ਸਰੀ, (ਏਕਜੋਤ ਿਸੰਘ): ਵੈਨਕੂਵਰ ਦੇ ਈਸਟ ਬ੍ਰਾਡਵੇਅ ਖੇਤਰ ਵਿੱਚ ਚੱਲ ਰਹੇ ਬ੍ਰਾਡਵੇਅ ਸਬਵੇਅ ਪ੍ਰੋਜੈਕਟ ਦੇ ਨਿਰਮਾਣ ਕਾਰਨ ਲੰਬੇ ਸਮੇਂ ਤੋਂ ਬੰਦ ਪਏ ਰਸਤੇ ਨੂੰ ਬੁੱਧਵਾਰ ਤੋਂ ਦੋਵਾਂ ਦਿਸ਼ਾਵਾਂ ਵਿੱਚ ਇੱਕ-ਇੱਕ ਲੇਨ ਲਈ ਦੁਬਾਰਾ ਖੋਲ੍ਹ ਦਿੱਤਾ ਗਿਆ ਹੈ। ਮੇਨ ਸਟ੍ਰੀਟ ਦੇ ਇਸ ਇੰਟਰਸੈਕਸ਼ਨ ਨੂੰ ਮਿੱਥੇ ਸਮੇਂ ਤੋਂ ਇੱਕ ਹਫ਼ਤਾ ਪਹਿਲਾਂ ਖੋਲ੍ਹਿਆ ਗਿਆ ਹੈ, ਜਿਸ ਨਾਲ ਇਲਾਕੇ ਦੇ ਵਾਹਨ ਚਾਲਕਾਂ ਅਤੇ ਸਥਾਨਕ ਕਾਰੋਬਾਰੀਆਂ ਨੂੰ ਵੱਡੀ ਰਾਹਤ ਮਿਲੀ ਹੈ। ਇਹ ਮੁੱਖ ਮਾਰਗ ਜਨਵਰੀ ਦੇ ਅਖੀਰ ਤੋਂ ਮੇਨ ਅਤੇ ਕਿਊਬੈਕ ਸਟ੍ਰੀਟ ਦੇ ਵਿਚਕਾਰ ਪੂਰੀ ਤਰ੍ਹਾਂ ਬੰਦ ਸੀ, ਕਿਉਂਕਿ ਨਿਰਮਾਣ ਟੀਮਾਂ ਭਵਿੱਖ ਦੇ ਮਾਊਂਟ ਪਲੀਜ਼ੈਂਟ ਸਟੇਸ਼ਨ ਦੇ ਨਿਰਮਾਣ ਲਈ ਟ੍ਰੈਫਿਕ ਡੈੱਕ ਨੂੰ ਹਟਾਉਣ ਦੇ ਕੰਮ ਵਿੱਚ ਜੁਟੀਆਂ ਹੋਈਆਂ ਸਨ।
ਸੂਬਾ ਸਰਕਾਰ ਦੇ ਅਧਿਕਾਰੀਆਂ ਨੇ ਦੱਸਿਆ ਕਿ ਇਸ ਖਾਸ ਹਿੱਸੇ ‘ਤੇ ਕੰਮ ਉਮੀਦ ਨਾਲੋਂ ਤੇਜ਼ੀ ਨਾਲ ਪ੍ਰਗਤੀ ਵੱਲ ਵਧਿਆ ਹੈ, ਜਿਸ ਦੇ ਸਿੱਟੇ ਵਜੋਂ ਬ੍ਰਾਡਵੇਅ ਦੀਆਂ ਸਾਰੀਆਂ 4 ਲੇਨਾਂ ਨੂੰ ਸਤੰਬਰ ਦੀ ਬਜਾਏ ਜੁਲਾਈ ਤੱਕ ਪੂਰੀ ਤਰ੍ਹਾਂ ਖੋਲ੍ਹ ਦਿੱਤਾ ਜਾਵੇਗਾ। ਹਾਲਾਂਕਿ, ਇਸ ਲੰਬੇ ਸਮੇਂ ਦੀ ਸੜਕ ਬੰਦੀ ਕਾਰਨ ਇਲਾਕੇ ਦੇ ਕਾਰੋਬਾਰੀ ਬਹੁਤ ਪ੍ਰਭਾਵਿਤ ਹੋਏ ਹਨ। ਕੱਪੜਿਆਂ ਦੇ ਬ੍ਰਾਂਡ ‘ਡੌਬ’ (Daub) ਦੀ ਸੰਸਥਾਪਕ ਲੈਕਸੀ ਸੁਕੋਰੇਫ ਨੇ ਦੱਸਿਆ ਕਿ ਪਿਛਲੇ 4 ਮਹੀਨਿਆਂ ਦੌਰਾਨ ਪੈਦਲ ਚੱਲਣ ਵਾਲੇ ਗਾਹਕਾਂ ਦੀ ਗਿਣਤੀ ਬਹੁਤ ਘੱਟ ਗਈ ਸੀ, ਜਿਸ ਨਾਲ ਕਾਰੋਬਾਰ ਦੀ ਆਮਦਨ ਬਹੁਤ ਪ੍ਰਭਾਵਿਤ ਹੋਈ। ਸੜਕ ਬੰਦ ਹੋਣ ਕਾਰਨ ਗੱਡੀਆਂ ਦਾ ਆਉਣਾ-ਜਾਣਾ ਬੰਦ ਸੀ ਅਤੇ ਦੁਕਾਨ ਦੇ ਸਾਹਮਣੇ ਵਾਲਾ ਫੁੱਟਪਾਥ ਵੀ ਅਜੇ ਤੱਕ ਬੰਦ ਹੈ।
