ਕੈਨੇਡਾ ਦੀ ਆਬਾਦੀ ਵਿਕਾਸ ਦਰ ਵਿੱਚ ਇਤਿਹਾਸਕ ਗਿਰਾਵਟ, ਦਹਾਕਿਆਂ ਬਾਅਦ ਸਭ ਤੋਂ ਹੇਠਲੇ ਪੱਧਰ ’ਤੇ ਪਹੁੰਚੀ

ਅੰਤਰਰਾਸ਼ਟਰੀ ਪ੍ਰਵਾਸ ਵਿੱਚ ਘਾਟ ਕਾਰਨ ਪਿਆ ਅਸਰ : ਸਟੈਟਿਸਟਿਕਸ ਕੈਨੇਡਾ
ਵੈਨਕੂਵਰ (ਏਕਜੋਤ ਸਿੰਘ): ਸਟੈਟਿਸਟਿਕਸ ਕੈਨੇਡਾ ਵੱਲੋਂ ਜਾਰੀ ਕੀਤੇ ਗਏ ਤਾਜ਼ਾ ਅੰਕੜਿਆਂ ਅਨੁਸਾਰ ਦੇਸ਼ ਦੀ ਆਬਾਦੀ ਦੀ ਵਿਕਾਸ ਦਰ ਵਿੱਚ ਲਗਾਤਾਰ ਗਿਰਾਵਟ ਦਰਜ ਕੀਤੀ ਜਾ ਰਹੀ ਹੈ, ਜਿਸ ਦਾ ਮੁੱਖ ਕਾਰਨ ਅੰਤਰਰਾਸ਼ਟਰੀ ਪ੍ਰਵਾਸ ਰੁਝਾਨਾਂ ਵਿੱਚ ਆਈ ਕਮੀ ਹੈ। 1 ਜੁਲਾਈ 2026 ਤੱਕ ਕੈਨੇਡਾ ਦੀ ਅੰਦਾਜ਼ਨ ਆਬਾਦੀ 41,798,407 ਤੱਕ ਪਹੁੰਚ ਗਈ ਹੈ, ਜੋ ਕਿ ਪਿਛਲੇ ਸਾਲ ਦੇ ਮੁਕਾਬਲੇ ਸਿਰਫ਼ 189,425 ਵਿਅਕਤੀ ਜਾਂ 0.5 ਫੀਸਦੀ ਦਾ ਵਾਧਾ ਦਰਸਾਉਂਦੀ ਹੈ।
ਇਹ ਵਾਧਾ ਸਾਲ 1944-1945 ਤੋਂ ਬਾਅਦ ਜੁਲਾਈ ਤੋਂ ਜੁਲਾਈ ਦਰਮਿਆਨ ਕੁੱਲ ਆਬਾਦੀ ਵਿੱਚ ਹੋਇਆ ਸਭ ਤੋਂ ਘੱਟ ਵਾਧਾ ਹੈ ਅਤੇ ਸਾਲ 1915-1916 ਤੋਂ ਬਾਅਦ ਦਰਜ ਕੀਤਾ ਗਿਆ ਸਭ ਤੋਂ ਘੱਟ ਪ੍ਰਤੀਸ਼ਤ ਵਾਧਾ ਹੈ। ਕੈਨੇਡਾ ਦੀ ਸਾਲਾਨਾ ਆਬਾਦੀ ਦਰ 2023-2024 ਵਿੱਚ 2.8 ਫੀਸਦੀ ਦੇ ਸਿਖ਼ਰ ‘ਤੇ ਪਹੁੰਚ ਗਈ ਸੀ, ਪਰ ਉਸ ਤੋਂ ਬਾਅਦ ਇਹ ਲਗਾਤਾਰ ਘਟ ਰਹੀ ਹੈ। ਸਾਲ 2026 ਦੀ ਦੂਜੀ ਤਿਮਾਹੀ (1 ਅਪ੍ਰੈਲ ਤੋਂ 1 ਜੁਲਾਈ) ਦੌਰਾਨ ਦੇਸ਼ ਵਿੱਚ ਸਿਰਫ਼ 80,343 ਲੋਕਾਂ ਦਾ ਵਾਧਾ ਹੋਇਆ, ਜੋ ਕਿ ਕੋਵਿਡ ਮਹਾਂਮਾਰੀ ਤੋਂ ਬਾਅਦ ਦੂਜੀ ਤਿਮਾਹੀ ਦਾ ਸਭ ਤੋਂ ਕਮਜ਼ੋਰ ਅੰਕੜਾ ਹੈ।
ਏਜੰਸੀ ਮੁਤਾਬਕ ਪ੍ਰਵਾਸ ਵਿੱਚ ਕਮੀ ਕਾਰਨ ਕੈਨੇਡੀਅਨ ਨਾਗਰਿਕਾਂ ਦੀ ਔਸਤ ਉਮਰ ਵੀ ਵਧ ਕੇ 42.1 ਸਾਲ ਹੋ ਗਈ ਹੈ। ਗੈਰ-ਸਥਾਈ ਵਸਨੀਕਾਂ (ਟੈਂਪਰੇਰੀ ਰੈਜ਼ੀਡੈਂਟਸ) ਦੀ ਗਿਣਤੀ ਵਿੱਚ 154,614 ਦੀ ਵੱਡੀ ਕਮੀ ਆਈ ਹੈ, ਜਿਸ ਵਿੱਚ ਮੁੱਖ ਤੌਰ ‘ਤੇ ਸਟੱਡੀ ਪਰਮਿਟ ਧਾਰਕਾਂ ਵਿੱਚ 140,827 ਅਤੇ ਵਰਕ-ਕਮ-ਸਟੱਡੀ ਪਰਮਿਟਾਂ ਵਿੱਚ 81,163 ਦੀ ਗਿਰਾਵਟ ਸ਼ਾਮਲ ਹੈ। ਨੌਜਵਾਨ ਵਰਗ, ਖ਼ਾਸ ਕਰਕੇ 20 ਤੋਂ 29 ਸਾਲ ਦੀ ਉਮਰ ਦੇ ਲੋਕਾਂ ਦੀ ਗਿਣਤੀ ਵਿੱਚ ਸਭ ਤੋਂ ਵੱਧ ਗਿਰਾਵਟ ਦਰਜ ਕੀਤੀ ਗਈ ਹੈ।
ਸਾਲ 2026 ਦੀ ਦੂਜੀ ਤਿਮਾਹੀ ਵਿੱਚ ਕੈਨੇਡਾ ਨੇ 99,148 ਨਵੇਂ ਪੱਕੇ ਪ੍ਰਵਾਸੀਆਂ ਦਾ ਸਵਾਗਤ ਕੀਤਾ, ਜੋ ਪਿਛਲੇ ਸਾਲ ਨਾਲੋਂ 4.2 ਫੀਸਦੀ ਘੱਟ ਹੈ। ਸੂਬਿਆਂ ਦੇ ਪੱਧਰ ‘ਤੇ ਅਲਬਰਟਾ ਨੇ 1.5 ਫੀਸਦੀ ਨਾਲ ਸਭ ਤੋਂ ਤੇਜ਼ ਆਬਾਦੀ ਵਾਧਾ ਦਰਜ ਕੀਤਾ, ਜਦਕਿ ਬ੍ਰਿਟਿਸ਼ ਕੋਲੰਬੀਆ ਵਿੱਚ ਇਹ ਦਰ ਸਿਰਫ਼ 0.1 ਫੀਸਦੀ ਰਹੀ। ਨੌਰਥਵੈਸਟ ਟੈਰੀਟਰੀਜ਼ ਇਕੱਲਾ ਅਜਿਹਾ ਖੇਤਰ ਰਿਹਾ ਜਿੱਥੇ ਆਬਾਦੀ ਵਿੱਚ 0.3 ਫੀਸਦੀ ਦੀ ਕਮੀ ਦੇਖੀ ਗਈ। This report was written by Ekjot Singh as part of the Local Journalism Initiative.