ਗ੍ਰੈਂਡਵਿਊ ਕੱਟ ਦੀ ਖੱਡ ਵਿੱਚ ਹਾਦਸਿਆਂ ਦਾ ਸਿਲਸਿਲਾ ਜਾਰੀ, 10 ਲੋਕ ਜ਼ਖਮੀ ਅਤੇ 5 ਦੀ ਗਈ ਜਾਨ

ਸਰੀ, (ਏਕਜੋਤ ਿਸੰਘ): ਵੈਨਕੂਵਰ ਫਾਇਰ ਰੈਸਕਿਊ ਸਰਵਿਸਿਜ਼ ਵੱਲੋਂ ਜਾਰੀ ਕੀਤੇ ਗਏ ਨਵੇਂ ਅਤੇ ਹੈਰਾਨੀਜਨਕ ਅੰਕੜਿਆਂ ਮੁਤਾਬਕ, ਈਸਟ ਵੈਨਕੂਵਰ ਵਿੱਚ ਸਥਿਤ ਇੱਕ ਖ਼ਤਰਨਾਕ ਅਤੇ ਡੂੰਘੀ ਖੱਡ (ਐਮਬੈਂਕਮੈਂਟ) ਵਿੱਚ ਡਿੱਗਣ ਕਾਰਨ ਪਿਛਲੇ 10 ਸਾਲਾਂ ਦੌਰਾਨ 5 ਲੋਕਾਂ ਦੀ ਮੌਤ ਹੋ ਚੁੱਕੀ ਹੈ, ਜਦੋਂ ਕਿ 10 ਹੋਰ ਗੰਭੀਰ ਰੂਪ ਵਿੱਚ ਜ਼ਖਮੀ ਹੋਏ ਹਨ। ਇਹ ਸਾਰੇ ਹਾਦਸੇ ‘ਗ੍ਰੈਂਡਵਿਊ ਕੱਟ’ (Grandview Cut) ਦੇ ਇੱਕ ਹਿੱਸੇ ਵਿੱਚ ਵਾਪਰੇ ਹਨ, ਜੋ ਰੇਲ ਦੀਆਂ ਪਟੜੀਆਂ ਲੰਘਾਉਣ ਲਈ ਬਣਾਇਆ ਗਿਆ ਇੱਕ ਮਨੁੱਖੀ ਨਿਰਮਿਤ ਖੱਡ ਵਾਲਾ ਖੇਤਰ ਹੈ। ਇਹ ਸਥਾਨ ਕਮਰਸ਼ੀਅਲ-ਬ੍ਰਾਡਵੇਅ ਸਕਾਈਟ੍ਰੇਨ ਸਟੇਸ਼ਨ ਦੇ ਬਿਲਕੁਲ ਨੇੜੇ ਸਥਿਤ ਹੈ ਅਤੇ ਇਸ ਦੇ ਆਲੇ-ਦੁਆਲੇ ਲੋਹੇ ਦੀ ਜਾਲੀ ਵਾਲੀ ਵਾੜ ਲਗਾਈ ਗਈ ਹੈ।
ਸਥਾਨਕ ਨਿਵਾਸੀਆਂ ਅਤੇ ਪ੍ਰਸ਼ਾਸਨਿਕ ਅਧਿਕਾਰੀਆਂ ਦਾ ਕਹਿਣਾ ਹੈ ਕਿ ਇਸ ਖ਼ਤਰਨਾਕ ਖੇਤਰ ਵਿੱਚ ਲੋਕਾਂ ਦੇ ਪ੍ਰਵੇਸ਼ ਨੂੰ ਰੋਕਣ ਅਤੇ ਉਨ੍ਹਾਂ ਦੀ ਸੁਰੱਖਿਆ ਯਕੀਨੀ ਬਣਾਉਣ ਲਈ ਹੋਰ ਸਖ਼ਤ ਕਦਮ ਚੁੱਕਣ ਦੀ ਤੁਰੰਤ ਲੋੜ ਹੈ। ਵੈਨਕੂਵਰ ਪਾਰਕ ਬੋਰਡ ਦੀ ਕਮਿਸ਼ਨਰ ਲੌਰਾ ਕ੍ਰਿਸਟਨਸਨ, ਜੋ ਖੁਦ ਇਸ ਇਲਾਕੇ ਵਿੱਚ ਲੰਬਾ ਸਮਾਂ ਰਹਿ ਚੁੱਕੀ ਹੈ, ਨੇ ਦੱਸਿਆ ਕਿ ਉਹ ਅਕਸਰ ਵਾੜ ਦੇ ਦੂਜੇ ਪਾਸੇ ਬਿਲਕੁਲ ਖੱਡ ਦੇ ਕਿਨਾਰੇ ਲੋਕਾਂ ਨੂੰ ਟੈਂਟ ਲਗਾ ਕੇ ਰਹਿੰਦੇ ਜਾਂ ਆਪਣਾ ਸਾਮਾਨ ਸਟੋਰ ਕਰਦੇ ਦੇਖਦੀ ਸੀ। ਇੰਨੀ ਡੂੰਘੀ ਖੱਡ ਦੇ ਕਿਨਾਰੇ ਲੋਕਾਂ ਨੂੰ ਬੈਠੇ ਦੇਖਣਾ ਹਮੇਸ਼ਾ ਚਿੰਤਾਜਨਕ ਅਤੇ ਡਰਾਉਣਾ ਹੁੰਦਾ ਸੀ।
ਉਨ੍ਹਾਂ ਦੱਸਿਆ ਕਿ ਕਈ ਵਾਰ ਲੋਕਾਂ ਨੂੰ ਬਚਾਉਣ ਲਈ ਐਮਰਜੈਂਸੀ ਟੀਮਾਂ ਨੂੰ ਮੁਸ਼ਕਿਲ ਰੈਸਕਿਊ ਆਪ੍ਰੇਸ਼ਨ ਚਲਾਉਣੇ ਪੈਂਦੇ ਸਨ। ਨੇੜੇ ਹੀ ਕੰਮ ਕਰਨ ਵਾਲੀ ਰਾਸ਼ੇਲ ਫੌਕਸ ਨੇ ਵੀ ਕਿਹਾ ਕਿ ਇਹ ਖੇਤਰ ਅਕਸਰ ਬੇਘਰ ਅਤੇ ਆਰਥਿਕ ਤੌਰ ‘ਤੇ ਕਮਜ਼ੋਰ ਲੋਕਾਂ ਦੇ ਇਕੱਠੇ ਹੋਣ ਦਾ ਕੇਂਦਰ ਬਣ ਗਿਆ ਹੈ, ਜੋ ਕਈ ਵਾਰ ਮਾਨਸਿਕ ਤੌਰ ‘ਤੇ ਅਜਿਹੀਆਂ ਖ਼ਤਰਨਾਕ ਥਾਵਾਂ ਦੇ ਨੇੜੇ ਰਹਿਣ ਲਈ ਸੁਚੇਤ ਨਹੀਂ ਹੁੰਦੇ। ਲੰਘੀ ਗਰਮੀਆਂ ਵਿੱਚ ਵੀ ਇੱਥੇ ਇੱਕ ਵਿਅਕਤੀ ਦੀ ਡਿੱਗਣ ਕਾਰਨ ਮੌਤ ਹੋ ਗਈ ਸੀ, ਜਦੋਂ ਕਿ ਦੂਜੇ ਨੂੰ ਸੁਰੱਖਿਅਤ ਬਚਾਇਆ ਗਿਆ ਸੀ। ਸਭ ਤੋਂ ਚਿੰਤਾਜਨਕ ਗੱਲ ਇਹ ਹੈ ਕਿ ਸੁਰੱਖਿਆ ਲਈ ਲਗਾਈ ਗਈ ਜਾਲੀਦਾਰ ਵਾੜ ਵਿੱਚ ਅਕਸਰ ਲੋਕਾਂ ਦੁਆਰਾ ਮੋਰੀਆਂ ਕਰ ਦਿੱਤੀਆਂ ਜਾਂਦੀਆਂ ਹਨ, ਜਿਸ ਕਾਰਨ ਬੱਚਿਆਂ ਦੇ ਉੱਥੇ ਜਾਣ ਦਾ ਖ਼ਤਰਾ ਬਣਿਆ ਰਹਿੰਦਾ ਹੈ।
ਇਸ ਇਲਾਕੇ ਦੀ ਜ਼ਿੰਮੇਵਾਰੀ ਨੂੰ ਲੈ ਕੇ ਕਈ ਵਿਭਾਗਾਂ ਵਿੱਚ ਭੰਬਲਭੂਸਾ ਬਣਿਆ ਹੋਇਆ ਹੈ। ਇਹ ਖੱਡ 1912 ਵਿੱਚ ਗ੍ਰੇਟ ਨੌਰਦਰਨ ਰੇਲਵੇ ਦੁਆਰਾ ਬਣਾਈ ਗਈ ਸੀ। ‘ਬਰਲਿੰਗਟਨ ਨੌਰਦਰਨ ਸਾਂਤਾ ਫੇ ਰੇਲਵੇ’ (BNSF) ਨੇ ਪੁਸ਼ਟੀ ਕੀਤੀ ਹੈ ਕਿ ਉਹ ਸਿਰਫ਼ ਰੇਲ ਪਟੜੀਆਂ ਅਤੇ ਉਸ ਦੇ ਆਲੇ-ਦੁਆਲੇ ਦੇ 25 ਫੁੱਟ ਹਿੱਸੇ ਦੇ ਮਾਲਕ ਹਨ, ਜਦੋਂ ਕਿ ਖੱਡ ਦੀਆਂ ਉੱਪਰਲੀਆਂ ਕੰਧਾਂ ਵੈਨਕੂਵਰ ਸ਼ਹਿਰ ਦੇ ਅਧੀਨ ਆਉਂਦੀਆਂ ਹਨ। ਟ੍ਰਾਂਸਲਿੰਕ ਸੰਸਥਾ ਸਕਾਈਟ੍ਰੇਨ ਨਾਲ ਸਬੰਧਤ ਹਿੱਸੇ ਦੀ ਦੇਖਭਾਲ ਕਰਦੀ ਹੈ। ਰੇਲਵੇ ਕਾਨੂੰਨ ਮੁਤਾਬਕ ਰੇਲਵੇ ਲਾਈਨਾਂ ਦੇ ਨੇੜੇ ਗੈਰ-ਕਾਨੂੰਨੀ ਪ੍ਰਵੇਸ਼ ਕਰਨ ‘ਤੇ 500 ਡਾਲਰ ਜੁਰਮਾਨਾ ਹੋ ਸਕਦਾ ਹੈ। ਸ਼ਹਿਰ ਦੇ ਪ੍ਰਸ਼ਾਸਨ ਨੇ ਲੋਕਾਂ ਨੂੰ ਅਜਿਹੇ ਸ਼ੱਕੀ ਵਿਅਕਤੀਆਂ ਨੂੰ ਦੇਖਣ ‘ਤੇ ਤੁਰੰਤ ਪੁਲਿਸ ਨੂੰ ਸੂਚਿਤ ਕਰਨ ਲਈ ਕਹਾ ਹੈ। This report was written by Ekjot Singh as part of the Local Journalism Initiative.