ਕੈਂਸਰ ਦੇ ਮਰੀਜ਼ਾਂ ਲਈ ਰਾਹਤ, ਹੈਲਥ ਕੈਨੇਡਾ ਨੇ ਨਵੀਂ ਦਵਾਈ ਨੂੰ ਦਿੱਤੀ ਮਨਜ਼ੂਰੀ

ਵੈਨਕੂਵਰ (ਏਕਜੋਤ ਸਿੰਘ): ਹੈਲਥ ਕੈਨੇਡਾ ਨੇ ਛਾਤੀ ਦੇ ਕੈਂਸਰ ਵਾਲੀਆਂ ਔਰਤਾਂ ਨੂੰ ਰਾਹਤ ਦਿੰਦਿਆਂ ਇੱਕ ਨਵੀਂ ਦਵਾਈ ਨੂੰ ਮਨਜ਼ੂਰੀ ਦੇ ਦਿੱਤੀ ਹੈ। ਐਲਿਨਜ਼ਾਨੇਟੈਂਟ, ਜਿਸਨੂੰ ਲਿੰਕੁਏਟ ਦੇ ਨਾਂ ਨਾਲ ਵੀ ਜਾਣਿਆ ਜਾਂਦਾ ਹੈ, ਪਹਿਲਾਂ ਜੁਲਾਈ 2025 ਵਿੱਚ ਮੀਨੋਪੌਜ਼ ਵਾਲੀਆਂ ਔਰਤਾਂ ਲਈ ਮਨਜ਼ੂਰ ਕੀਤੀ ਗਈ ਸੀ। ਪਰ ਹੁਣ ਇੱਕ ਨਵੇਂ ਅਧਿਐਨ ਤੋਂ ਬਾਅਦ ਇਹ ਸਾਬਤ ਹੋਇਆ ਹੈ ਕਿ ਇਹ ਦਵਾਈ ਕੈਂਸਰ ਦੇ ਮਰੀਜ਼ਾਂ ਵਿੱਚ ਹੌਟ ਫਲੈਸ਼ ਅਤੇ ਰਾਤ ਨੂੰ ਪਸੀਨਾ ਆਉਣ ਵਰਗੀਆਂ ਸਮੱਸਿਆਵਾਂ ਨੂੰ ਠੀਕ ਕਰਨ ਵਿੱਚ ਵੀ ਕਾਰਗਰ ਹੈ। ਨਵੀਂ ਮਨਜ਼ੂਰੀ ਬੀਤੇ ਸ਼ੁੱਕਰਵਾਰ ਤੋਂ ਲਾਗੂ ਹੋ ਗਈ ਹੈ। ਲਗਭਗ ਦੋ ਤਿਹਾਈ ਛਾਤੀ ਦੇ ਕੈਂਸਰ ਹਾਰਮੋਨ ਨਾਲ ਜੁੜੇ ਹੁੰਦੇ ਹਨ। ਡਾਕਟਰ ਇਨ੍ਹਾਂ ਦਾ ਇਲਾਜ ਸਰੀਰ ਵਿੱਚ ਐਸਟ੍ਰੋਜਨ ਬਣਨ ਤੋਂ ਰੋਕ ਕੇ ਕਰਦੇ ਹਨ, ਜਿਸ ਕਾਰਨ ਮਰੀਜ਼ਾਂ ਨੂੰ ਹੌਟ ਫਲੈਸ਼ ਵਰਗੀਆਂ ਦਿੱਕਤਾਂ ਦਾ ਸਾਹਮਣਾ ਕਰਨਾ ਪੈਂਦਾ ਹੈ। ਟੋਰਾਂਟੋ ਦੇ ਸਿਨਾਈ ਹੈਲਥ ਦੇ ਕੈਂਸਰ ਪ੍ਰੋਗਰਾਮ ਦੀ ਮੈਡੀਕਲ ਡਾਇਰੈਕਟਰ ਡਾਕਟਰ ਕ੍ਰਿਸਟੀਨ ਦਾ ਕਹਿਣਾ ਹੈ ਕਿ ਕੈਂਸਰ ਵਾਲੀਆਂ ਔਰਤਾਂ ਕੋਲ ਇਨ੍ਹਾਂ ਸਮੱਸਿਆਵਾਂ ਤੋਂ ਬਚਣ ਲਈ ਬਹੁਤ ਘੱਟ ਬਦਲ ਹੁੰਦੇ ਹਨ। ਕੈਂਸਰ ਦੇ ਮਰੀਜ਼ਾਂ ਨੂੰ 5 ਤੋਂ 10 ਸਾਲਾਂ ਤੱਕ ਐਸਟ੍ਰੋਜਨ ਰੋਕਣ ਵਾਲੀਆਂ ਦਵਾਈਆਂ ਖਾਣੀਆਂ ਪੈਂਦੀਆਂ ਹਨ। ਹੌਟ ਫਲੈਸ਼ ਅਤੇ ਪਸੀਨਾ ਆਉਣ ਕਾਰਨ ਔਰਤਾਂ ਦੀ ਰੋਜ਼ਮੱਰਾ ਦੀ ਜ਼ਿੰਦਗੀ ਅਤੇ ਨੀਂਦ ਬੁਰੀ ਤਰ੍ਹਾਂ ਪ੍ਰਭਾਵਿਤ ਹੁੰਦੀ ਹੈ। ਇਹ ਸਮੱਸਿਆ ਇੰਨੀ ਜ਼ਿਆਦਾ ਵੱਧ ਜਾਂਦੀ ਹੈ ਕਿ ਕਈ ਵਾਰ ਮਰੀਜ਼ ਕੈਂਸਰ ਦੀ ਦਵਾਈ ਖਾਣੀ ਹੀ ਛੱਡ ਦਿੰਦੇ ਹਨ, ਜੋ ਕਿ ਬਹੁਤ ਖਤਰਨਾਕ ਹੋ ਸਕਦਾ ਹੈ। ਡਾਕਟਰ ਡੇਵ ਸੇਸਕੋਨ ਮੁਤਾਬਕ ਹੈਲਥ ਕੈਨੇਡਾ ਦਾ ਇਹ ਫੈਸਲਾ ਮਰੀਜ਼ਾਂ ਲਈ ਬਹੁਤ ਮਦਦਗਾਰ ਸਾਬਤ ਹੋਵੇਗਾ। ਟੋਰਾਂਟੋ ਦੀ ਰਹਿਣ ਵਾਲੀ 47 ਸਾਲਾ ਲੌਰੀ ਲੇਗੇਰੇ ਨੇ ਦੱਸਿਆ ਕਿ ਕੀਮੋਥੈਰੇਪੀ ਦੌਰਾਨ ਉਸਨੂੰ ਹੌਟ ਫਲੈਸ਼ ਦੀ ਬਹੁਤ ਭਿਆਨਕ ਸਮੱਸਿਆ ਆਈ, ਜਿਸ ਕਾਰਨ ਉਸਦੀ ਨੀਂਦ ਅਤੇ ਕੰਮ ਦੋਵੇਂ ਖਰਾਬ ਹੋਏ। ਪੁਰਾਣੀਆਂ ਦਵਾਈਆਂ ਨਾਲ ਉਸਨੂੰ ਕੋਈ ਫਾਇਦਾ ਨਹੀਂ ਹੋਇਆ, ਪਰ ਹੁਣ ਉਹ ਇਸ ਨਵੀਂ ਦਵਾਈ ਨੂੰ ਲੈ ਕੇ ਕਾਫੀ ਉਮੀਦਵਾਰ ਹੈ। ਬਾਇਰ ਕੰਪਨੀ ਦੀ ਇਸ ਦਵਾਈ ਦਾ ਕਲੀਨਿਕਲ ਟ੍ਰਾਇਲ 395 ਔਰਤਾਂ ਉੱਤੇ ਕੀਤਾ ਗਿਆ ਸੀ। ਨਤੀਜਿਆਂ ਵਿੱਚ ਸਾਹਮਣੇ ਆਇਆ ਕਿ ਦਵਾਈ ਲੈਣ ਵਾਲੀਆਂ ਔਰਤਾਂ ਦੀਆਂ ਸਮੱਸਿਆਵਾਂ ਵਿੱਚ ਕਾਫੀ ਕਮੀ ਆਈ ਅਤੇ ਉਨ੍ਹਾਂ ਦੀ ਨੀਂਦ ਵਿੱਚ ਸੁਧਾਰ ਹੋਇਆ। ਟ੍ਰਾਇਲ ਖਤਮ ਹੋਣ ਤੋਂ ਬਾਅਦ 91.6 ਫੀਸਦੀ ਔਰਤਾਂ ਨੇ ਅਗਲੇ ਦੋ ਸਾਲਾਂ ਤੱਕ ਇਸ ਦਵਾਈ ਨੂੰ ਜਾਰੀ ਰੱਖਣ ਦਾ ਫੈਸਲਾ ਕੀਤਾ। This report was written by Ekjot Singh as part of the Local Journalism Initiative.