ਔਟਵਾ : ਕੈਨੇਡਾਆਂ ਦੀ ਦੋ ਪ੍ਰਮੁੱਖ ਏਅਰਲਾਈਨ ਕੰਪਨੀਆਂ ਫਲੇਅਰ ਏਅਰਲਾਈਨਜ਼ ਅਤੇ ਵੈਸਟਜੈੱਟ ਨੇ ਅਲਬਰਟਾ ਤੋਂ ਸੰਯੁਕਤ ਰਾਜ ਅਮਰੀਕਾ ਲਈ ਆਪਣੀਆਂ ਕਈ ਉਡਾਣਾਂ ਰੱਦ ਕਰ ਦਿੱਤੀਆਂ ਹਨ। ਇਹ ਕਦਮ ਯਾਤਰੀ ਮੰਗ ਵਿੱਚ ਆਈ ਵੱਡੀ ਗਿਰਾਵਟ ਅਤੇ ਅਮਰੀਕੀ ਰਾਸ਼ਟਰਪਤੀ ਡੋਨਾਲਡ ਟਰੰਪ ਵੱਲੋਂ ਲਗਾਏ ਗਏ ਵਪਾਰਕ ਟੈਰਿਫ਼ਾਂ ਦੇ ਚਲਦਿਆਂ ਲਿਆ ਗਿਆ ਹੈ।
ਫਲੇਅਰ ਏਅਰਲਾਈਨਜ਼ ਨੇ ਐਲਾਨ ਕੀਤਾ ਹੈ ਕਿ ਐਡਮੰਟਨ ਅਤੇ ਕੈਲਗਰੀ ਤੋਂ ਲਾਸ ਵੇਗਾਸ ਤੇ ਫੀਨਿਕਸ ਜਾਣ ਵਾਲੀਆਂ ਚਾਰ ਉਡਾਣਾਂ ਉਮੀਦ ਤੋਂ ਪਹਿਲਾਂ ਹੀ ਬੰਦ ਕਰ ਦਿੱਤੀਆਂ ਜਾਣਗੀਆਂ। ਐਡਮੰਟਨ ਤੋਂ ਲਾਸ ਵੇਗਾਸ ਦੀ ਉਡਾਣ, ਜੋ 26 ਮਈ ਨੂੰ ਸਮਾਪਤ ਹੋਣੀ ਸੀ, ਹੁਣ 7 ਅਪ੍ਰੈਲ ਨੂੰ ਹੀ ਬੰਦ ਹੋ ਜਾਵੇਗੀ। ਐਡਮੰਟਨ ਤੋਂ ਫੀਨਿਕਸ ਉਡਾਣ 22 ਅਪ੍ਰੈਲ ਦੀ ਬਜਾਏ 8 ਅਪ੍ਰੈਲ ਨੂੰ ਖਤਮ ਕੀਤੀ ਜਾ ਰਹੀ ਹੈ। ਕੈਲਗਰੀ ਤੋਂ ਲਾਸ ਵੇਗਾਸ ਦੀਆਂ ਦੋ ਉਡਾਣਾਂ 7 ਅਤੇ 8 ਅਪ੍ਰੈਲ ਨੂੰ ਖਤਮ ਹੋਣਗੀਆਂ।
ਇਸੇ ਤਰ੍ਹਾਂ ਵੈਸਟਜੈੱਟ ਨੇ ਵੀ ਐਲਾਨ ਕੀਤਾ ਕਿ ਉਹ ਅਲਬਰਟਾ ਤੋਂ ਸੰਯੁਕਤ ਰਾਜ ਲਈ ਦੋ ਪਲਾਨਡ ਉਡਾਣਾਂ ਰੱਦ ਕਰ ਰਹੀ ਹੈ।
