ਸਰੀ ਵਿੱਚ 230 ਰੈਂਟਲ ਯੂਨਿਟਾਂ ਵਾਲੇ 24 ਮੰਜ਼ਿਲਾ ਵਾਲੇ ਟਾਵਰ ਨੂੰ ਮਿਲੀ ਮਨਜ਼ੂਰੀ

ਸਰੀ, (ਏਕਜੋਤ ਸਿੰਘ): ਸਰੀ ਸਿਟੀ ਕੌਂਸਲ ਨੇ ਬੀਤੇ ਦਿਨੀਂ ਸਿਟੀ ਹਾਲ ਵਿੱਚ ਹੋਈ ਪਬਲਿਕ ਹਿਅਰਿੰਗ ਤੋਂ ਬਾਅਦ ਡਾਊਨਟਾਊਨ ਵਿੱਚ 24 ਮੰਜ਼ਿਲਾ ਰੈਂਟਲ ਟਾਵਰ ਬਣਾਉਣ ਦੇ ਪ੍ਰਸਤਾਵ ਨੂੰ ਥਰਡ ਰੀਡਿੰਗ ਤੇ ਮਨਜ਼ੂਰੀ ਦਿੱਤੀ ਹੈ। ਇਹ ਟਾਵਰ ਪ੍ਰੋਵਿੰਸ਼ੀਅਲ ਰੈਂਟਲ ਹਾਊਸਿੰਗ ਕਾਰਪੋਰੇਸ਼ਨ ਵੱਲੋਂ ਬਣਾਇਆ ਜਾਵੇਗਾ ਤੇ ਇਸ ਵਿੱਚ 230 ਰੈਂਟਲ ਯੂਨਿਟਾਂ ਹੋਣਗੀਆਂ। ਟਾਵਰ 104 ਐਵੇਨਿਊ ਤੇ 132 ਸਟ੍ਰੀਟ ਦੇ ਸਾਊਥਈਸਟ ਕਾਰਨਰ ਤੇ ਬਣੇਗਾ, ਜਿੱਥੇ ਪਹਿਲਾਂ ਇੱਕ ਗੈਸ ਸਟੇਸ਼ਨ ਸੀ ਤੇ ਹੁਣ ਖਾਲੀ ਜ਼ਮੀਨ ਹੈ। ਟਾਵਰ ਹੇਠਾਂ ਤਿੰਨ ਮੰਜ਼ਿਲਾਂ ਅੰਡਰਗ੍ਰਾਊਂਡ ਪਾਰਕਿੰਗ ਹੋਵੇਗੀ।
ਸਿਟੀ ਪਲੈਨਿੰਗ ਰਿਪੋਰਟ ਮੁਤਾਬਕ ਕੁਝ ਯੂਨਿਟਾਂ ਬਿਲੋ-ਮਾਰਕੀਟ ਰੈਂਟ ਵਾਲੀਆਂ ਹੋਣਗੀਆਂ। ਸਰੀ ਸਕੂਲ ਡਿਸਟ੍ਰਿਕਟ ਦੀ ਰਿਪੋਰਟ ਅਨੁਸਾਰ ਇੱਥੇ ਲਗਭਗ 20 ਸਕੂਲ ਜਾਣ ਵਾਲੇ ਬੱਚੇ ਰਹਿਣਗੇ, ਜਿਨ੍ਹਾਂ ਵਿੱਚੋਂ 12 ਓਲਡ ਯੇਲ ਰੋਡ ਐਲੀਮੈਂਟਰੀ, ਪੰਜ ਕਵਾਂਟਲੈਨ ਪਾਰਕ ਸੈਕੰਡਰੀ ਤੇ ਬਾਕੀ ਪ੍ਰਾਈਵੇਟ ਸਕੂਲਾਂ, ਹੋਮ ਸਕੂਲਿੰਗ ਜਾਂ ਹੋਰ ਡਿਸਟ੍ਰਿਕਟ ਵਿੱਚ ਪੜ੍ਹਨਗੇ।
ਪਲੈਨਿੰਗ ਤੇ ਡਿਵੈਲਪਮੈਂਟ ਦੇ ਜਨਰਲ ਮੈਨੇਜਰ ਰੌਨ ਗਿਲ ਦੀ ਰਿਪੋਰਟ ਵਿੱਚ ਕਿਹਾ ਗਿਆ ਹੈ ਕਿ ਜੇਕਰ ਪ੍ਰੋਜੈਕਟ ਮਨਜ਼ੂਰ ਹੋਇਆ ਤਾਂ ਇਹ ਪਰਪਜ਼-ਬਿਲਟ ਰੈਂਟਲ ਹਾਊਸਿੰਗ ਨੂੰ ਬਚਾਏਗਾ ਕਿਉਂਕਿ ਲਗਭਗ 500 ਮੀਟਰ ਦੂਰ ਮੇਫਲਾਵਰ ਹਾਊਸਿੰਗ ਕੋ-ਆਪ ਦੇ ਪੁਰਾਣੇ ਘਰਾਂ ਵਿੱਚ ਰਹਿਣ ਵਾਲੇ ਨਿਵਾਸੀਆਂ ਨੂੰ ਨਵੇਂ ਘਰ ਮਿਲਣਗੇ।
