ਸਰੀ, (ਏਕਜੋਤ ਸਿੰਘ): ਓਨਟੇਰਿਓ ਸਰਕਾਰ ਨੇ ਵੀਰਵਾਰ ਨੂੰ ਇੱਕ ਵੱਡਾ ਅਤੇ ਦੂਰ-ਗਾਮੀ ਪ੍ਰਭਾਵ ਵਾਲਾ ਕਾਨੂੰਨ ਲਿਆਉਣ ਦੀ ਯੋਜਨਾ ਦਾ ਐਲਾਨ ਕੀਤਾ ਹੈ, ਜਿਸ ਅਨੁਸਾਰ ਸੂਬੇ ਦੀਆਂ ਸਾਰੀਆਂ ਸਰਕਾਰੀ ਸੰਸਥਾਵਾਂਔਜਿਵੇਂ ਕਿ ਮਿਊਂਸਿਪੈਲਟੀਆਂ, ਮੰਤਰਾਲੇ, ਏਜੰਸੀਆਂ, ਕਾਂਟਰੈਕਟਰ ਅਤੇ ਸਬ-ਕਾਂਟਰੈਕਟਰਔਪਹਿਲਾਂ ਓਨਟੇਰਿਓ ਵਿੱਚ ਬਣੇ ਸਮਾਨ ਤੇ ਸੇਵਾਵਾਂ ਨੂੰ ਤਰਜੀਹ ਦੇਣਗੇ। ਇਹ ਕਦਮ ਆਰਥਿਕ ਚੁਣੌਤੀਆਂ ਅਤੇ ਅਮਰੀਕੀ ਟੈਰਿਫ਼ ਦੇ ਦਬਾਅ ਵਿਚ ਸੂਬੇ ਦੀਆਂ ਨੌਕਰੀਆਂ ਦੀ ਰੱਖਿਆ ਕਰਨ ਦੇ ਉਦੇਸ਼ ਨਾਲ ਚੁੱਕਿਆ ਜਾ ਰਿਹਾ ਹੈ।
ਨਵੇਂ ਕਾਨੂੰਨ ਦਾ ਨਾਮ ”ਬਾਏ ਓਨਟੇਰਿਓ ਐਕਟ” ਰੱਖਿਆ ਗਿਆ ਹੈ, ਅਤੇ ਇਸ ਦੇ ਤਹਿਤ ਸਰਕਾਰੀ ਪੈਸੇ ਦਾ ਵੱਡਾ ਹਿੱਸਾ ਸੂਬੇ ਦੇ ਹੀ ਉਦਯੋਗਾਂ, ਕਾਰੋਬਾਰਾਂ ਅਤੇ ਸੇਵਾਵਾਂ ਵਿੱਚ ਲਗਾਇਆ ਜਾਵੇਗਾ। ਓਨਟੇਰਿਓ ਦੇ ਪਬਲਿਕ ਐਂਡ ਬਿਜ਼ਨਸ ਸਰਵਿਸ ਡਿਲਿਵਰੀ ਮੰਤਰੀ ਸਟੀਫ਼ਨ ਕ੍ਰਾਫ਼ਰਡ ਨੇ ਟੋਰਾਂਟੋ ਵਿੱਚ ਪ੍ਰੈਸ ਕਾਨਫਰੰਸ ਦੌਰਾਨ ਕਿਹਾ ਕਿ ਇਹ ਕਾਨੂੰਨ ਸੂਬੇ ਦੀ ਆਰਥਿਕ ਮਜ਼ਬੂਤੀ ਅਤੇ ਸਥਾਨਕ ਨੌਕਰੀਆਂ ਦੀ ਰੱਖਿਆ ਲਈ ਬਹੁਤ ਜ਼ਰੂਰੀ ਹੈ।
ਕ੍ਰਾਫ਼ਰਡ ਨੇ ਕਿਹਾ, ”ਇਹ ਸਾਡੇ ਸਰਕਾਰੀ ਖੇਤਰ ਦੀ ਖਰੀਦਣ ਦੀ ਤਾਕਤ ਨੂੰ ਆਪਣੇ ਲੋਕਾਂ ਅਤੇ ਕਾਰੋਬਾਰਾਂ ਦਾ ਸਾਥ ਦੇਣ ਲਈ ਵਰਤਣ ਬਾਰੇ ਹੈ। ਕੀਮਤ ਮਹੱਤਵਪੂਰਨ ਹੈ, ਪਰ ਪੈਸੇ ਦਾ ਵਧੀਆ ਪ੍ਰਬੰਧਨ ਹੁਣ ਇਹਦਾ ਮਤਲਬ ਨਹੀਂ ਕਿ ਸਭ ਤੋਂ ਸਸਤਾ ਚੀਜ਼ ਖਰੀਦੀ ਜਾਵੇ। ਇਸਦਾ ਮਤਲਬ ਹੈ ਕਿ ਸਰਕਾਰੀ ਖਰਚ ਓਨਟੇਰਿਓ ਅਤੇ ਕੈਨੇਡਾ ਵਿੱਚ ਹੀ ਰਹੇ।”
