ਮਾਲਦੀਵ : ਮਾਲਦੀਵ ਦੇ ਵਾਵੂ ਅਟੋਲ ਵਿਖੇ ਸਮੁੰਦਰ ਦੇ ਅੰਦਰ ਇੱਕ ਗੁਫਾ ਵਿੱਚ ਪਿਛਲੇ ਹਫ਼ਤੇ ਲਾਪਤਾ ਹੋਏ 5 ਇਤਾਲਵੀ ਗੋਤਾਖੋਰਾਂ ਦੇ ਮਾਮਲੇ ਵਿੱਚ ਮੰਗਲਵਾਰ ਨੂੰ 2 ਹੋਰ ਲਾਸ਼ਾਂ ਬਰਾਮਦ ਕਰ ਲਈਆਂ ਗਈਆਂ ਹਨ। ਇੱਕ ਸਰਕਾਰੀ ਬੁਲਾਰੇ ਅਨੁਸਾਰ ਪਾਣੀ ਦੇ ਅੰਦਰ ਹਾਲਾਤ ਕਾਫੀ ਚੁਣੌਤੀਪੂਰਨ ਸਨ ਕਿਉਂਕਿ ਉੱਥੇ ਪਾਣੀ ਦਾ ਵਹਾਅ ਬਹੁਤ ਤੇਜ਼ ਸੀ ਅਤੇ ਕੁਝ ਵੀ ਸਾਫ ਦਿਖਾਈ ਨਹੀਂ ਦੇ ਰਿਹਾ ਸੀ। ਗੁਫਾ ਦੇ ਬਾਹਰੋਂ ਇਤਾਲਵੀ ਗੋਤਾਖੋਰਾਂ ਦੇ ਇੰਸਟ੍ਰਕਟਰ ਦੀ ਲਾਸ਼ ਪਹਿਲਾਂ ਹੀ ਬਰਾਮਦ ਕਰ ਲਈ ਗਈ ਸੀ ਅਤੇ ਹੁਣ ਬਾਕੀ ਬਚੀਆਂ 2 ਲਾਸ਼ਾਂ ਬੁੱਧਵਾਰ ਨੂੰ ਕੱਢੇ ਜਾਣ ਦੀ ਉਮੀਦ ਹੈ।
ਇਨ੍ਹਾਂ ਲਾਸ਼ਾਂ ਦੀ ਭਾਲ ਸੋਮਵਾਰ ਨੂੰ ਦੁਬਾਰਾ ਸ਼ੁਰੂ ਕੀਤੀ ਗਈ ਸੀ। ਇਸ ਤੋਂ ਪਹਿਲਾਂ ਬਚਾਅ ਕਾਰਜਾਂ ਦੌਰਾਨ ਇੱਕ ਸਥਾਨਕ ਫੌਜੀ ਗੋਤਾਖੋਰ ਦੀ ਮੌਤ ਹੋ ਜਾਣ ਕਾਰਨ ਤਲਾਸ਼ੀ ਮੁਹਿੰਮ ਰੋਕ ਦਿੱਤੀ ਗਈ ਸੀ। ਫੌਜੀ ਗੋਤਾਖੋਰ ਦੀ ਮੌਤ ਦੇ ਅਸਲ ਕਾਰਨਾਂ ਦੀ ਜਾਂਚ ਲਗਾਤਾਰ ਜਾਰੀ ਹੈ, ਪਰ ਸਾਥੀਆਂ ਦਾ ਮੰਨਣਾ ਹੈ ਕਿ ਇਹ ਮੌਤ ਨਾਈਟ੍ਰੋਜਨ ਨਾਰਕੋਸਿਸ ਜਾਂ ਡੀਕੰਪ੍ਰੈਸ਼ਨ ਕਾਰਨ ਹੋ ਸਕਦੀ ਹੈ। ਇਹ ਲਾਸ਼ਾਂ ਲਗਭਗ 60 ਮੀਟਰ ਯਾਨੀ 200 ਫੁੱਟ ਦੀ ਡੂੰਘਾਈ ‘ਤੇ ਮਿਲੀਆਂ ਹਨ ਜੋ ਕਿ ਮਾਲਦੀਵ ਵਿੱਚ ਮਨੋਰੰਜਨ ਲਈ ਕੀਤੀ ਜਾਣ ਵਾਲੀ ਗੋਤਾਖੋਰੀ ਦੀ ਕਾਨੂੰਨੀ ਸੀਮਾ ਤੋਂ ਦੁੱਗਣੀ ਡੂੰਘਾਈ ਹੈ।
ਮਾਲਦੀਵ ਸਰਕਾਰ ਦੇ ਬੁਲਾਰੇ ਅਹਿਮਦ ਸ਼ਾਮ ਨੇ ਦੱਸਿਆ ਕਿ ਬਚਾਅ ਕਾਰਜ ਕਰ ਰਹੇ ਫਿਨਲੈਂਡ ਦੇ ਗੋਤਾਖੋਰਾਂ ਨੇ ਗੁਫਾ ਦੇ ਸਭ ਤੋਂ ਅੰਦਰੂਨੀ ਹਿੱਸੇ ਵਿੱਚ 4 ਲਾਸ਼ਾਂ ਨੂੰ ਇਕੱਠੇ ਦੇਖਿਆ ਸੀ। ਰਾਸ਼ਟਰਪਤੀ ਦੇ ਬੁਲਾਰੇ ਮੁਹੰਮਦ ਹੁਸੈਨ ਸ਼ਰੀਫ ਨੇ ਦੱਸਿਆ ਕਿ ਗੋਤਾਖੋਰਾਂ ਕੋਲ ਪਰਮਿਟ ਤਾਂ ਸੀ ਪਰ ਅਧਿਕਾਰੀਆਂ ਨੂੰ ਇਹ ਨਹੀਂ ਪਤਾ ਸੀ ਕਿ ਉਹ ਅਸਲ ਵਿੱਚ ਕਿਸ ਗੁਫਾ ਵਿੱਚ ਜਾ ਰਹੇ ਹਨ। ਉਨ੍ਹਾਂ ਦੱਸਿਆ ਕਿ ਮਾਰੇ ਗਏ ਲੋਕਾਂ ਵਿੱਚੋਂ 2 ਦੇ ਨਾਮ ਜਮ੍ਹਾਂ ਕਰਵਾਈ ਗਈ ਖੋਜਕਰਤਾਵਾਂ ਦੀ ਸੂਚੀ ਵਿੱਚ ਸ਼ਾਮਲ ਨਹੀਂ ਸਨ ਅਤੇ ਅਧਿਕਾਰੀਆਂ ਨੂੰ ਉਨ੍ਹਾਂ ਦੇ ਮੁਹਿੰਮ ਵਿੱਚ ਸ਼ਾਮਲ ਹੋਣ ਬਾਰੇ ਜਾਣਕਾਰੀ ਨਹੀਂ ਸੀ।
ਮੌਸਮ ਕਾਫੀ ਖਰਾਬ ਸੀ ਅਤੇ ਅਧਿਕਾਰੀਆਂ ਵੱਲੋਂ ਅਲਰਟ ਵੀ ਜਾਰੀ ਕੀਤਾ ਗਿਆ ਸੀ। ਡਾਇਵਰਜ਼ ਅਲਰਟ ਨੈੱਟਵਰਕ ਯੂਰਪ ਵੱਲੋਂ ਭੇਜੇ ਗਏ ਫਿਨਲੈਂਡ ਦੇ ਗੋਤਾਖੋਰ ਤਕਨੀਕੀ ਮਾਹਰ ਹਨ ਅਤੇ ਉਹ ਕਲੋਜ਼ਡ ਸਰਕਟ ਰੀਬ੍ਰੀਦਰਜ਼ ਦੀ ਵਰਤੋਂ ਕਰ ਰਹੇ ਹਨ। ਇਹ ਸਿਸਟਮ ਸਾਹ ਰਾਹੀਂ ਬਾਹਰ ਕੱਢੀ ਗੈਸ ਨੂੰ ਰੀਸਾਈਕਲ ਕਰਦਾ ਹੈ ਜਿਸ ਨਾਲ ਗੋਤਾਖੋਰਾਂ ਨੂੰ ਪਾਣੀ ਦੇ ਅੰਦਰ ਲੰਬਾ ਸਮਾਂ ਬਿਤਾਉਣ ਵਿੱਚ ਮਦਦ ਮਿਲਦੀ ਹੈ।
ਮਾਲਦੀਵ ਦੀ ਪਾਣੀ ਵਾਲੀ ਗੁਫਾ ’ਚੋਂ 2 ਫਿਨਲੈਂਡ ਗੋਤਾਖੋਰਾਂ ਦੀਆਂ ਲਾਸ਼ਾਂ ਬਰਾਮਦ
