ਸੁਪਰਮਾਰਕੀਟ ਤੋਂ ਲਿਆਂਦੇ ਸਲਾਦ ਦੇ ਪੈਕੇਟ ਵਿੱਚੋਂ ਨਿਕਲਿਆ ਜ਼ਿੰਦਾ ਡੱਡੂ

ਸਿਡਨੀ : ਆਸਟ੍ਰੇਲੀਆ ਵਿੱਚ ਐਸਪੇਰੈਂਸ ਦੇ ਰਹਿਣ ਵਾਲੇ ਇੱਕ ਕਿਸਾਨ ਰਾਈਸ ਸਮੋਕਰ ਨੂੰ ਸੁਪਰਮਾਰਕੀਟ ਤੋਂ ਲਿਆਂਦੇ ਸਲਾਦ ਦੇ ਇੱਕ ਬੰਦ ਪੈਕੇਟ ਵਿੱਚੋਂ ਜ਼ਿੰਦਾ ਡੱਡੂ ਮਿਲਿਆ। ਜਦੋਂ ਉਸਨੇ ਆਪਣੇ ਨਾਲ ਰਹਿੰਦੇ ਦੋਸਤਾਂ ਨੂੰ ਇਸ ਬਾਰੇ ਦੱਸਿਆ ਤਾਂ ਉਨ੍ਹਾਂ ਨੇ ਪਹਿਲਾਂ ਉਸ ਦੀ ਗੱਲ ‘ਤੇ ਯਕੀਨ ਨਹੀਂ ਕੀਤਾ ਅਤੇ ਇਸਨੂੰ ਮਜ਼ਾਕ ਸਮਝਿਆ। ਇਹ ਘਟਨਾ ਸ਼ਨੀਵਾਰ ਦੀ ਹੈ ਜਦੋਂ ਰਾਈਸ ਸਮੋਕਰ ਆਪਣੇ ਘਰ ਦੇ 3 ਮੈਂਬਰਾਂ ਲਈ ਸਲਾਦ ਅਤੇ ਸਟੀਕ ਬਣਾਉਣ ਦੀ ਤਿਆਰੀ ਕਰ ਰਿਹਾ ਸੀ। ਉਸਦੀ ਹਾਊਸਮੇਟ ਲੌਰਾ ਜੋਨਸ ਨੇ ਦੱਸਿਆ ਕਿ ਜਦੋਂ ਰਾਈਸ ਨੇ ਪੈਕੇਟ ਵਿੱਚ ਡੱਡੂ ਹੋਣ ਦੀ ਗੱਲ ਕਹੀ ਤਾਂ ਉਨ੍ਹਾਂ ਨੂੰ ਲੱਗਿਆ ਕਿ ਉਹ ਉਨ੍ਹਾਂ ਨੂੰ ਮੂਰਖ ਬਣਾਉਣ ਦੀ ਕੋਸ਼ਿਸ਼ ਕਰ ਰਿਹਾ ਹੈ। ਪਰ ਜਦੋਂ ਰਾਈਸ ਨੇ ਲੌਂਜ ਰੂਮ ਵਿੱਚ ਆ ਕੇ ਪੈਕੇਟ ਦਿਖਾਇਆ ਤਾਂ ਸੱਚਮੁੱਚ ਉਸ ਵਿੱਚ ਪੱਤਿਆਂ ਵਿਚਕਾਰ ਇੱਕ ਜ਼ਿੰਦਾ ਡੱਡੂ ਬੈਠਾ ਸੀ। ਸਾਰੇ ਦੋਸਤ ਇਸ ਅਜੀਬ ਘਟਨਾ ਨੂੰ ਦੇਖ ਕੇ ਹੈਰਾਨ ਰਹਿ ਗਏ ਅਤੇ ਕਾਫੀ ਹੱਸੇ। ਲੌਰਾ ਦੇ ਸਾਥੀ ਬਿਲੀ ਲੇ ਪਾਈਨ ਨੇ ਦੱਸਿਆ ਕਿ ਉਨ੍ਹਾਂ ਨੇ ਉਸ ਡੱਡੂ ਦਾ ਨਾਮ ਪਿਆਰ ਨਾਲ ਗ੍ਰੇਗ ਰੱਖਿਆ। ਇਸ ਤੋਂ ਬਾਅਦ ਉਨ੍ਹਾਂ ਨੇ ਉਸ ਡੱਡੂ ਨੂੰ ਪੈਕੇਟ ਵਿੱਚੋਂ ਕੱਢ ਕੇ ਸੁਰੱਖਿਅਤ ਢੰਗ ਨਾਲ ਘਰ ਦੇ ਨੇੜੇ ਬਣੇ ਇੱਕ ਤਲਾਬ ਵਿੱਚ ਛੱਡ ਦਿੱਤਾ।