ਲੈਕਸੀ ਮੁਤਾਬਕ, ਆਮਦਨ ਵਿੱਚ ਹੋਏ ਨੁਕਸਾਨ ਦੀ ਭਰਪਾਈ ਲਈ ਉਨ੍ਹਾਂ ਨੂੰ ਆਨਲਾਈਨ ਵਿਕਰੀ ਅਤੇ ਹੋਲਸੇਲ ਦੇ ਕੰਮ ‘ਤੇ ਨਿਰਭਰ ਰਹਿਣਾ ਪਿਆ, ਜਿਸ ਲਈ ਭਾਰੀ ਇਸ਼ਤਿਹਾਰਬਾਜ਼ੀ ਦਾ ਖਰਚਾ ਕਰਨਾ ਪੈਂਦਾ ਹੈ। ਹਾਲਾਂਕਿ ਸਰਕਾਰ ਨੇ ਭਰੋਸਾ ਦਿੱਤਾ ਹੈ ਕਿ ਗਰਮੀਆਂ ਦੇ ਅੰਤ ਤੱਕ ਇਹ ਰਸਤਾ ਪੂਰੀ ਤਰ੍ਹਾਂ ਖੋਲ੍ਹ ਦਿੱਤਾ ਜਾਵੇਗਾ, ਪਰ ਪਹਿਲਾਂ ਵੀ ਕਈ ਵਾਰ ਡੈੱਡਲਾਈਨ ਖੁੰਝ ਜਾਣ ਕਾਰਨ ਕਾਰੋਬਾਰੀ ਅਜੇ ਵੀ ਚਿੰਤਤ ਹਨ। ਗਰਮੀਆਂ ਦੇ ਮੌਸਮ ਵਿੱਚ ਵੈਨਕੂਵਰ ਵਿੱਚ ਸੈਲਾਨੀਆਂ ਦੀ ਆਮਦ ਕਾਰਨ ਬਾਜ਼ਾਰਾਂ ਵਿੱਚ ਰੌਣਕ ਹੁੰਦੀ ਹੈ, ਇਸ ਲਈ ਸੜਕਾਂ ਦਾ ਖੁੱਲ੍ਹਣਾ ਬਹੁਤ ਜ਼ਰੂਰੀ ਹੈ।
ਸਥਾਨਕ ਨਿਵਾਸੀ ਵਿਕਟੋਰੀਆ ਰਾਨੀਆ ਨੇ ਕਿਹਾ ਕਿ ਰੋਜ਼ਾਨਾ ਕੰਮ ‘ਤੇ ਜਾਣ ਵਾਲੇ ਲੋਕਾਂ ਲਈ ਟ੍ਰੈਫਿਕ ਦੀ ਸਥਿਤੀ ਬਹੁਤ ਖ਼ਰਾਬ ਸੀ ਅਤੇ ਇਸ ਹਿੱਸੇ ਦੇ ਖੁੱਲ੍ਹਣ ਨਾਲ ਕੁਝ ਸੁਧਾਰ ਹੋਵੇਗਾ। ਪਰ ਵਾਹਨ ਚਾਲਕਾਂ ਦੀਆਂ ਮੁਸ਼ਕਿਲਾਂ ਅਜੇ ਪੂਰੀ ਤਰ੍ਹਾਂ ਖਤਮ ਨਹੀਂ ਹੋਈਆਂ, ਕਿਉਂਕਿ ਗਰਮੀਆਂ ਦੇ ਅੰਤ ਵਿੱਚ ਅਲਬਰਟਾ ਅਤੇ ਕੈਂਬੀ ਸਟ੍ਰੀਟ ਦੇ ਵਿਚਕਾਰ ਬ੍ਰਾਡਵੇਅ ਦਾ ਇੱਕ ਹੋਰ ਹਿੱਸਾ ਅਗਲੇ 6 ਮਹੀਨਿਆਂ ਲਈ ਪੂਰੀ ਤਰ੍ਹਾਂ ਬੰਦ ਕੀਤਾ ਜਾਵੇਗਾ। ਸੂਬਾ ਸਰਕਾਰ ਅਨੁਸਾਰ ਇਹ ਬੰਦੀ ਜੁਲਾਈ ਵਿੱਚ ਫੀਫਾ ਵਿਸ਼ਵ ਕੱਪ ਦੇ ਮੈਚ ਖਤਮ ਹੋਣ ਤੋਂ ਬਾਅਦ ਸ਼ੁਰੂ ਹੋਵੇਗੀ ਅਤੇ ਇਹ ਪ੍ਰੋਜੈਕਟ ਨੂੰ ਪੂਰਾ ਕਰਨ ਲਈ ਆਖਰੀ ਮੁੱਖ ਸੜਕ ਬੰਦੀ ਹੋਵੇਗੀ।
ਵੈਨਕੂਵਰ ਦਾ ਈਸਟ ਬ੍ਰਾਡਵੇਅ ਹਿੱਸਾ ਆਵਾਜਾਈ ਲਈ ਖੁੱਲ੍ਹਿਆ, ਸਥਾਨਕ ਦੁਕਾਨਦਾਰਾਂ ਨੇ ਸੁੱਖ ਦਾ ਸਾਹ ਲਿਆ
