ਸਰੀ, (ਏਕਜੋਤ ਸਿੰਘ): ਬੈਂਕ ਆਫ਼ ਕੈਨੇਡਾ ਨੇ ਬੀਤੇ ਦਿਨੀਂ ਵਿਆਜ਼ ਦਰਾਂ ਵਿੱਚ 0.25% ਦੀ ਕਟੌਤੀ ਕਰਕੇ ਨਵੀਂ ਦਰ 4.25% ਘੋਸ਼ਿਤ ਕੀਤੀ ਹੈ। ਇਹ ਫੈਸਲਾ ਅਰਥਵਿਵਸਥਾ ਦਰ ‘ਚ ਹੋਏ ਵਾਧੇ ਅਤੇ ਮੁੱਲ ਸੂਚਕਾਂ ਵਿੱਚ ਕਾਫ਼ੀ ਸੁਧਾਰ ਹੋਣ ਦੇ ਮੱਦੇਨਜ਼ਰ ਲਿਆ ਗਿਆ ਹੈ।
ਇਸ ਤਾਜ਼ਾ ਵਿਆਜ ਦਰ ਕਟੌਤੀ ਨਾਲ ਬੈਂਕ ਦਾ ਮਕਸਦ ਹੈ ਕੈਨੇਡਾ ਦੀ ਆਰਥਿਕਤਾ ਵਿੱਚ ਨਵੀਂ ਉਮੰਗ ਭਰਨਾ ਅਤੇ ਉਪਭੋਗਤਾ ਖਰਚੇ ਵਿੱਚ ਵਾਧਾ ਕਰਨਾ, ਜੋ ਕਿ ਮੰਦਹਾਲੀ ਕਾਰਨ ਕੁਝ ਹੱਦ ਤੱਕ ਘਟ ਚੁੱਕੇ ਹਨ। ਬੈਂਕ ਆਫ਼ ਕੈਨੇਡਾ ਦੇ ਗਵਰਨਰ, ਟਿਫ ਮੈਕਲੇਮ ਨੇ ਕਿਹਾ ਕਿ ਇਹ ਕਦਮ ਇਸ ਲਈ ਲਿਆ ਗਿਆ ਹੈ ਤਾਂ ਜੋ ਰਿਜ਼ਰਵ ਬੈਂਕ ਵੱਲੋਂ ਲਗਾਤਾਰ ਵੱਧ ਰਹੀ ਮਹਿੰਗਾਈ ਨੂੰ ਕਾਬੂ ਵਿੱਚ ਰੱਖਿਆ ਜਾ ਸਕੇ ਅਤੇ ਉਪਭੋਗਤਾ ਤੇ ਕਾਰੋਬਾਰਾਂ ਨੂੰ ਵਧੀਆ ਵਿੱਤੀ ਮਾਹੌਲ ਮਿਲ ਸਕੇ।
ਜ਼ਿਕਰਯੋਗ ਹੈ ਕਿ ਬੈਂਕ ਆਫ਼ ਕੈਨੇਡਾ ਨੇ ਆਪਣੀ ਵਿਆਜ ਦਰਾਂ ਵਿੱਚ ਕਟੌਤੀ ਕਰਕੇ ਇਹ ਸਪਸ਼ਟ ਕਰ ਦਿੱਤਾ ਹੈ ਕਿ ਮਹਿੰਗਾਈ ਨੂੰ ਕੰਟਰੋਲ ਕਰਨਾ ਉਸਦਾ ਮੁੱਖ ਟੀਚਾ ਹੈ। ਇਸਦੇ ਨਾਲ ਹੀ, ਉਨ੍ਹਾਂ ਨੇ ਇਸ ਗੱਲ ਦੀ ਵੀ ਸਪੱਸ਼ਟੀਕਰਨ ਦਿੱਤੀ ਕਿ ਜੇਕਰ ਅਗਲੇ ਕੁਝ ਮਹੀਨਿਆਂ ਵਿੱਚ ਆਰਥਿਕਤਾ ਵਿੱਚ ਸੁਧਾਰ ਰਾਹੀਂ ਰਿਹਾ ਤਾਂ ਹੋਰ ਕਟੌਤੀਆਂ ਵੀ ਕੀਤੀਆਂ ਜਾ ਸਕਦੀਆਂ ਹਨ।