ਪਬਲਿਕ ਹਿਅਰਿੰਗ ਵਿੱਚ ਸਰੀ ਇਨਵਾਇਰਨਮੈਂਟਲ ਪਾਰਟਨਰਜ਼ ਦੀ ਡੈਬ ਜੈੱਕ ਨੇ ਕਿਹਾ ਕਿ ਸਾਈਟ ਤੇ ਖੁਦ ਰੁੱਖ ਨਹੀਂ ਹਨ ਪਰ ਪਲੈਨ ਵਿੱਚ ਅੱਠ ਬੁਲੇਵਾਰਡ ਰੁੱਖਾਂ ਵਿੱਚੋਂ ਪੰਜ ਨੂੰ ਕੱਟਣ ਦਾ ਪ੍ਰਸਤਾਵ ਹੈ। ਉਨ੍ਹਾਂ ਨੇ ਨੋਟ ਕੀਤਾ ਕਿ ਇਹ ਰੁੱਖ ਪਬਲਿਕ ਪ੍ਰੌਪਰਟੀ ਹਨ ਤੇ ਉਨ੍ਹਾਂ ਨੂੰ ਪ੍ਰਾਈਵੇਟ ਰੁੱਖਾਂ ਵਾਂਗ ਵੈਲਿਊ ਨਹੀਂ ਦਿੱਤੀ ਜਾਂਦੀ। ਉਨ੍ਹਾਂ ਨੇ ਸੁਝਾਅ ਦਿੱਤਾ ਕਿ ਸਿਟੀ ਹਾਲ ਨੂੰ ਇਨ੍ਹਾਂ ਰੁੱਖਾਂ ਨੂੰ ਪ੍ਰਾਈਵੇਟ ਰੁੱਖਾਂ ਨਾਲੋਂ ਤਿੰਨ ਗੁਣਾ ਵੈਲਿਊ ਦੇਣੀ ਚਾਹੀਦੀ ਹੈ , ਯਾਨੀ 550 ਡਾਲਰ ਪ੍ਰਤੀ ਰੁੱਖ ਦੀ ਬਜਾਏ 1,650 ਡਾਲਰ।
ਬੀਸੀ ਹਾਊਸਿੰਗ ਦੀ ਨੁਮਾਇੰਦੇ ਵੈਨੇਸਾ ਵੌਂਗ ਨੇ ਕੌਂਸਲ ਨੂੰ ਦੱਸਿਆ ਕਿ ਮੇਫਲਾਵਰ ਵਿੱਚ ਰਹਿਣ ਵਾਲੇ 92 ਨਿਵਾਸੀਆਂ ਦਾ ਕੋਈ ਠਿਕਾਣਾ ਨਹੀਂ ਰਹੇਗਾ ਜੇਕਰ ਪ੍ਰੋਜੈਕਟ ਨਾ ਮਨਜ਼ੂਰ ਹੋਇਆ। ਉਨ੍ਹਾਂ ਨੇ ਸਰੀ ਦੀ 2025 ਹਾਊਸਿੰਗ ਨੀਡਜ਼ ਰਿਪੋਰਟ ਦਾ ਹਵਾਲਾ ਦਿੱਤਾ ਜਿਸ ਵਿੱਚ ਅਗਲੇ ਪੰਜ ਸਾਲਾਂ ਵਿੱਚ 53,000 ਤੋਂ ਵੱਧ ਨਵੇਂ ਘਰਾਂ ਦੀ ਲੋੜ ਦੱਸੀ ਗਈ ਹੈ। ਵ੍ਹੈਲੀ, ਜਿਸ ਵਿੱਚ ਸਿਟੀ ਸੈਂਟਰ ਵੀ ਸ਼ਾਮਲ ਹੈ, ਘੱਟ ਆਮਦਨ ਵਾਲੇ ਪਰਿਵਾਰਾਂ ਤੇ ਰੈਂਟਰਾਂ ਦੀ ਸਭ ਤੋਂ ਵੱਧ ਗਿਣਤੀ ਵਾਲੇ ਤਿੰਨ ਇਲਾਕਿਆਂ ਵਿੱਚੋਂ ਇੱਕ ਹੈ।
ਇਹ ਪ੍ਰੋਜੈਕਟ ਸਰੀ ਵਿੱਚ ਅਫੋਰਡੇਬਲ ਹਾਊਸਿੰਗ ਦੀ ਵੱਧਦੀ ਲੋੜ ਨੂੰ ਪੂਰਾ ਕਰਨ ਵਾਲਾ ਮੰਨਿਆ ਜਾ ਰਿਹਾ ਹੈ। ਪੁਰਾਣੇ ਮੇਫਲਾਵਰ ਕੋ-ਆਪ ਨੂੰ ਬਦਲਣ ਨਾਲ ਨਿਵਾਸੀਆਂ ਨੂੰ ਨਵੇਂ ਘਰ ਮਿਲਣਗੇ ਤੇ ਸ਼ਹਿਰ ਵਿੱਚ ਨਵੀਂ ਰੈਂਟਲ ਹਾਊਸਿੰਗ ਵਧੇਗੀ।
ਪ੍ਰੋਜੈਕਟ ਨੂੰ ਅੰਤਿਮ ਮਨਜ਼ੂਰੀ ਤੋਂ ਪਹਿਲਾਂ ਹੋਰ ਪੜਾਵਾਂ ਤੋਂ ਗੁਜ਼ਰਨਾ ਪਵੇਗਾ, ਪਰ ਥਰਡ ਰੀਡਿੰਗ ਤੇ ਪਾਸ ਹੋਣ ਨਾਲ ਇਸ ਨੂੰ ਵੱਡੀ ਸਫਲਤਾ ਮੰਨਿਆ ਜਾ ਰਿਹਾ ਹੈ। ਸਰੀ ਵਿੱਚ ਹਾਊਸਿੰਗ ਕ੍ਰਾਈਸਿਸ ਨੂੰ ਵੇਖਦਿਆਂ ਅਜਿਹੇ ਪ੍ਰੋਜੈਕਟਾਂ ਨੂੰ ਜ਼ਰੂਰੀ ਦੱਸਿਆ ਜਾ ਰਿਹਾ ਹੈ। This report was written by Ekjot Singh as part of the Local Journalism Initiative.