤੀ ਸੀਮਾ 100 ਕਿਲੋਮੀਟਰ ਪ੍ਰਤੀ ਘੰਟਾ ਸੀ। ਉਸ ਸ਼ਾਮ ਨੂੰ ਜਦੋਂ ਉਹ ਸਟਾਪ ਸਾਈਨ ਪਾਰ ਕਰ ਗਿਆ, ਤਾਂ ਉਸ ਦਾ ਟਰੱਕ ਉਂਗਰ ਦੀ ਸ਼ੂੜ ਨਾਲ ਸਿੱਧੀ ਟੱਕਰ ਹੋ ਗਿਆ। ਜ਼ਮਾਨਤ ਸੁਣਵਾਈ ਦੀ ਰਿਕਾਰਡਿੰਗ ਮੁਤਾਬਕ, ਅਦਾਲਤ ਨੇ ਸੁਣਿਆ ਕਿ ਹਾਦਸੇ ਵਾਲੀ ਰਾਤ ਸੜਕ ਦੀਆਂ ਹਾਲਤਾਂ ਆਮ ਸਨ, ਅਤੇ ਕਿਸੇ ਵੀ ਮੌਸਮੀ ਜਾਂ ਦਿੱਖ ਸੰਬੰਧੀ ਰੁਕਾਵਟ ਦੀ ਕੋਈ ਰਿਪੋਰਟ ਨਹੀਂ ਸੀ। ਹਾਦਸੇ ਤੋਂ ਬਾਅਦ ਪੁਲਿਸ ਨੇ ਹਸਪਤਾਲ ਵਿੱਚ ਨਵਜੀਤ ਨਾਲ ਇੰਟਰਵਿਊ ਕਰਨ ਦੀ ਕੋਸ਼ਿਸ਼ ਕੀਤੀ, ਪਰ ਉਨ੍ਹਾਂ ਨੂੰ ਦੱਸਿਆ ਗਿਆ ਕਿ ਉਹ ਸਦਮੇ ਵਿੱਚ ਹੈ। ਰਿਹਾਅ ਹੋਣ ‘ਤੇ ਉਸਨੂੰ ਜਾਂਚਕਰਤਾਵਾਂ ਨਾਲ ਸੰਪਰਕ ਕਰਨ ਲਈ ਕਿਹਾ ਗਿਆ ਸੀ, ਪਰ ਉਹ ਕਦੇ ਵੀ ਇੰਟਰਵਿਊ ਲਈ ਨਹੀਂ ਆਇਆ।ઠ This report was written by Ekjot Singh as part of the Local Journalism Initiative.