ਨਵੇਂ ਮਸੌਦੇ ਅਨੁਸਾਰ, ਜੇ ਇਹ ਕਾਨੂੰਨ ਪਾਸ ਹੋ ਗਿਆ, ਤਾਂ ਪਬਲਿਕ ਸੈਕਟਰ ਠੇਕੇ ਜਾਰੀ ਕਰਦੇ ਸਮੇਂ ਸਪਸ਼ਟ ਨਿਯਮ ਹੋਣਗੇ ਕਿ ਓਨਟੇਰਿਓ ਦੇ ਸਮਾਨ ਅਤੇ ਸੇਵਾਵਾਂ ਨੂੰ ਕਿਵੇਂ ਤਰਜੀਹ ਦੇਣੀ ਹੈ। ਜੇ ਕੋਈ ਏਜੰਸੀ ਜਾਂ ਕਾਂਟਰੈਕਟਰ ਨਿਯਮਾਂ ਦੀ ਉਲੰਘਣਾ ਕਰਦਾ ਹੈ, ਤਾਂ ਉਸ ‘ਤੇ ਜੁਰਮਾਨੇ, ਭੁਗਤਾਨ ਰੋਕ, ਜਾਂ ਭਵਿੱਖ ਦੇ ਸਰਕਾਰੀ ਠੇਕਿਆਂ ਤੋਂ ਅਯੋਗਤਾ ਵਰਗੀਆਂ ਕਠੋਰ ਸਜ਼ਾਵਾਂ ਲੱਗ ਸਕਦੀਆਂ ਹਨ।
ਸਰਕਾਰ ਨੇ ਇਹ ਵੀ ਦੱਸਿਆ ਹੈ ਕਿ ਉਹ ਓਨਟੇਰਿਓ ਅਤੇ ਹੋਰ ਕੈਨੇਡੀਅਨ ਸਪਲਾਇਰਾਂ ਦੀਆਂ ਪੂਰਵ-ਸਵੀਕ੍ਰਿਤ ਸੂਚੀਆਂ (approved supplier lists) ਤਿਆਰ ਕਰ ਰਹੀ ਹੈ, ਜਿਨ੍ਹਾਂ ਦੀ ਵਰਤੋਂ ਸੂਬੇ ਦੇ ਬੁਨਿਆਦੀ ਢਾਂਚੇ ਅਤੇ ਖਰੀਦ ਪ੍ਰਕਿਰਿਆਵਾਂ ਵਿੱਚ ਕੀਤੀ ਜਾ ਸਕੇਗੀ। ਇਸ ਨਾਲ ਲੋਕਲ ਕੰਪਨੀਆਂ ਨੂੰ ਸਿੱਧਾ ਫ਼ਾਇਦਾ ਹੋਵੇਗਾ ਅਤੇ ਵੱਡੇ ਠੇਕਿਆਂ ਤੱਕ ਉਹਨਾਂ ਦੀ ਪਹੁੰਚ ਵਧੇਗੀ।
ਹਾਲਾਂਕਿ, ਕਾਨੂੰਨ ਵਿੱਚ ਇੱਕ ਲਚਕੀਲਾ ਪ੍ਰਬੰਧ ਵੀ ਰੱਖਿਆ ਗਿਆ ਹੈ। ਜੇਕਰ ਓਨਟੇਰਿਓ ਜਾਂ ਕੈਨੇਡੀਅਨ ਸਪਲਾਇਰ ਵਾਜਬ ਕੀਮਤ ਜਾਂ ਸਮੇਂ ਦੇ ਅੰਦਰ ਸਮਾਨ ਜਾਂ ਸੇਵਾਵਾਂ ਪ੍ਰਦਾਨ ਨਹੀਂ ਕਰ ਸਕਦੇ, ਤਾਂ ਫਿਰ ਵਿਦੇਸ਼ੀ ਸਪਲਾਇਰਾਂ ਤੋਂ ਖਰੀਦ ਦੀ ਇਜਾਜ਼ਤ ਹੋਗੀ।
ਇਹ ਐਲਾਨ ਉਸੇ ਹਫ਼ਤੇ ਆਇਆ ਹੈ ਜਦੋਂ ਸਾਰੇ ਸੂਬਿਆਂ, ਪ੍ਰਦੇਸ਼ਾਂ ਅਤੇ ਫੈਡਰਲ ਸਰਕਾਰ ਨੇ ਅੰਤਰ-ਸੂਬਾਈ ਵਪਾਰ ਰੁਕਾਵਟਾਂ ਹਟਾਉਣ ਲਈ ਇੱਕ ਵੱਡੇ ਸਮਝੌਤੇ ‘ਤੇ ਦਸਤਖ਼ਤ ਕੀਤੇ ਹਨ।
ਅਰਥਸ਼ਾਸਤਰੀ ਮੰਨਦੇ ਹਨ ਕਿ ਇਹ ਦੋਵੇਂ ਕਦਮ-ਇੱਕ ਸਥਾਨਕ ਨੌਕਰੀਆਂ ਮਜ਼ਬੂਤ ਕਰਨ ਲਈ, ਅਤੇ ਦੂਜਾ ਰਾਸ਼ਟਰੀ ਬਜ਼ਾਰ ਖੋਲ੍ਹਣ ਲਈ-ਓਨਟੇਰਿਓ ਅਤੇ ਕੈਨੇਡਾ ਦੋਹਾਂ ਲਈ ਮਹੱਤਵਪੂਰਨ ਪ੍ਰਭਾਵ ਲੈ ਕੇ ਆ ਸਕਦੇ ਹਨ।
ਓਨਟੇਰਿਓ ਸਰਕਾਰ ਵਲੋਂ ”ਬਾਏ ਓਨਟੇਰਿਓ ਐਕਟ” ਨਾਲ ਸਥਾਨਕ ਸਮਾਨ ਨੂੰ ਤਰਜੀਹ
