ਔਟਵਾ : ਔਟਵਾ ਦੇ ਡਾਊਨਟਾਊਨ ‘ਚ ਬੁੱਧਵਾਰ ਸਵੇਰੇ ਇੱਕ 6-ਮੰਜ਼ਲਾ ਪਾਰਕਿੰਗ ਗੇਰਾਜ ਦਾ ਇੱਕ ਹਿੱਸਾ ਢਹਿ ਜਾਣ ਨਾਲ ਵੱਡਾ ਨੁਕਸਾਨ ਹੋਇਆ। ਇਹ ਹਾਦਸਾ ਸਲੇਟਰ ਸਟ੍ਰੀਟ ਅਤੇ ਲੌਰੀਏ ਐਵਨਿਊ ਵੈਸਟ ‘ਤੇ ਹੋਇਆ, ਜਿੱਥੇ ਕਨਕਰੀਟ ਅਤੇ ਪੱਥਰ ਦਾ ਵੱਡਾ ਹਿੱਸਾ ਜ਼ਮੀਨ ‘ਤੇ ਆ ਡਿੱਗਿਆ। ਘਟਨਾ ਦੌਰਾਨ ਗੇਰਾਜ ਵਿੱਚ ਕਰੀਬ 50 ਗੱਡੀਆਂ ਮੌਜੂਦ ਸਨ, ਪਰ ਕਿਸੇ ਜਾਨੀ ਨੁਕਸਾਨ ਹੋਣ ਤੋਂ ਬਚਾਅ ਰਿਹਾ।
ਔਟਵਾ ਫ਼ਾਇਰ ਸਰਵਿਸੇਜ਼ ਅਨੁਸਾਰ, ਮੰਗਲਵਾਰ ਸ਼ਾਮ 5 ਵਜੇ ਇੱਕ ਵਿਅਕਤੀ ਨੇ 911 ‘ਤੇ ਕਾਲ ਕਰਕੇ ਗੇਰਾਜ ਦੇ ਇੱਕ ਹਿੱਸੇ ਵਿੱਚ ਨੁਕਸਾਨ ਹੋਣ ਦੀ ਜਾਣਕਾਰੀ ਦਿੱਤੀ। ਜਦੋਂ ਫ਼ਾਇਰਫ਼ਾਈਟਰਜ਼ ਮੌਕੇ ‘ਤੇ ਪਹੁੰਚੇ, ਉਨ੍ਹਾਂ ਨੇ ਦੇਖਿਆ ਕਿ ਢਾਂਚੇ ਦੇ ਪੰਜ-ਛੇ ਗਾਡਰ ਝੁਕ ਗਏ ਸਨ, ਜੋ ਸੰਭਵ ਤੌਰ ‘ਤੇ ਗੰਭੀਰ ਨੁਕਸਾਨ ਦੀ ਨਿਸ਼ਾਨੀ ਸੀ। ਬੁੱਧਵਾਰ ਸਵੇਰੇ 4:45 ਵਜੇ ਗੇਰਾਜ ਦਾ ਇੱਕ ਹਿੱਸਾ ਢਹਿ ਗਿਆ।
ਇਮਾਰਤ ਦੇ ਢਹਿਣ ਦੇ ਕਾਰਨਾਂ ਦੀ ਜਾਂਚ ਜਾਰੀ ਹੈ, ਪਰ ਔਟਵਾ ਦੇ ਡਿਪਟੀ ਚੀਫ਼ ਬਿਲਡਿੰਗ ਅਫਸਰ, ਸਕੌਟ ਲੌਕਹਾਰਟ ਨੇ ਇੰਜੀਨੀਅਰਾਂ ਦੀ ਰਾਏ ਦੇ ਆਧਾਰ ‘ਤੇ ਕਿਹਾ ਕਿ ਭਾਰੀ ਬਰਫ਼ਬਾਰੀ ਅਤੇ ਬਾਅਦ ‘ਚ ਹੋਏ ਮੀਂਹ ਕਰਕੇ ਇਮਾਰਤ ‘ਤੇ ਜ਼ਿਆਦਾ ਭਾਰ ਪੈ ਗਿਆ ਹੋ ਸਕਦਾ ਹੈ। ਕਿਊਬੈਕ ਦੇ ਇੰਜੀਨੀਅਰ ਨੌਰਮੈਂਡ ਟੈਟਰੌ ਨੇ ਵੀ ਦੱਸਿਆ ਕਿ ਜੇਕਰ ਸਮੇਂ ਸਿਰ ਬਰਫ਼ ਹਟਾ ਦਿੱਤੀ ਜਾਂਦੀ, ਤਾਂ ਇਹ ਹਾਦਸਾ ਟਲ ਸਕਦਾ ਸੀ।
ਔਟਵਾ ਦੇ ਚੀਫ਼ ਬਿਲਡਿੰਗ ਅਫਸਰ, ਜੌਨ ਬਕ ਨੇ ਕਿਹਾ ਕਿ ਉਨ੍ਹਾਂ ਦੀ ਤਰਜੀਹ ਸਾਈਟ ਦੀ ਸੁਰੱਖਿਆ ਬਣਾਈ ਰੱਖਣ ‘ਤੇ ਹੈ। ਫਿਲਹਾਲ ਇਹ ਤੈਅ ਨਹੀਂ ਹੋ ਸਕਿਆ ਕਿ ਕੀ ਇਹ ਗੇਰਾਜ ਦੁਬਾਰਾ ਮੁਰੰਮਤ ਕੀਤਾ ਜਾਵੇਗਾ ਜਾਂ ਪੂਰੀ ਤਰ੍ਹਾਂ ਢਾਹ ਦਿੱਤਾ ਜਾਵੇਗਾ।
ਪੁਲਿਸ ਨੇ ਬੈਂਕ ਸਟ੍ਰੀਟ ਅਤੇ ਓ’ਕੌਨਰ ਸਟ੍ਰੀਟ ਦੇ ਦਰਮਿਆਨ ਸਲੇਟਰ ਅਤੇ ਲੌਰੀਏ ਸਟ੍ਰੀਟ ‘ਤੇ ਉੱਤਰੀ ਸਾਈਡਵਾਕ ਨੂੰ ਸਥਾਈ ਤੌਰ ‘ਤੇ ਬੰਦ ਕਰ ਦਿੱਤਾ ਹੈ।
ਇਸ ਹਾਦਸੇ ਨੇ ਔਟਵਾ ‘ਚ ਪਾਰਕਿੰਗ ਗੇਰਾਜਾਂ ਦੀ ਸੁਰੱਖਿਆ ਨੂੰ ਲੈ ਕੇ ਨਵੇਂ ਸਵਾਲ ਖੜ੍ਹੇ ਕਰ ਦਿੱਤੇ ਹਨ। ਇੰਜੀਨੀਅਰਾਂ ਵੱਲੋਂ ਜਾਂਚ ਪੂਰੀ ਹੋਣ ‘ਤੇ ਇਸ ਦੇ ਅਸਲ ਕਾਰਨਾਂ ਦੀ ਪੁਸ਼ਟੀ ਕੀਤੀ ਜਾਵੇਗੀ।
