ਨਿਊਯਾਰਕ ਦੇ ਟਾਈਮਜ਼ ਸਕੁਏਅਰ ‘ਚ ਬੇਰਹਿਮੀ ਨਾਲ ਬੈਂਕ ਆਫ਼ ਅਮਰੀਕਾ ਦੀ ਮਹਿਲਾ ਉਪ ਪ੍ਰਧਾਨ ਦਾ ਕਤਲ

ਵੈਨਕੂਵਰ (ਏਕਜੋਤ ਸਿੰਘ): ਨਿਊਯਾਰਕ ਸ਼ਹਿਰ ਦੇ ਸਭ ਤੋਂ ਵਿਅਸਤ ਇਲਾਕੇ ਟਾਈਮਜ਼ ਸਕੁਏਅਰ ਵਿੱਚ ਬਿਨਾਂ ਕਿਸੇ ਉਕਸਾਵੇ ਦੇ ਹੋਏ ਇੱਕ ਖ਼ੂਨੀ ਚਾਕੂ ਹਮਲੇ ਦੌਰਾਨ ਬੈਂਕ ਆਫ਼ ਅਮਰੀਕਾ ਦੀ ਮਹਿਲਾ ਉਪ ਪ੍ਰਧਾਨ ਏਰਿਨ ਪਿਆਸੈਂਟੀ ਦੀ ਮੌਤ ਹੋ ਗਈ ਹੈ। ਪੁਲਿਸ ਦੀ ਜਵਾਬੀ ਕਾਰਵਾਈ ਵਿੱਚ ਹਮਲਾਵਰ ਔਰਤ ਵੀ ਮਾਰੀ ਗਈ ਹੈ, ਜਦਕਿ ਇੱਕ ਬਜ਼ੁਰਗ ਵਿਅਕਤੀ ਗੰਭੀਰ ਜ਼ਖ਼ਮੀ ਹੋਇਆ ਹੈ।
ਨਿਊਯਾਰਕ ਪੁਲਿਸ ਵਿਭਾਗ (ਐੱਨ.ਵਾਈ.ਪੀ.ਡੀ.) ਅਨੁਸਾਰ ਇਹ ਖ਼ੌਫ਼ਨਾਕ ਘਟਨਾ ਸੋਮਵਾਰ ਨੂੰ ਸਥਾਨਕ ਸਮੇਂ ਅਨੁਸਾਰ ਸ਼ਾਮ 4:30 ਵਜੇ ਤੋਂ ਠੀਕ ਪਹਿਲਾਂ ਵੈਸਟ 42 ਸਟ੍ਰੀਟ ਅਤੇ ਸੈਵਨਥ ਐਵੇਨਿਊ ਨੇੜੇ ਵਾਪਰੀ। ਪੁਲਿਸ ਨੂੰ ਸੂਚਨਾ ਮਿਲੀ ਸੀ ਕਿ ਇੱਕ ਔਰਤ ਸ਼ਰੇਆਮ ਹੰਗਾਮਾ ਕਰ ਰਹੀ ਹੈ। ਜਦੋਂ ਪੁਲਿਸ ਅਧਿਕਾਰੀ ਮੌਕੇ ‘ਤੇ ਪਹੁੰਚੇ ਤਾਂ 49 ਸਾਲਾ ਔਰਤ ਨੇ ਦੋ ਵੱਡੇ ਚਾਕੂ ਲਹਿਰਾਉਂਦੇ ਹੋਏ ਪੁਲਿਸ ਵੱਲ ਵਧਣਾ ਸ਼ੁਰੂ ਕਰ ਦਿੱਤਾ।
ਪੁਲਿਸ ਕਮਿਸ਼ਨਰ ਜੈਸਿਕਾ ਟਿਸ਼ ਨੇ ਦੱਸਿਆ ਕਿ ਅਧਿਕਾਰੀਆਂ ਨੇ ਹਮਲਾਵਰ ਨੂੰ ਚਾਕੂ ਸੁੱਟਣ ਲਈ ਕਈ ਮਿੰਟਾਂ ਤੱਕ ਸਮਝਾਉਣ ਦੀ ਕੋਸ਼ਿਸ਼ ਕੀਤੀ ਅਤੇ ਟੇਜ਼ਰ ਦੀ ਵਰਤੋਂ ਵੀ ਕੀਤੀ। ਪਰ ਔਰਤ ਨੇ ਹਥਿਆਰ ਸੁੱਟਣ ਤੋਂ ਇਨਕਾਰ ਕਰਦਿਆਂ ਕਿਹਾ ਕਿ ਉਹ ਮਰਨਾ ਪਸੰਦ ਕਰੇਗੀ। ਜਦੋਂ ਉਹ ਅੱਗੇ ਵਧਦੀ ਰਹੀ ਤਾਂ ਪੁਲਿਸ ਨੇ ਗੋਲੀਆਂ ਚਲਾ ਦਿੱਤੀਆਂ, ਜਿਸ ਕਾਰਨ ਉਸ ਦੀ ਹਸਪਤਾਲ ਜਾ ਕੇ ਮੌਤ ਹੋ ਗਈ। ਹਮਲਾਵਰ ਦੀ ਪਛਾਣ ਕਵੀਂਸ ਵਾਸੀ ਪਾਮੇਲਾ ਸਿਸਨੇਰੋਸ ਵਜੋਂ ਹੋਈ ਹੈ।
ਜਾਂਚ ਤੋਂ ਪਤਾ ਲੱਗਾ ਹੈ ਕਿ ਪੁਲਿਸ ਦੇ ਪਹੁੰਚਣ ਤੋਂ ਪਹਿਲਾਂ ਹੀ ਦੋਸ਼ੀ ਔਰਤ ਨੇ ਸਿਰਫ਼ 20 ਸਕਿੰਟਾਂ ਦੇ ਅੰਦਰ ਦੋ ਲੋਕਾਂ ‘ਤੇ ਅਚਾਨਕ ਚਾਕੂਆਂ ਨਾਲ ਹਮਲਾ ਕਰ ਦਿੱਤਾ ਸੀ। ਸਭ ਤੋਂ ਪਹਿਲਾਂ ਉਸ ਨੇ ਸਬਵੇਅ ਤੋਂ ਬਾਹਰ ਆਏ ਇੱਕ 68 ਸਾਲਾ ਬਜ਼ੁਰਗ ਦੇ ਪੇਟ ਵਿੱਚ ਚਾਕੂ ਮਾਰਿਆ ਅਤੇ ਫਿਰ ਅੱਗੇ ਵਧ ਕੇ 32 ਸਾਲਾ ਬੈਂਕ ਉਪ ਪ੍ਰਧਾਨ ਏਰਿਨ ਪਿਆਸੈਂਟੀ ‘ਤੇ ਜਾਨਲੇਵਾ ਹਮਲਾ ਕਰ ਦਿੱਤਾ। ਦੋਵਾਂ ਨੂੰ ਹਸਪਤਾਲ ਲਿਜਾਇਆ ਗਿਆ, ਜਿੱਥੇ ਪਿਆਸੈਂਟੀ ਨੇ ਦਮ ਤੋੜ ਦਿੱਤਾ ਜਦਕਿ ਬਜ਼ੁਰਗ ਦੀ ਹਾਲਤ ਸਥਿਰ ਦੱਸੀ ਜਾ ਰਹੀ ਹੈ।
ਨਿਊਯਾਰਕ ਦੇ ਮੇਅਰ ਜ਼ੋਹਰਾਨ ਮਮਦਾਨੀ ਨੇ ਮ੍ਰਿਤਕਾਂ ਦੇ ਪਰਿਵਾਰਾਂ ਨਾਲ ਹਮਦਰਦੀ ਪ੍ਰਗਟ ਕਰਦਿਆਂ ਕਿਹਾ ਕਿ ਪੁਲਿਸ ਨੇ ਤੁਰੰਤ ਕਾਰਵਾਈ ਕਰਕੇ ਇਸ ਹਮਲੇ ਨੂੰ ਹੋਰ ਭਿਆਨਕ ਹੋਣ ਤੋਂ ਬਚਾ ਲਿਆ। ਬੈਂਕ ਆਫ਼ ਅਮਰੀਕਾ ਨੇ ਵੀ ਆਪਣੀ ਹੋਣਹਾਰ ਅਧਿਕਾਰੀ ਦੀ ਮੌਤ ‘ਤੇ ਡੂੰਘਾ ਸੋਗ ਪ੍ਰਗਟ ਕੀਤਾ ਹੈ। This report was written by Ekjot Singh as part of the Local Journalism Initiative.