ਆਇਰਨਵਰਕਰਜ਼ ਪੁੱਲ ਮੁਰੰਮਤ ਦੇ ਕਾਰਨ 4 ਸਤੰਬਰ ਤੱਕ ਰਹੇਗਾ ਬੰਦ

ਵੈਨਕੂਵਰ (ਏਕਜੋਤ ਸਿੰਘ): ਜੇਕਰ ਤੁਸੀਂ ਵੈਨਕੂਵਰ ਦੇ ਆਇਰਨਵਰਕਰਜ਼ ਬ੍ਰਿਜ ਦੀ ਵਰਤੋਂ ਕਰਦੇ ਹੋ, ਤਾਂ ਤੁਹਾਨੂੰ ਆਉਣ ਵਾਲੇ ਦਿਨਾਂ ਵਿੱਚ ਆਪਣੇ ਸਫ਼ਰ ਲਈ ਕੁਝ ਵਾਧੂ ਸਮਾਂ ਰੱਖਣਾ ਪਵੇਗਾ। ਇਸ ਪੁਲ ਉੱਤੇ ਮੁਰੰਮਤ ਦਾ ਕੰਮ ਚੱਲ ਰਿਹਾ ਹੈ, ਜਿਸ ਕਾਰਨ ਆਵਾਜਾਈ ਪ੍ਰਭਾਵਿਤ ਹੋਵੇਗੀ। ਡੋਲਾਰਟਨ ਹਾਈਵੇਅ ਦਾ ਆਨਰੈਂਪ, ਜੋ ਪੂਰਬ ਵੱਲ ਜਾਣ ਵਾਲੀ ਆਵਾਜਾਈ ਨੂੰ ਆਇਰਨਵਰਕਰਜ਼ ਬ੍ਰਿਜ ਵੱਲ ਭੇਜਦਾ ਹੈ, ਸੋਮਵਾਰ 17 ਅਗਸਤ ਤੋਂ ਲੈ ਕੇ ਸ਼ੁੱਕਰਵਾਰ 4 ਸਤੰਬਰ ਤੱਕ ਬੰਦ ਰਹੇਗਾ। ਇਹ ਰਸਤਾ ਰੋਜ਼ਾਨਾ ਰਾਤ 8 ਵਜੇ ਤੋਂ ਲੈ ਕੇ ਸਵੇਰੇ 6 ਵਜੇ ਤੱਕ ਬੰਦ ਰੱਖਿਆ ਜਾਵੇਗਾ। ਇਸ ਦੌਰਾਨ ਡਰਾਈਵਰਾਂ ਦੀ ਸਹੂਲਤ ਲਈ ਬਦਲਵੇਂ ਰਸਤੇ ਦਾ ਪ੍ਰਬੰਧ ਕੀਤਾ ਗਿਆ ਹੈ। ਡਰਾਈਵਰ ਡੋਲਾਰਟਨ ਤੋਂ ਪੱਛਮ ਵੱਲ ਜਾਣ ਵਾਲੇ ਹਾਈਵੇਅ 1 ਦੇ ਆਨਰੈਂਪ ਦੀ ਵਰਤੋਂ ਕਰ ਸਕਦੇ ਹਨ।
ਇਸ ਬਦਲਵੇਂ ਰਸਤੇ ਰਾਹੀਂ ਡਰਾਈਵਰ ਐਗਜ਼ਿਟ 22ਬੀ ਰਾਹੀਂ ਮਾਊਂਟ ਸੀਮੋਰ ਪਾਰਕਵੇਅ ਵੱਲ ਜਾ ਸਕਦੇ ਹਨ ਅਤੇ ਉੱਥੋਂ ਕੀਥ ਰੋਡ ਤੋਂ ਖੱਬੇ ਮੁੜ ਸਕਦੇ ਹਨ। ਪ੍ਰਸ਼ਾਸਨ ਨੇ ਲੋਕਾਂ ਨੂੰ ਅਪਡੇਟ ਰਹਿਣ ਲਈ ਡਰਾਈਵਬੀਸੀ ਦੇ ਪੋਰਟਲ ਉੱਤੇ ਜਾਣਕਾਰੀ ਚੈੱਕ ਕਰਦੇ ਰਹਿਣ ਦੀ ਸਲਾਹ ਦਿੱਤੀ ਹੈ। ਲੋਅਰ ਮੇਨਲੈਂਡ ਦੇ ਡਰਾਈਵਰਾਂ ਨੂੰ ਹੋਰ ਵੀ ਕਈ ਸੜਕਾਂ ਉੱਤੇ ਦੇਰੀ ਦਾ ਸਾਹਮਣਾ ਕਰਨਾ ਪੈ ਸਕਦਾ ਹੈ। ਸੂਬਾ ਸਰਕਾਰ ਇਸ ਗਰਮੀ ਦੇ ਮੌਸਮ ਵਿੱਚ ਲੋਅਰ ਮੇਨਲੈਂਡ ਅਤੇ ਵੈਨਕੂਵਰ ਆਈਲੈਂਡ ਵਿੱਚ 200 ਕਿਲੋਮੀਟਰ ਤੋਂ ਵੱਧ ਹਾਈਵੇਅ ਅਤੇ ਸੜਕਾਂ ਦੀ ਮੁੜ ਉਸਾਰੀ ਉੱਤੇ 100 ਮਿਲੀਅਨ ਡਾਲਰ ਤੋਂ ਵੱਧ ਦਾ ਨਿਵੇਸ਼ ਕਰ ਰਹੀ ਹੈ। ਇਸ ਕੰਮ ਵਿੱਚ ਐਬਟਸਫੋਰਡ, ਹੋਪ ਅਤੇ ਨੌਰਥ ਸ਼ੋਰ ਦੇ ਇਲਾਕੇ ਸ਼ਾਮਲ ਹਨ। ਇਸ ਤੋਂ ਇਲਾਵਾ ਫਰੇਜ਼ਰ ਵੈਲੀ ਵਿੱਚ ਹਾਈਵੇਅ 1 ਨੂੰ ਚੌੜਾ ਕਰਨ ਦਾ ਕੰਮ ਵੀ ਇਸ ਸਾਲ ਜਾਰੀ ਹੈ। ਸੂਬਾ ਸਰਕਾਰ ਮਾਊਂਟ ਲੇਹਮੈਨ ਇੰਟਰਚੇਂਜ ਉੱਤੇ ਲੇਨਾਂ ਦੀ ਗਿਣਤੀ ਤਿੰਨ ਤੋਂ ਵਧਾ ਕੇ ਪੰਜ ਕਰ ਰਹੀ ਹੈ। ਉਸਾਰੀ ਦੇ ਕੰਮ ਨੂੰ ਧਿਆਨ ਵਿੱਚ ਰੱਖਦੇ ਹੋਏ, ਮਾਊਂਟ ਲੇਹਮੈਨ ਢਾਂਚੇ ਉੱਤੇ ਆਵਾਜਾਈ ਨੂੰ ਤਿੰਨ ਲੇਨਾਂ ਤੋਂ ਘਟਾ ਕੇ ਦੋ ਲੇਨਾਂ ਤੱਕ ਸੀਮਤ ਕਰ ਦਿੱਤਾ ਗਿਆ ਹੈ। ਅਧਿਕਾਰੀਆਂ ਮੁਤਾਬਕ ਇਹ ਕੰਮ ਅਤੇ ਆਵਾਜਾਈ ਵਿੱਚ ਇਹ ਤਬਦੀਲੀ 2026 ਦੇ ਅੰਤ ਤੱਕ ਜਾਰੀ ਰਹਿਣ ਦੀ ਉਮੀਦ ਹੈ। ਇਸ ਲਈ ਸਫ਼ਰ ਕਰਨ ਵਾਲਿਆਂ ਨੂੰ ਆਪਣੇ ਰੂਟ ਦੀ ਯੋਜਨਾ ਪਹਿਲਾਂ ਤੋਂ ਹੀ ਬਣਾ ਲੈਣੀ ਚਾਹੀਦੀ ਹੈ। This report was written by Ekjot Singh as part of the Local Journalism Initiative.