ਜਲਵਾਯੂ ਪਰਿਵਰਤਨ ਦੀ ਮਾਰ ਹੇਠ ਕੈਨੇਡਾ: ਜੰਗਲੀ ਅੱਗਾਂ ਦੇ ਵਧਦੇ ਖ਼ਤਰੇ ਅਤੇ ਕੁਦਰਤੀ ਸੰਤੁਲਨ ਨੂੰ ਵੱਡੀ ਢਾਹ

ਪਰਮਜੀਤ ਿਸੰਘ
ਕੈਨੇਡਾ ਆਪਣੀ ਵਿਸ਼ਾਲ ਕੁਦਰਤੀ ਸੁੰਦਰਤਾ, ਨਦੀਆਂ, ਝੀਲਾਂ ਅਤੇ ਅਥਾਹ ਜੰਗਲੀ ਸਰਮਾਏ ਲਈ ਪੂਰੀ ਦੁਨੀਆ ਵਿੱਚ ਮਸ਼ਹੂਰ ਹੈ। ਪਰ ਬੀਤੇ ਕੁਝ ਵਰ੍ਹਿਆਂ ਤੋਂ ਇਹ ਖ਼ੂਬਸੂਰਤ ਮੁਲਕ ਇੱਕ ਭਿਆਨਕ ਕੁਦਰਤੀ ਆਫ਼ਤ ਦੇ ਕੇਂਦਰ ਵਜੋਂ ਉੱਭਰ ਕੇ ਸਾਹਮਣੇ ਆ ਰਿਹਾ ਹੈ। ਹਰ ਸਾਲ ਗਰਮੀਆਂ ਦਾ ਮੌਸਮ ਸ਼ੁਰੂ ਹੁੰਦਿਆਂ ਹੀ ਕੈਨੇਡਾ ਦੇ ਲੱਖਾਂ ਹੈਕਟੇਅਰ ਵਿੱਚ ਫੈਲੇ ਜੰਗਲ ਅੱਗ ਦੀ ਲਪੇਟ ਵਿੱਚ ਆ ਜਾਂਦੇ ਹਨ। ਇਹ ਜੰਗਲੀ ਅੱਗਾਂ ਹੁਣ ਮਹਿਜ਼ ਇੱਕ ਮੌਸਮੀ ਘਟਨਾ ਨਹੀਂ ਰਹੀਆਂ, ਸਗੋਂ ਇਹ ਇੱਕ ਲਗਾਤਾਰ ਵਧਦੀ ਵਿਸ਼ਵ ਪੱਧਰੀ ਵਾਤਾਵਰਣਿਕ ਐਮਰਜੈਂਸੀ ਦਾ ਰੂਪ ਧਾਰਨ ਕਰ ਚੁੱਕੀਆਂ ਹਨ। ਸੂਬਾ ਬ੍ਰਿਟਿਸ਼ ਕੋਲੰਬੀਆ ਤੋਂ ਲੈ ਕੇ ਅਲਬਰਟਾ, ਉੱਤਰ ਪੱਛਮੀ ਖੇਤਰਾਂ ਅਤੇ ਇੱਥੋਂ ਤੱਕ ਕਿ ਪੂਰਬੀ ਸੂਬਿਆਂ ਕਿਊਬੈਕ ਅਤੇ ਨੋਵਾ ਸਕੋਸ਼ੀਆ ਤੱਕ ਫੈਲਦੀਆਂ ਇਹ ਲਪਟਾਂ ਨਾ ਸਿਰਫ਼ ਕੈਨੇਡਾ ਦੇ ਭੂਗੋਲ ਨੂੰ ਝੁਲਸਾ ਰਹੀਆਂ ਹਨ, ਸਗੋਂ ਸਮੁੱਚੀ ਧਰਤੀ ਦੇ ਵਾਯੂਮੰਡਲ ਨੂੰ ਵੀ ਗੰਭੀਰ ਰੂਪ ਵਿੱਚ ਦੂਸ਼ਿਤ ਕਰ ਰਹੀਆਂ ਹਨ।
ਇਸ ਬੇਕਾਬੂ ਸੰਕਟ ਦੇ ਪਿੱਛੇ ਸਭ ਤੋਂ ਅਹਿਮ ਕਾਰਨ ਗਲੋਬਲ ਵਾਰਮਿੰਗ ਅਤੇ ਜਲਵਾਯੂ ਪਰਿਵਰਤਨ ਦਾ ਤੇਜ਼ੀ ਨਾਲ ਵਧ ਰਿਹਾ ਪ੍ਰਭਾਵ ਹੈ। ਵਿਗਿਆਨਕ ਤੱਥ ਦਰਸਾਉਂਦੇ ਹਨ ਕਿ ਕੈਨੇਡਾ ਦੇ ਉੱਤਰੀ ਅਤੇ ਬੋਰੀਅਲ ਖੇਤਰ ਵਿਸ਼ਵ ਦੀ ਔਸਤ ਨਾਲੋਂ ਦੁੱਗਣੀ ਰਫ਼ਤਾਰ ਨਾਲ ਗਰਮ ਹੋ ਰਹੇ ਹਨ। ਸਰਦੀਆਂ ਦੇ ਮੌਸਮ ਵਿੱਚ ਬਰਫ਼ਬਾਰੀ ਦੀ ਕਮੀ ਅਤੇ ਬਸੰਤ ਰੁੱਤ ਦੀ ਅਗੇਤੀ ਆਮਦ ਕਾਰਨ ਜ਼ਮੀਨ ਵਿੱਚ ਨਮੀ ਬਹੁਤ ਜਲਦੀ ਖ਼ਤਮ ਹੋ ਜਾਂਦੀ ਹੈ। ਗਰਮੀਆਂ ਦੌਰਾਨ ਲੰਮੇ ਸਮੇਂ ਤੱਕ ਚੱਲਣ ਵਾਲੇ ਹੀਟਵੇਵ ਅਤੇ ਗੰਭੀਰ ਸੋਕੇ ਦੇ ਹਾਲਾਤ ਜੰਗਲਾਂ ਦੀ ਬਨਸਪਤੀ, ਸੁੱਕੇ ਪੱਤਿਆਂ ਅਤੇ ਲੱਕੜੀ ਨੂੰ ਇੱਕ ਬਾਰੂਦ ਦੇ ਢੇਰ ਵਿੱਚ ਤਬਦੀਲ ਕਰ ਦਿੰਦੇ ਹਨ। ਅਜਿਹੀ ਸਥਿਤੀ ਵਿੱਚ ਅਸਮਾਨੀ ਬਿਜਲੀ ਦਾ ਇੱਕ ਝਟਕਾ ਜਾਂ ਕਿਸੇ ਮਨੁੱਖੀ ਲਾਪਰਵਾਹੀ ਦੀ ਇੱਕ ਨਿੱਕੀ ਜਿਹੀ ਚੰਗਿਆੜੀ ਵੀ ਸੈਂਕੜੇ ਵਰਗ ਕਿਲੋਮੀਟਰ ਖੇਤਰ ਨੂੰ ਅੱਗ ਦੀ ਭੱਠੀ ਬਣਾਉਣ ਲਈ ਕਾਫ਼ੀ ਸਾਬਤ ਹੁੰਦੀ ਹੈ।
ਸਾਲ 2023 ਦਾ ਵਾਈਲਡਫਾਇਰ ਸੀਜ਼ਨ ਕੈਨੇਡਾ ਦੇ ਇਤਿਹਾਸ ਦਾ ਸਭ ਤੋਂ ਵੱਧ ਵਿਨਾਸ਼ਕਾਰੀ ਸਾਲ ਸਾਬਤ ਹੋਇਆ ਸੀ, ਜਿਸ ਨੇ ਪਿਛਲੇ ਸਾਰੇ ਰਿਕਾਰਡ ਤੋੜ ਦਿੱਤੇ ਸਨ। ਉਸ ਸਾਲ ਦੌਰਾਨ 18 ਮਿਲੀਅਨ ਹੈਕਟੇਅਰ ਤੋਂ ਵੱਧ ਜੰਗਲੀ ਰਕਬਾ ਸੜ ਕੇ ਸੁਆਹ ਹੋ ਗਿਆ ਸੀ, ਜੋ ਕਿ ਪਿਛਲੇ 10 ਸਾਲਾਂ ਦੀ ਔਸਤ ਨਾਲੋਂ ਲਗਭਗ ਛੇ ਗੁਣਾ ਵੱਧ ਸੀ। ਉਸ ਦੌਰਾਨ 6000 ਤੋਂ ਵੱਧ ਥਾਵਾਂ ‘ਤੇ ਅੱਗ ਲੱਗਣ ਦੀਆਂ ਘਟਨਾਵਾਂ ਦਰਜ ਕੀਤੀਆਂ ਗਈਆਂ ਸਨ ਅਤੇ 200000 ਤੋਂ ਵੱਧ ਲੋਕਾਂ ਨੂੰ ਆਪਣੇ ਘਰ ਬਾਰ ਛੱਡ ਕੇ ਸੁਰੱਖਿਅਤ ਥਾਵਾਂ ‘ਤੇ ਸ਼ਰਨ ਲੈਣੀ ਪਈ ਸੀ। ਸਾਲ 2024 ਅਤੇ ਇਸ ਤੋਂ ਬਾਅਦ ਦੇ ਸਾਲਾਂ ਵਿੱਚ ਵੀ ਇਹ ਸਿਲਸਿਲਾ ਰੁਕਣ ਦਾ ਨਾਮ ਨਹੀਂ ਲੈ ਰਿਹਾ। ਕਈ ਇਲਾਕਿਆਂ ਵਿੱਚ ਸਰਦੀਆਂ ਦੇ ਮਹੀਨਿਆਂ ਦੌਰਾਨ ਵੀ ਜ਼ਮੀਨਦੋਜ਼ ਅੱਗਾਂ ਬਰਫ਼ ਦੇ ਹੇਠਾਂ ਸੁਲਗਦੀਆਂ ਰਹਿੰਦੀਆਂ ਹਨ, ਜਿਨ੍ਹਾਂ ਨੂੰ ਜ਼ੋਂਬੀ ਫਾਇਰਜ਼ ਕਿਹਾ ਜਾਂਦਾ ਹੈ, ਅਤੇ ਗਰਮੀ ਆਉਂਦੇ ਹੀ ਇਹ ਮੁੜ ਭਾਂਬੜ ਬਣ ਕੇ ਧਰਤੀ ਉੱਤੇ ਨਿਕਲ ਆਉਂਦੀਆਂ ਹਨ।
ਵਾਤਾਵਰਣ ਦੇ ਪੱਖ ਤੋਂ ਦੇਖਿਆ ਜਾਵੇ ਤਾਂ ਕੈਨੇਡਾ ਦੇ ਬੋਰੀਅਲ ਜੰਗਲ ਧਰਤੀ ਲਈ ਕਾਰਬਨ ਨੂੰ ਜਜ਼ਬ ਕਰਨ ਵਾਲੇ ਬਹੁਤ ਵੱਡੇ ਕੁਦਰਤੀ ਭੰਡਾਰ ਹਨ। ਇਹ ਜੰਗਲ ਅਤੇ ਇਹਨਾਂ ਦੇ ਹੇਠਲੀ ਦਲਦਲੀ ਜ਼ਮੀਨ ਸਦੀਆਂ ਤੋਂ ਅਰਬਾਂ ਟਨ ਕਾਰਬਨ ਨੂੰ ਆਪਣੇ ਅੰਦਰ ਸਮੋਈ ਬੈਠੀ ਹੈ। ਪਰ ਜਦੋਂ ਇਹ ਵਿਸ਼ਾਲ ਜੰਗਲ ਸੜਦੇ ਹਨ ਤਾਂ ਇਹ ਕਾਰਬਨ ਸਿੰਕ ਬਣਨ ਦੀ ਬਜਾਏ ਉਲਟਾ ਕਾਰਬਨ ਦਾ ਨਿਕਾਸ ਕਰਨ ਵਾਲੇ ਸਰੋਤ ਬਣ ਜਾਂਦੇ ਹਨ। ਇੱਕੋ ਸੀਜ਼ਨ ਵਿੱਚ ਲੱਗਣ ਵਾਲੀਆਂ ਅੱਗਾਂ ਸੈਂਕੜੇ ਮਿਲੀਅਨ ਟਨ ਕਾਰਬਨ ਡਾਈਆਕਸਾਈਡ ਅਤੇ ਹੋਰ ਜ਼ਹਿਰੀਲੀਆਂ ਗੈਸਾਂ ਵਾਯੂਮੰਡਲ ਵਿੱਚ ਛੱਡ ਦਿੰਦੀਆਂ ਹਨ, ਜੋ ਕਿ ਕੈਨੇਡਾ ਦੇ ਸਮੁੱਚੇ ਉਦਯੋਗਿਕ, ਟਰਾਂਸਪੋਰਟ ਅਤੇ ਊਰਜਾ ਖੇਤਰ ਵੱਲੋਂ ਸਾਲ ਭਰ ਵਿੱਚ ਕੀਤੇ ਜਾਣ ਵਾਲੇ ਕੁੱਲ ਪ੍ਰਦੂਸ਼ਣ ਨਾਲੋਂ ਵੀ ਵੱਧ ਹੁੰਦੀਆਂ ਹਨ। ਇਹ ਸਥਿਤੀ ਇੱਕ ਅਜਿਹਾ ਖ਼ਤਰਨਾਕ ਚੱਕਰ ਪੈਦਾ ਕਰਦੀ ਹੈ ਜਿੱਥੇ ਅੱਗਾਂ ਨਾਲ ਵਾਯੂਮੰਡਲ ਗਰਮ ਹੁੰਦਾ ਹੈ ਅਤੇ ਵਧਦੀ ਗਰਮੀ ਮੁੜ ਹੋਰ ਭਿਆਨਕ ਅੱਗਾਂ ਨੂੰ ਜਨਮ ਦਿੰਦੀ ਹੈ।
ਇਹਨਾਂ ਅੱਗਾਂ ਦਾ ਅਸਰ ਸਿਰਫ਼ ਜੰਗਲਾਂ ਤੱਕ ਸੀਮਤ ਨਹੀਂ ਰਹਿੰਦਾ, ਸਗੋਂ ਇਹ ਜਨਤਕ ਸਿਹਤ ਲਈ ਵੀ ਇੱਕ ਗੰਭੀਰ ਖ਼ਤਰਾ ਬਣ ਚੁੱਕਾ ਹੈ। ਜੰਗਲੀ ਅੱਗਾਂ ਵਿੱਚੋਂ ਨਿਕਲਣ ਵਾਲਾ ਧੂੰਆਂ ਬਰੀਕ ਕਣਾਂ ਪੀਐੱਮ 2.5 ਨਾਲ ਭਰਪੂਰ ਹੁੰਦਾ ਹੈ, ਜੋ ਸਾਹ ਰਾਹੀਂ ਮਨੁੱਖੀ ਫੇਫੜਿਆਂ ਅਤੇ ਖ਼ੂਨ ਦੇ ਗੇੜ ਵਿੱਚ ਦਾਖ਼ਲ ਹੋ ਜਾਂਦੇ ਹਨ। ਇਹ ਧੂੰਆਂ ਹਜ਼ਾਰਾਂ ਕਿਲੋਮੀਟਰ ਦਾ ਸਫ਼ਰ ਤੈਅ ਕਰਕੇ ਟੋਰਾਂਟੋ, ਮਾਂਟਰੀਅਲ, ਓਟਾਵਾ ਅਤੇ ਅਮਰੀਕਾ ਦੇ ਨਿਊਯਾਰਕ ਤੇ ਸ਼ਿਕਾਗੋ ਵਰਗੇ ਵੱਡੇ ਸ਼ਹਿਰਾਂ ਦੇ ਅਸਮਾਨ ਨੂੰ ਸੰਤਰੀ ਰੰਗ ਵਿੱਚ ਢਕ ਲੈਂਦਾ ਹੈ। ਕਈ ਵਾਰ ਇਹਨਾਂ ਸ਼ਹਿਰਾਂ ਦਾ ਏਅਰ ਕੁਆਲਿਟੀ ਇੰਡੈਕਸ ਦੁਨੀਆ ਵਿੱਚ ਸਭ ਤੋਂ ਵੱਧ ਪ੍ਰਦੂਸ਼ਿਤ ਸ਼ਹਿਰਾਂ ਨਾਲੋਂ ਵੀ ਖ਼ਰਾਬ ਦਰਜ ਕੀਤਾ ਗਿਆ ਹੈ। ਇਸ ਦੇ ਸਿੱਟੇ ਵਜੋਂ ਦਮਾ, ਸਾਹ ਦੀਆਂ ਬਿਮਾਰੀਆਂ, ਦਿਲ ਦੇ ਦੌਰੇ ਅਤੇ ਅੱਖਾਂ ਦੀਆਂ ਤਕਲੀਫ਼ਾਂ ਦੇ ਮਰੀਜ਼ਾਂ ਵਿੱਚ ਭਾਰੀ ਵਾਧਾ ਹੁੰਦਾ ਹੈ, ਜਿਸ ਨਾਲ ਹਸਪਤਾਲਾਂ ਅਤੇ ਐਮਰਜੈਂਸੀ ਸੇਵਾਵਾਂ ‘ਤੇ ਅਸਹਿਣਯੋਗ ਦਬਾਅ ਪੈਂਦਾ ਹੈ।
ਜੰਗਲੀ ਜੀਵ ਜੰਤੂਆਂ ਅਤੇ ਜੈਵ ਵਿਭਿੰਨਤਾ ਲਈ ਇਹ ਅੱਗਾਂ ਤਬਾਹੀ ਦਾ ਦੂਜਾ ਨਾਮ ਹਨ। ਕੈਨੇਡਾ ਦੇ ਜੰਗਲ ਲੱਖਾਂ ਪ੍ਰਜਾਤੀਆਂ ਦੇ ਜੰਗਲੀ ਜਾਨਵਰਾਂ, ਪੰਛੀਆਂ ਅਤੇ ਦੁਰਲੱਭ ਪੌਦਿਆਂ ਦਾ ਰੈਣ ਬਸੇਰਾ ਹਨ। ਅੱਗ ਦੇ ਅਚਾਨਕ ਅਤੇ ਤੇਜ਼ੀ ਨਾਲ ਫੈਲਣ ਕਾਰਨ ਅਣਗਿਣਤ ਜੀਵ ਜਿਊਂਦੇ ਸੜ ਜਾਂਦੇ ਹਨ ਅਤੇ ਜੋ ਬਚ ਨਿਕਲਦੇ ਹਨ, ਉਹਨਾਂ ਦੇ ਕੁਦਰਤੀ ਨਿਵਾਸ ਅਸਥਾਨ ਹਮੇਸ਼ਾ ਲਈ ਤਬਾਹ ਹੋ ਜਾਂਦੇ ਹਨ। ਭੂਰੇ ਰਿੱਛ, ਬਾਰਾਂਸਿੰਘੇ, ਬਘਿਆੜ ਅਤੇ ਜੰਗਲੀ ਪੰਛੀਆਂ ਦੀਆਂ ਕਈ ਦੁਰਲੱਭ ਨਸਲਾਂ ਆਪਣੀ ਹੋਂਦ ਬਚਾਉਣ ਲਈ ਸੰਘਰਸ਼ ਕਰ ਰਹੀਆਂ ਹਨ। ਇਸ ਤੋਂ ਇਲਾਵਾ, ਜੰਗਲਾਂ ਦੇ ਸੜਨ ਨਾਲ ਦਰਿਆਵਾਂ ਅਤੇ ਝੀਲਾਂ ਦੇ ਪਾਣੀ ਦਾ ਤਾਪਮਾਨ ਵਧ ਜਾਂਦਾ ਹੈ ਅਤੇ ਸੁਆਹ ਪਾਣੀ ਦੇ ਸਰੋਤਾਂ ਵਿੱਚ ਘੁਲਣ ਕਾਰਨ ਮੱਛੀਆਂ ਅਤੇ ਜਲਜੀਵਾਂ ਦੀਆਂ ਪ੍ਰਜਾਤੀਆਂ ਵੀ ਤਬਾਹ ਹੋ ਜਾਂਦੀਆਂ ਹਨ।
ਸਥਾਨਕ ਭਾਈਚਾਰਿਆਂ ਅਤੇ ਮੂਲ ਨਿਵਾਸੀਆਂ ਫਸਟ ਨੇਸ਼ਨਜ਼ ‘ਤੇ ਇਸ ਸੰਕਟ ਦੀ ਸਭ ਤੋਂ ਡੂੰਘੀ ਮਾਰ ਪੈਂਦੀ ਹੈ। ਉੱਤਰੀ ਅਤੇ ਦੂਰ ਦੁਰਾਡੇ ਦੇ ਖੇਤਰਾਂ ਵਿੱਚ ਸਥਿਤ ਇਹ ਭਾਈਚਾਰੇ ਸਦੀਆਂ ਤੋਂ ਜੰਗਲਾਂ ਦੇ ਨੇੜੇ ਰਹਿ ਕੇ ਆਪਣਾ ਜੀਵਨ ਬਸਰ ਕਰਦੇ ਆਏ ਹਨ। ਅੱਗ ਲੱਗਣ ਦੀ ਸੂਰਤ ਵਿੱਚ ਇਹਨਾਂ ਖੇਤਰਾਂ ਵਿੱਚੋਂ ਬਾਹਰ ਨਿਕਲਣ ਦੇ ਸੀਮਤ ਰਸਤੇ ਹੁੰਦੇ ਹਨ। ਪਿੰਡਾਂ ਦੇ ਪਿੰਡ ਖ਼ਾਲੀ ਕਰਵਾਉਣੇ ਪੈਂਦੇ ਹਨ ਅਤੇ ਲੋਕਾਂ ਦੇ ਘਰ, ਸਕੂਲ ਅਤੇ ਜੀਵਨ ਭਰ ਦੀ ਪੂੰਜੀ ਸੁਆਹ ਦੇ ਢੇਰ ਵਿੱਚ ਬਦਲ ਜਾਂਦੀ ਹੈ। ਮੂਲ ਨਿਵਾਸੀਆਂ ਦੇ ਸੱਭਿਆਚਾਰਕ ਸਥਾਨਾਂ, ਪਰੰਪਰਾਗਤ ਸ਼ਿਕਾਰਗਾਹਾਂ ਅਤੇ ਦਵਾਈਆਂ ਦੇ ਪੌਦਿਆਂ ਦੇ ਨਸ਼ਟ ਹੋਣ ਨਾਲ ਉਹਨਾਂ ਦੀ ਸੱਭਿਆਚਾਰਕ ਵਿਰਾਸਤ ਨੂੰ ਵੀ ਕਦੇ ਨਾ ਪੂਰਾ ਹੋਣ ਵਾਲਾ ਨੁਕਸਾਨ ਪਹੁੰਚ ਰਿਹਾ ਹੈ।
ਆਰਥਿਕ ਪੱਖੋਂ ਵੀ ਕੈਨੇਡਾ ਨੂੰ ਇਹਨਾਂ ਜੰਗਲੀ ਅੱਗਾਂ ਕਾਰਨ ਅਰਬਾਂ ਡਾਲਰਾਂ ਦਾ ਖ਼ਮਿਆਜ਼ਾ ਭੁਗਤਣਾ ਪੈ ਰਿਹਾ ਹੈ। ਅੱਗ ਬੁਝਾਉਣ ਦੇ ਕਾਰਜਾਂ, ਜਹਾਜ਼ਾਂ ਦੀ ਵਰਤੋਂ, ਐਮਰਜੈਂਸੀ ਰਾਹਤ ਕਾਰਜਾਂ ਅਤੇ ਹਜ਼ਾਰਾਂ ਫਾਇਰਫਾਈਟਰਾਂ ਦੀ ਤੈਨਾਤੀ ‘ਤੇ ਹਰ ਸਾਲ ਭਾਰੀ ਧਨ ਖ਼ਰਚਿਆ ਜਾਂਦਾ ਹੈ। ਲੱਕੜ ਉਦਯੋਗ, ਜੋ ਕਿ ਕੈਨੇਡੀਅਨ ਅਰਥਵਿਵਸਥਾ ਦਾ ਇੱਕ ਮਜ਼ਬੂਤ ਥੰਮ੍ਹ ਹੈ, ਜੰਗਲਾਂ ਦੇ ਨਸ਼ਟ ਹੋਣ ਕਾਰਨ ਗੰਭੀਰ ਮੰਦੀ ਦਾ ਸਾਹਮਣਾ ਕਰ ਰਿਹਾ ਹੈ। ਸੈਰ ਸਪਾਟਾ ਖੇਤਰ ਨੂੰ ਵੀ ਧੂੰਏਂ ਅਤੇ ਯਾਤਰਾ ਪਾਬੰਦੀਆਂ ਕਾਰਨ ਕਰੋੜਾਂ ਡਾਲਰ ਦਾ ਘਾਟਾ ਸਹਿਣਾ ਪੈਂਦਾ ਹੈ। ਬੀਮਾ ਕੰਪਨੀਆਂ ਵੱਲੋਂ ਅਦਾ ਕੀਤੇ ਜਾਣ ਵਾਲੇ ਦਾਅਵਿਆਂ ਦੇ ਅੰਕੜੇ ਅਸਮਾਨ ਛੂਹ ਰਹੇ ਹਨ, ਜਿਸ ਕਾਰਨ ਆਮ ਲੋਕਾਂ ਲਈ ਜਾਇਦਾਦ ਦਾ ਬੀਮਾ ਕਰਵਾਉਣਾ ਵੀ ਬਹੁਤ ਮਹਿੰਗਾ ਹੁੰਦਾ ਜਾ ਰਿਹਾ ਹੈ।
ਇਸ ਬੇਕਾਬੂ ਸੰਕਟ ਨਾਲ ਨਜਿੱਠਣ ਲਈ ਫੈਡਰਲ ਸਰਕਾਰ ਅਤੇ ਸੂਬਾਈ ਪ੍ਰਸ਼ਾਸਨ ਵੱਲੋਂ ਕਈ ਯਤਨ ਕੀਤੇ ਜਾ ਰਹੇ ਹਨ। ਫੈਡਰਲ ਪੱਧਰ ‘ਤੇ ਨਵੇਂ ਅਤਿ ਆਧੁਨਿਕ ਉਪਕਰਣਾਂ, ਸੈਟੇਲਾਈਟ ਨਿਗਰਾਨੀ ਪ੍ਰਣਾਲੀਆਂ ਅਤੇ ਅੱਗ ਬੁਝਾਊ ਜਹਾਜ਼ਾਂ ਦੀ ਖ਼ਰੀਦ ਲਈ ਫੰਡ ਜਾਰੀ ਕੀਤੇ ਗਏ ਹਨ। ਫੈਡਰਲ ਸਰਕਾਰ ਨੇ ਫੌਜ ਦੀਆਂ ਟੁਕੜੀਆਂ ਨੂੰ ਵੀ ਐਮਰਜੈਂਸੀ ਰਾਹਤ ਕਾਰਜਾਂ ਵਿੱਚ ਸ਼ਾਮਲ ਕੀਤਾ ਹੈ। ਇਸ ਤੋਂ ਇਲਾਵਾ, ਅਮਰੀਕਾ, ਆਸਟ੍ਰੇਲੀਆ, ਦੱਖਣੀ ਅਫ਼ਰੀਕਾ, ਨਿਊਜ਼ੀਲੈਂਡ ਅਤੇ ਮੈਕਸੀਕੋ ਵਰਗੇ ਦੋਸਤ ਮੁਲਕਾਂ ਤੋਂ ਹਜ਼ਾਰਾਂ ਅੰਤਰਰਾਸ਼ਟਰੀ ਫਾਇਰਫਾਈਟਰਾਂ ਦੀ ਮਦਦ ਲਈ ਜਾ ਰਹੀ ਹੈ। ਫੈਡਰਲ ਨੀਤੀ ਘਾੜੇ ਹੁਣ ਮੂਲ ਨਿਵਾਸੀਆਂ ਦੀ ਰਵਾਇਤੀ ਅੱਗ ਪ੍ਰਬੰਧਨ ਵਿਧੀ, ਜਿਸ ਵਿੱਚ ਨਿਯੰਤਰਿਤ ਢੰਗ ਨਾਲ ਸੁੱਕੀ ਝਾੜੀ ਨੂੰ ਪਹਿਲਾਂ ਹੀ ਸਾੜ ਦਿੱਤਾ ਜਾਂਦਾ ਹੈ, ਨੂੰ ਮੁੜ ਅਪਣਾਉਣ ‘ਤੇ ਜ਼ੋਰ ਦੇ ਰਹੇ ਹਨ ਤਾਂ ਜੋ ਵੱਡੀ ਅੱਗ ਨੂੰ ਰੋਕਿਆ ਜਾ ਸਕੇ।