ਐਡਮੰਟਨ ਤੋਂ ਆਰਲੈਂਡੋ, ਫਲੋਰੀਡਾ ਜਾਣ ਵਾਲੀ ਉਡਾਣ (ਸਮਰਟਾਈਮ ਸੇਵਾ) ਹੁਣ ਚਲਾਈ ਨਹੀਂ ਜਾਵੇਗੀ। ਕੈਲਗਰੀ ਤੋਂ ਨਿਊਯਾਰਕ ਦੇ ਲਾਗਾਰਡਿਆ ਹਵਾਈ ਅੱਡੇ ਤੱਕ ਦੀ ਯਾਤਰਾ ਵੀ ਖਤਮ ਕਰ ਦਿੱਤੀ ਗਈ ਹੈ।
ਫਲੇਅਰ ਅਤੇ ਵੈਸਟਜੈੱਟ ਦੋਨਾਂ ਨੇ ਦੱਸਿਆ ਕਿ ਉਡਾਣਾਂ ਦੀ ਮੰਗ ਵਿੱਚ ਆਇਆ ਘਾਟਾ ਹੀ ਇਹਨਾਂ ਬੰਦਸ਼ਾਂ ਦੀ ਮੁੱਖ ਵਜ੍ਹਾ ਹੈ।
ਐਡਮੰਟਨ ਦੇ ਇੱਕ ਟ੍ਰੈਵਲ ਏਜੰਟ ਨੇ ਦੱਸਿਆ ਕਿ ਅਮਰੀਕੀ ਰਾਸ਼ਟਰਪਤੀ ਡੋਨਾਲਡ ਟਰੰਪ ਵੱਲੋਂ ਲਗਾਏ ਗਏ ਟੈਰਿਫ਼ਾਂ ਤੇ ਵਪਾਰਕ ਪਾਬੰਦੀਆਂ ਕਾਰਨ, ਕੈਨੇਡੀਅਨ ਯਾਤਰੀ ਹੁਣ ਅਮਰੀਕਾ ਜਾਣ ਤੋਂ ਹਚਕਚਾ ਰਹੇ ਹਨ। ਉਨ੍ਹਾਂ ਨੇ ਕਿਹਾ, “ਅਸੀਂ ਬਹੁਤ ਸਾਰੇ ਅਜਿਹੇ ਯਾਤਰੀ ਵੇਖ ਰਹੇ ਹਾਂ ਜੋ ਅਮਰੀਕਾ ਜਾਣ ਦੀ ਥਾਂ ਜਾਂ ਤਾਂ ਕੈਨੇਡਾ ਦੇ ਅੰਦਰ ਯਾਤਰਾ ਕਰ ਰਹੇ ਹਨ ਜਾਂ ਹੋਰ ਦੇਸ਼ਾਂ ਦੀ ਯਾਤਰਾ ਕਰ ਰਹੇ ਹਨ।”
ਇਸੇ ਤਰ੍ਹਾਂ, ਹੋਰ ਯਾਤਰੀ ਸਲਾਹਕਾਰਾਂ ਦਾ ਵੀ ਮੰਨਣਾ ਹੈ ਕਿ ਕੈਨੇਡੀਅਨ ਲੋਕ ਹੁਣ ਆਪਣੇ ਦੱਖਣੀ ਗੁਆਂਢੀ ਦੇ ਵਪਾਰ ਤੇ ਯਾਤਰਾ ‘ਚ ਭਾਗ ਨਹੀਂ ਲੈਣਾ ਚਾਹੁੰਦੇ।
ਇਹ ਹਾਲਾਤ ਅੰਕੜਿਆਂ ‘ਚ ਵੀ ਦਰਜ ਹੋ ਰਹੇ ਹਨ, ਜਿਸ ਕਰਕੇ ਕੈਨੇਡੀਅਨ ਏਅਰਲਾਈਨ ਕੰਪਨੀਆਂ ਨੇ ਆਪਣੀ ਨੀਤੀ ‘ਚ ਵੱਡੇ ਬਦਲਾਅ ਕੀਤੇ ਹਨ।