ਜ਼ਿਕਰਯੋਗ ਹੈ ਕਿ ਵਿਆਜ਼ ਦਰਾਂ ਵਿੱਚ ਕੀਤੀ ਗਈ ਇਸ ਕਟੌਤੀ ਦਾ ਸਿੱਧਾ ਪ੍ਰਭਾਵ ਕੈਨੇਡਾ ਦੀ ਰਿਹਾਇਸ਼ੀ ਮਾਰਕੀਟ ‘ਤੇ ਪੈਣ ਦੀ ਉਮੀਦ ਹੈ। ਘੱਟ ਵਿਆਜ ਦਰਾਂ ਕਾਰਨ ਘਰ ਖਰੀਦਣ ਵਾਲਿਆਂ ਲਈ ਮਾਰਕੀਟ ‘ਚ ਦਿਲਚਸਪੀ ਵੱਧ ਸਕਦੀ ਹੈ, ਖਾਸ ਕਰਕੇ ਉਹਨਾਂ ਖਰੀਦਦਾਰਾਂ ਲਈ ਜਿਨ੍ਹਾਂ ਲਈ ਵਿਆਜ ਦੀਆਂ ਉੱਚੀਆਂ ਦਰਾਂ ਵੱਡੀ ਰੁਕਾਵਟ ਸਾਬਤ ਹੋ ਰਹੀਆਂ ਸਨ। ਵਿੱਤ ਵਿਸ਼ਲੇਸ਼ਕ ਇਸ ਕਦਮ ਨੂੰ ਰਿਹਾਇਸ਼ੀ ਮਾਰਕੀਟ ‘ਚ ਨਵੀਂ ਰੌਣਕ ਲਿਆਉਣ ਲਈ ਮਹੱਤਵਪੂਰਨ ਮੰਨ ਰਹੇ ਹਨ।
ਇਹ ਵਿਆਜ਼ ਦਰ ਕਟੌਤੀ ਕਾਰੋਬਾਰੀ ਕਮਿਊਨਿਟੀ ਲਈ ਵੀ ਇਕ ਖ਼ੁਸ਼ਖਬਰੀ ਵਜੋਂ ਦੇਖੀ ਜਾ ਰਹੀ ਹੈ। ਵੱਧੀ ਹੋਈ ਵਿਆਜ਼ ਦਰ ਕਾਰਨ ਕਈ ਛੋਟੇ ਅਤੇ ਦਰਮਿਆਨੇ ਕਾਰੋਬਾਰਾਂ ਨੂੰ ਵਿੱਤੀ ਸਹੂਲਤਾਂ ਹਾਸਲ ਕਰਨ ਵਿੱਚ ਮੁਸ਼ਕਲ ਆ ਰਹੀ ਸੀ। ਹੁਣ ਕਾਰੋਬਾਰਾਂ ਨੂੰ ਨਵੇਂ ਪ੍ਰਾਜੈਕਟਾਂ ਵਿੱਚ ਨਿਵੇਸ਼ ਕਰਨ ਲਈ ਘੱਟ ਵਿਆਜ ਦਰਾਂ ‘ਤੇ ਕ਼ਰਜ਼ ਪ੍ਰਾਪਤ ਕਰਨ ਵਿੱਚ ਸਹੂਲਤ ਹੋਵੇਗੀ, ਜਿਸ ਨਾਲ ਆਰਥਿਕ ਵਾਧਾ ਹੋ ਸਕਦਾ ਹੈ।