ਪਰ ਇਹ ਸਮਝਣਾ ਜ਼ਰੂਰੀ ਹੈ ਕਿ ਸਿਰਫ਼ ਅੱਗ ਬੁਝਾਉਣ ਵਾਲੀਆਂ ਗੱਡੀਆਂ ਜਾਂ ਜਹਾਜ਼ਾਂ ਦੀ ਗਿਣਤੀ ਵਧਾ ਕੇ ਇਸ ਸਮੱਸਿਆ ਦਾ ਪੱਕਾ ਹੱਲ ਨਹੀਂ ਲੱਭਿਆ ਜਾ ਸਕਦਾ। ਜਦੋਂ ਤੱਕ ਜਲਵਾਯੂ ਪਰਿਵਰਤਨ ਦੀਆਂ ਮੂਲ ਜੜ੍ਹਾਂ ‘ਤੇ ਵਾਰ ਨਹੀਂ ਕੀਤਾ ਜਾਂਦਾ, ਉਦੋਂ ਤੱਕ ਇਹ ਆਫ਼ਤ ਹਰ ਸਾਲ ਹੋਰ ਭਿਆਨਕ ਰੂਪ ਧਾਰਨ ਕਰਦੀ ਰਹੇਗੀ। ਕਾਰਬਨ ਨਿਕਾਸ ਨੂੰ ਘਟਾਉਣਾ, ਜੰਗਲਾਂ ਦੀ ਸਾਂਭ ਸੰਭਾਲ ਲਈ ਸਖ਼ਤ ਨਿਯਮ ਬਣਾਉਣਾ ਅਤੇ ਜੰਗਲਾਂ ਦੇ ਨੇੜੇ ਵਸੇ ਸ਼ਹਿਰਾਂ ਨੂੰ ਫਾਇਰ ਸਮਾਰਟ ਬਣਾਉਣਾ ਅੱਜ ਦੇ ਸਮੇਂ ਦੀ ਸਭ ਤੋਂ ਮੁੱਖ ਮੰਗ ਹੈ।
ਕੈਨੇਡਾ ਦੇ ਜੰਗਲਾਂ ਵਿੱਚ ਭੜਕ ਰਹੀਆਂ ਇਹ ਅੱਗਾਂ ਸਮੁੱਚੀ ਮਨੁੱਖਤਾ ਲਈ ਕੁਦਰਤ ਵੱਲੋਂ ਇੱਕ ਸਪਸ਼ਟ ਚਿਤਾਵਨੀ ਹਨ। ਇਹ ਲਪਟਾਂ ਇਸ ਗੱਲ ਦਾ ਸਬੂਤ ਹਨ ਕਿ ਧਰਤੀ ਦਾ ਵਾਤਾਵਰਣਿਕ ਸੰਤੁਲਨ ਬਹੁਤ ਤੇਜ਼ੀ ਨਾਲ ਵਿਗੜ ਰਿਹਾ ਹੈ। ਜੇਕਰ ਵਿਸ਼ਵ ਪੱਧਰ ‘ਤੇ ਜਲਵਾਯੂ ਪਰਿਵਰਤਨ ਵਿਰੁੱਧ ਠੋਸ ਅਤੇ ਸਖ਼ਤ ਕਦਮ ਨਾ ਚੁੱਕੇ ਗਏ ਤਾਂ ਆਉਣ ਵਾਲੇ ਸਮੇਂ ਵਿੱਚ ਇਹ ਅੱਗਾਂ ਨਾ ਸਿਰਫ਼ ਕੈਨੇਡਾ ਦੇ ਕੁਦਰਤੀ ਸਰਮਾਏ ਨੂੰ ਸੁਆਹ ਕਰ ਦੇਣਗੀਆਂ, ਸਗੋਂ ਪੂਰੀ ਦੁਨੀਆ ਦੇ ਮੌਸਮੀ ਚੱਕਰ ਨੂੰ ਅਜਿਹੇ ਮੋੜ ‘ਤੇ ਲੈ ਜਾਣਗੀਆਂ ਜਿੱਥੋਂ ਵਾਪਸੀ ਅਸੰਭਵ ਹੋ ਜਾਵੇਗੀ।