ਔਟਵਾ : ਕੈਨੇਡਾ ਦੇ ਨਵੇਂ ਪ੍ਰਧਾਨ ਮੰਤਰੀ ਮਾਰਕ ਕਾਰਨੀ ਨੇ ਆਪਣੀ ਨਵ-ਨਿਯੁਕਤ ਕੈਬਿਨੇਟ ਨਾਲ ਬੁੱਧਵਾਰ ਨੂੰ ਪਾਰਲੀਮੈਂਟ ਹਿੱਲ ਵਿਖੇ ਪਹਿਲੀ ਅਧਿਕਾਰਕ ਬੈਠਕ ਕੀਤੀ। ਇਹ ਮੀਟਿੰਗ ਇੱਕ ਅਹਿਮ ਮੌਕੇ ‘ਤੇ ਹੋਈ ਜਦੋਂ ਨਵੀਂ ਸਰਕਾਰ ਕੋਲ ਕਈ ਵੱਡੀਆਂ ਚੁਣੌਤੀਆਂ ਹਨ, ਜਿਵੇਂ ਕਿ ਈਵੀ (ਇਲੈਕਟ੍ਰਿਕ ਵਾਹਨ) ਪ੍ਰੋਜੈਕਟਾਂ ਵਿੱਚ ਆ ਰਹੀਆਂ ਰੁਕਾਵਟਾਂ, ਪੱਛਮ ਕੈਨੇਡਾ ਵਿੱਚ ਵਧ ਰਹੀ ਵੱਖਵਾਦੀ ਸੋਚ ਅਤੇ ਅਮਰੀਕੀ ਰਾਜਨੀਤਿਕ ਦਬਾਵਾਂ। ਕਾਰਨੀ ਨੇ ਕਿਹਾ ਕਿ ਕੈਬਿਨੇਟ ਦੀ ਸਭ ਤੋਂ ਪਹਿਲੀ ਤਰਜੀਹ ਰਹਿਣ-ਸਹਿਣ ਦੀ ਲਾਗਤ ਸੰਬੰਧੀ ਚਿੰਤਾਵਾਂ ਨੂੰ ਹੱਲ ਕਰਨੀ ਹੈ। ਇਸ ਦ੍ਰਿਸ਼ਟੀਕੋਣ ਨਾਲ, ਉਨ੍ਹਾਂ ਨੇ ਵਿੱਤ ਮੰਤਰੀ ਫ਼੍ਰੈਸੁਆ-ਫਿਲਿਪ ਸ਼ੈਂਪੇਨ ਨੂੰ ਮੱਧ-ਸ਼੍ਰੇਣੀ ਦੇ ਟੈਕਸ ਵਿੱਚ ਕਟੌਤੀ ਕਰਨ ਲਈ ਤੁਰੰਤ ਕਾਨੂੰਨੀ ਪ੍ਰਕਿਰਿਆ ਦੀ ਸ਼ੁਰੂਆਤ ਕਰਨ ਲਈ ਕਿਹਾ। ਸਰਕਾਰ ਮੁਤਾਬਕ, ਇਹ ਕਟੌਤੀ ਦੋ ਆਮਦਨ ਵਾਲੇ ਪਰਿਵਾਰਾਂ ਲਈ ਸਾਲਾਨਾ $825 ਦੀ ਬਚਤ ਲਿਆ ਸਕਦੀ ਹੈ। ਵਿੱਤ ਮੰਤਰੀ ਸ਼ੈਂਪੇਨ ਨੇ ਪੁਸ਼ਟੀ ਕੀਤੀ ਕਿ ਇਹ ਟੈਕਸ ਕਟੌਤੀ ਬਾਬਤ ਕਾਨੂੰਨ ਪਾਰਲੀਮੈਂਟ ਦੀ ਕਾਰਵਾਈ ਮੁੜ ਸ਼ੁਰੂ ਹੋਣ ‘ਤੇ, ਇਸ ਮਹੀਨੇ ਦੇ ਅੰਤ ਵਿੱਚ ਪੇਸ਼ ਕੀਤਾ ਜਾਵੇਗਾ। ਉਨ੍ਹਾਂ ਨੇ ਇਹ ਵੀ ਦੱਸਿਆ ਕਿ ਹੋਰ ਅਹਿਮ ਪਹਿਲਕਦਮੀਆਂ ਦੀ ਜਾਣਕਾਰੀ ਥ੍ਰੋਨ ਸਪੀਚ ਰਾਹੀਂ ਦਿੱਤੀ ਜਾਵੇਗੀ, ਪਰ ਨਵਾਂ ਬਜਟ ਇਸ ਫੌਲ ਸੀਜ਼ਨ ਤੋਂ ਪਹਿਲਾਂ ਪੇਸ਼ ਨਹੀਂ ਹੋਏਗਾ। ਇਸ ਦੇ ਇਲਾਵਾ, ਪਿਛਲੀ ਸਰਕਾਰ ਦੀ ਇਲੈਕਟ੍ਰਿਕ ਵਾਹਨ ਨੀਤੀ ਵੀ ਖਤਰੇ ‘ਚ ਦਿਖ ਰਹੀ ਹੈ। ਹੌਂਡਾ ਵੱਲੋਂ ਕੈਨੇਡਾ ਵਿਚ ਇਕ ਵੱਡਾ ਓੜ ਨਿਵੇਸ਼ ਰੋਕ ਦਿੱਤਾ ਗਿਆ ਹੈ। ਟਰੰਪ ਦੇ ਸੰਭਾਵਿਤ ਵਾਪਸੀ ਨਾਲ ਵਿਦੇਸ਼ੀ ਓੜ ਵਾਹਨਾਂ ‘ਤੇ ਲਗਣ ਵਾਲੇ ਟੈਰਿਫਾਂ ਨੇ ਮੌਜੂਦਾ ਅਤੇ ਭਵਿੱਖ ਦੇ ਓੜ ਪ੍ਰੋਜੈਕਟਾਂ ਬਾਰੇ ਗੰਭੀਰ ਅਨਿਸ਼ਚਿਤਤਾ ਪੈਦਾ ਕਰ ਦਿੱਤੀ ਹੈ। ਨਵੀਂ ਸਰਕਾਰ ਲਈ ਇਹ ਬੈਠਕ ਇੱਕ ਨਵੀਂ ਦਿਸ਼ਾ ਦੀ ਸ਼ੁਰੂਆਤ ਸੀ, ਜਿਸ ‘ਚ ਆਮ ਲੋਕਾਂ ਦੀ ਮਾਲੀ ਹਾਲਤ ਸੁਧਾਰਨ ਤੋਂ ਲੈ ਕੇ ਰਾਸ਼ਟਰੀ ਉਦਯੋਗਕ ਨੀਤੀਆਂ ਦੀ ਪੂੰਨਰ-ਸੰਰਚਨਾ ਤੱਕ ਮੁੱਦੇ ਚਰਚਾ ‘ਚ ਰਹੇ।
