ਵੈਨਕੂਵਰ ਵਿੱਚ ਪਾਰਕਿੰਗ ਫੀਸ ਭਰਨੀ ਹੋਈ ਹੋਰ ਵੀ ਸੁਖਾਲੀ, ‘ਹੌਟਸਪੌਟ’ ਐਪ ਦੀ ਹੋਈ ਸ਼ੁਰੂਆਤ

ਵੈਨਕੂਵਰ, (ਏਕਜੋਤ ਿਸੰਘ): ਵੈਨਕੂਵਰ ਸ਼ਹਿਰ ਵਿੱਚ ਸੜਕ ਕਿਨਾਰੇ ਪਾਰਕਿੰਗ ਦੀ ਫੀਸ ਭਰਨ ਵਾਲੇ ਡਰਾਈਵਰਾਂ ਨੂੰ ਹੁਣ ਇੱਕ ਹੋਰ ਨਵਾਂ ਅਤੇ ਸੁਖਾਲਾ ਮੋਬਾਈਲ ਵਿਕਲਪ ਮਿਲ ਗਿਆ ਹੈ। ਸ਼ਹਿਰ ਪ੍ਰਸ਼ਾਸਨ ਨੇ ਮੌਜੂਦਾ ‘ਪੇਅ-ਬਾਏ-ਫੋਨ’ (PayByPhone) ਐਪ ਦੇ ਨਾਲ ਹੁਣ ‘ਹੌਟਸਪੌਟ’ (HotSpot) ਐਪ ਨੂੰ ਵੀ ਰਸਮੀ ਤੌਰ ‘ਤੇ ਮਨਜ਼ੂਰੀ ਦੇ ਦਿੱਤੀ ਹੈ। ਇਸ ਅਹਿਮ ਕਦਮ ਦਾ ਮੁੱਖ ਮਕਸਦ ਲੋਕਾਂ ਨੂੰ ਭੁਗਤਾਨ ਦੇ ਵਧੇਰੇ ਵਿਕਲਪ ਪ੍ਰਦਾਨ ਕਰਨਾ ਹੈ ਅਤੇ ਇਹ ਯਕੀਨੀ ਬਣਾਉਣਾ ਹੈ ਕਿ ਜੇਕਰ ਕਦੇ ਇੱਕ ਐਪ ਵਿੱਚ ਕੋਈ ਤਕਨੀਕੀ ਖਰਾਬੀ ਆਉਂਦੀ ਹੈ, ਤਾਂ ਦੂਜੀ ਐਪ ਰਾਹੀਂ ਸੇਵਾਵਾਂ ਨਿਰੰਤਰ ਜਾਰੀ ਰਹਿ ਸਕਣ। ਸ਼ਹਿਰ ਭਰ ਵਿੱਚ ਵੱਖ-ਵੱਖ ਥਾਵਾਂ ‘ਤੇ ਹੌਟਸਪੌਟ ਲੋਗੋ ਵਾਲੇ ਨਵੇਂ ਬੋਰਡ ਅਤੇ ਚਿੰਨ੍ਹ ਲਗਾਏ ਜਾ ਰਹੇ ਹਨ ਤਾਂ ਜੋ ਲੋਕਾਂ ਨੂੰ ਇਸ ਨਵੀਂ ਸਹੂਲਤ ਬਾਰੇ ਜਾਣਕਾਰੀ ਮਿਲ ਸਕੇ। ਖਾਸ ਗੱਲ ਇਹ ਹੈ ਕਿ ਇਹ ਨਵੀਂ ਐਪ ਪਾਰਕਿੰਗ ਲਈ ਉਸੇ ਪੰਜ ਅੰਕਾਂ ਵਾਲੇ ਲੋਕੇਸ਼ਨ ਕੋਡ ਦੀ ਵਰਤੋਂ ਕਰੇਗੀ ਜੋ ਪਹਿਲਾਂ ਹੀ ਪੇਅ-ਬਾਏ-ਫੋਨ ਲਈ ਵਰਤਿਆ ਜਾ ਰਿਹਾ ਹੈ। ਇਸ ਤੋਂ ਇਲਾਵਾ, ਰਿਹਾਇਸ਼ੀ ਅਤੇ ਸੈਲਾਨੀ ਪਾਰਕਿੰਗ ਸਟੇਸ਼ਨਾਂ ‘ਤੇ ਆਪਣੇ ਕ੍ਰੈਡਿਟ ਅਤੇ ਡੈਬਿਟ ਕਾਰਡ ਰਾਹੀਂ ਵੀ ਅਦਾਇਗੀ ਕਰਨਾ ਪਹਿਲਾਂ ਵਾਂਗ ਜਾਰੀ ਰੱਖ ਸਕਦੇ ਹਨ। ਪੇਅ-ਬਾਏ-ਫੋਨ ਵਾਂਗ ਹੌਟਸਪੌਟ ਐਪ ਦੀ ਵਰਤੋਂ ਕਰਨ ਲਈ ਵੀ ਵਰਤੋਂਕਾਰਾਂ ਤੋਂ ਕੋਈ ਵਾਧੂ ਫੀਸ ਨਹੀਂ ਲਈ ਜਾਵੇਗੀ। ਇਸ ਐਪ ਰਾਹੀਂ ਲੋਕਾਂ ਨੂੰ ਐੱਸ.ਐੱਮ.ਐੱਸ. ਰਾਹੀਂ ਮੁਫ਼ਤ ਨੋਟੀਫਿਕੇਸ਼ਨ ਅਤੇ ਪਾਰਕਿੰਗ ਸਮਾਂ ਖਤਮ ਹੋਣ ਦੇ ਰਿਮਾਈਂਡਰ ਵੀ ਮਿਲਣਗੇ। ਪ੍ਰਸ਼ਾਸਨ ਨੇ ਇੱਕ ਅਹਿਮ ਸਾਵਧਾਨੀ ਵਰਤਦਿਆਂ ਸਪੱਸ਼ਟ ਕੀਤਾ ਹੈ ਕਿ ਸ਼ਹਿਰ ਵੱਲੋਂ ਪਾਰਕਿੰਗ ਭੁਗਤਾਨ ਲਈ ਕਿਸੇ ਵੀ ਤਰ੍ਹਾਂ ਦੇ ਕਿਊ.ਆਰ. (QR) ਕੋਡ ਦੀ ਵਰਤੋਂ ਨਹੀਂ ਕੀਤੀ ਜਾਂਦੀ, ਇਸ ਲਈ ਲੋਕਾਂ ਨੂੰ ਕਿਸੇ ਵੀ ਧੋਖਾਧੜੀ ਤੋਂ ਬਚਣ ਲਈ ਸਾਵਧਾਨ ਰਹਿਣਾ ਚਾਹੀਦਾ ਹੈ। ਇਹ ਪੂਰੀ ਪਹਿਲਕਦਮੀ ਵੈਨਕੂਵਰ ਦੇ ਪਾਰਕਿੰਗ ਬੁਨਿਆਦੀ ਢਾਂਚੇ ਨੂੰ ਆਧੁਨਿਕ ਬਣਾਉਣ ਅਤੇ ਗਾਹਕ ਸੇਵਾ ਨੂੰ ਬਿਹਤਰ ਬਣਾਉਣ ਦੇ ਟੀਚੇ ਦਾ ਹਿੱਸਾ ਹੈ। ਸਾਲ 2024 ਵਿੱਚ ਸ਼ਹਿਰ ਨੇ ਪੂਰੇ ਇਲਾਕੇ ਵਿੱਚ ਲੱਗੇ 7,000 ਪੁਰਾਣੇ ਪਾਰਕਿੰਗ ਮੀਟਰਾਂ ਨੂੰ ਬਦਲ ਕੇ ਨਵੇਂ ਪੇਅ ਸਟੇਸ਼ਨ ਲਗਾਉਣ ਦਾ ਕੰਮ ਸ਼ੁਰੂ ਕੀਤਾ ਸੀ। ਜ਼ਿਕਰਯੋਗ ਹੈ ਕਿ ਹੌਟਸਪੌਟ ਐਪ ਪਹਿਲਾਂ ਹੀ ਸਰੀ, ਨਾਨਾਈਮੋ, ਐਡਮੰਟਨ ਅਤੇ ਹੈਲੀਫੈਕਸ ਵਰਗੇ ਕਈ ਕੈਨੇਡੀਅਨ ਸ਼ਹਿਰਾਂ ਵਿੱਚ ਸਫ਼ਲਤਾਪੂਰਵਕ ਚੱਲ ਰਹੀ ਹੈ। This report was written by Ekjot Singh as part of the Local Journalism Initiative.