ਪੱਗ

ਸਿੱਖਿਆ ਮੇਰੀ ਬੰਨ੍ਹ ਲੈ ਪੱਲੇ

ਤੁਰਨਾ ਹੈ ਜਦ ਕਦੀ ਵੀ ਕੱਲੇ

ਸੋਚ ਸਮਝਕੇ ਕਦਮ ਵਧਾਉਣੇ

ਜੀਵਨ ਮੁੰਦਰੀ ਨਗ ਹੁੰਦੀ ਏ

ਧੀਏ ਨੀ ਇਹ ਯਾਦ ਰੱਖੀਂ

ਧੀ ਬਾਬਲ ਦੀ ਪੱਗ ਹੁੰਦੀ ਏ

ਕਾਬੂ ਰੱਖ ਲਈ ਵਲਵਲੇ ਮਨ ਦੇ

ਦੇਰ ਨਹੀਂ ਲੱਗਦੀ ਭਾਂਬੜ ਬਣਦੇ

ਉਸ ਥਾਂ ਜਾਣਾ ਭੁੱਲਕੇ ਵੀ ਨਾ

ਜਿਸ ਥਾਂ ਮੱਚਦੀ ਅੱਗ ਹੁੰਦੀ ਏ

ਧੀਏ ਨੀ ਇਹ ਯਾਦ ਰੱਖੀਂ

ਧੀ ਬਾਬਲ ਦੀ ਪੱਗ ਹੁੰਦੀ ਏ

ਚੜ੍ਹਦੀ ਉਮਰ ਅਣਭੋਲ ਹੈ ਹੋਵੇ

ਹੋਏ ਜਜ਼ਬਾਤੀ ਨਬਜ਼ ਨਾ ਟੋਹਵੇ

ਠੱਗ ਲੈਂਦੀ ਆ ਗੱਲਾਂ ‘ਚ ਲੈਕੇ

ਦੁਨੀਆਂ ਚੰਦਰੀ ਠੱਗ ਹੁੰਦੀ ਏ

ਧੀਏ ਨੀ ਇਹ ਯਾਦ ਰੱਖੀਂ

ਧੀ ਬਾਬਲ ਦੀ ਪੱਗ ਹੁੰਦੀ ਏ

ਇਹ ਨਾ ਸੋਚੀਂ ਬੰਧਨ ਲਉਨਾਂ

ਮੈਂ ਤੇ ਤੇਰਾ ਭਲਾ ਹਾਂ ਚਾਹੁੰਨਾ

ਸੋਲਾਂ ਤੋਂ ਲੈ ਬਾਈ ਤਕ ਦੀ

ਉਮਰ ਬੜੀ ਲਾਈ ਲੱਗ ਹੁੰਦੀ ਏ

ਧੀਏ ਨੀ ਇਹ ਯਾਦ ਰੱਖੀਂ

ਧੀ ਬਾਬਲ ਦੀ ਪੱਗ ਹੁੰਦੀ ਏ

‘ਬੋਪਾਰਾਏ’ ਸੱਥ ਵਿੱਚ ਬਹਿਕੇ

ਮਾਣ  ਕਰੇ  ਤੇਰਾ  ਨਾਂ  ਲੈਕੇ

ਬਣਦੀ ਮਾਣ ਹੈ ਮਾਪਿਆਂ ਦਾ

ਧੀ ਜੋ ਸੁੱਘੜ ਸਲੱਗ ਹੁੰਦੀ ਏ

ਧੀਏ ਨੀ ਇਹ ਯਾਦ ਰੱਖੀਂ

ਧੀ ਬਾਬਲ ਦੀ ਪੱਗ ਹੁੰਦੀ ਏ

ਲਿਖਤ : ਭੁਪਿੰਦਰ ਸਿੰਘ ਬੋਪਾਰਾਏ

ਸੰਪਰਕ : 97797-91442