ਸਰੀ ਦੇ ਟਮਨਾਵਿਸ ਪਾਰਕ ਵਿੱਚ ਕੈਨੇਡਾ ਦਾ ਤੀਜਾ ਵਾਟਰ ਬੇਸਡ ਫੀਲਡ ਹਾਕੀ ਮੈਦਾਨ ਤਿਆਰ

ਵੈਨਕੂਵਰ (ਏਕਜੋਤ ਸਿੰਘ): ਸਰੀ ਸਿਟੀ ਕੌਂਸਲ ਵੱਲੋਂ ਮੰਗਲਵਾਰ ਨੂੰ ਟਮਨਾਵਿਸ ਪਾਰਕ ਵਿਖੇ ਤੀਜੇ ਵਾਟਰ ਬੇਸਡ ਸਿੰਥੈਟਿਕ ਟਰਫ ਫੀਲਡ ਦੇ ਮੁਕੰਮਲ ਹੋਣ ਦਾ ਜਸ਼ਨ ਮਨਾਇਆ ਗਿਆ। ਇਸ ਨਵੇਂ ਮੈਦਾਨ ਦੇ ਬਣਨ ਨਾਲ ਟਮਨਾਵਿਸ ਪਾਰਕ ਕੈਨੇਡਾ ਦਾ ਇੱਕਲੌਤਾ ਅਜਿਹਾ ਫੀਲਡ ਹਾਕੀ ਕੰਪਲੈਕਸ ਬਣ ਗਿਆ ਹੈ ਜਿੱਥੇ ਉੱਚ ਪੱਧਰੀ ਮੁਕਾਬਲਿਆਂ ਲਈ ਤਿੰਨ ਐਲੀਟ ਪੱਧਰ ਦੇ ਮੈਦਾਨ ਮੌਜੂਦ ਹਨ। ਸਰੀ ਦੀ ਮੇਅਰ ਬ੍ਰੈਂਡਾ ਲੌਕ ਨੇ ਕਿਹਾ ਕਿ ਸਰੀ ਖੇਤਰ ਫੀਲਡ ਹਾਕੀ ਲਈ ਦੇਸ਼ ਦੇ ਪ੍ਰਮੁੱਖ ਸਥਾਨਾਂ ਵਿੱਚੋਂ ਇੱਕ ਬਣ ਗਿਆ ਹੈ, ਜਿੱਥੇ 2026 ਦੀਆਂ ਯੂ18 ਨੈਸ਼ਨਲ ਚੈਂਪੀਅਨਸ਼ਿਪਾਂ ਸਮੇਤ ਕਈ ਟੂਰਨਾਮੈਂਟ ਕਰਵਾਏ ਜਾ ਰਹੇ ਹਨ।
ਉੱਚ ਪੱਧਰੀ ਮੁਕਾਬਲਿਆਂ ਲਈ ਵਾਟਰ ਬੇਸਡ ਟਰਫ ਬਹੁਤ ਜ਼ਰੂਰੀ ਹੁੰਦਾ ਹੈ, ਜਿਸ ਵਿੱਚ ਛੋਟੀ ਅਤੇ ਸੰਘਣੀ ਨਕਲੀ ਘਾਹ ਹੁੰਦੀ ਹੈ। ਇਸ ਉੱਤੇ ਸਮੇਂ ਸਮੇਂ ਸਿਰ ਪਾਣੀ ਦਾ ਛਿੜਕਾਅ ਕੀਤਾ ਜਾਂਦਾ ਹੈ ਤਾਂ ਜੋ ਖੇਡਣ ਲਈ ਇੱਕ ਨਿਰਵਿਘਨ ਅਤੇ ਤੇਜ਼ ਸਤਹ ਪ੍ਰਦਾਨ ਕੀਤੀ ਜਾ ਸਕੇ। ਇਸ ਨਵੇਂ ਮੈਦਾਨ ਉੱਤੇ 4.94 ਮਿਲੀਅਨ ਡਾਲਰ ਦਾ ਨਿਵੇਸ਼ ਕੀਤਾ ਗਿਆ ਹੈ ਜੋ ਕਿ ਸਿਟੀ ਦੇ ਪਾਰਕਸ ਵਿਭਾਗ, ਸੂਬਾਈ ਗੇਮਿੰਗ ਮਾਲੀਏ ਅਤੇ ਕੈਨੇਡਾ ਕਮਿਊਨਿਟੀ ਬਿਲਡਿੰਗ ਫੰਡ ਰਾਹੀਂ ਕੀਤਾ ਗਿਆ ਹੈ। ਸਰੀ ਨਿਊਟਨ ਤੋਂ ਸੰਸਦ ਮੈਂਬਰ ਸੁੱਖ ਧਾਲੀਵਾਲ ਨੇ ਇਸ ਪ੍ਰੋਜੈਕਟ ਨੂੰ ਕਮਿਊਨਿਟੀ ਦੀ ਸਿਹਤ ਅਤੇ ਤੰਦਰੁਸਤੀ ਲਈ ਇੱਕ ਕਦਮ ਦੱਸਿਆ।
ਨਿਊਟਨ ਵਿੱਚ ਸਥਿਤ ਟਮਨਾਵਿਸ ਪਾਰਕ 19.5 ਏਕੜ ਵਿੱਚ ਫੈਲਿਆ ਹੋਇਆ ਹੈ। ਇੱਥੇ ਭਵਿੱਖ ਵਿੱਚ 3.26 ਮਿਲੀਅਨ ਡਾਲਰ ਦੀ ਲਾਗਤ ਨਾਲ ਇੱਕ ਨਵਾਂ ਫੀਲਡਹਾਊਸ ਵੀ ਬਣਾਇਆ ਜਾਵੇਗਾ ਜਿਸ ਵਿੱਚ ਚੇਂਜ ਰੂਮ ਅਤੇ ਵਾਸ਼ਰੂਮ ਸ਼ਾਮਲ ਹੋਣਗੇ। ਇਨ੍ਹਾਂ ਸਾਰੇ ਸੁਧਾਰਾਂ ਨਾਲ ਪਾਰਕ ਵਿੱਚ ਕੁੱਲ 8.2 ਮਿਲੀਅਨ ਡਾਲਰ ਦਾ ਨਿਵੇਸ਼ ਹੋਵੇਗਾ ਜੋ ਐਥਲੀਟਾਂ ਅਤੇ ਪਾਰਕ ਆਉਣ ਵਾਲਿਆਂ ਲਈ ਇੱਕ ਸ਼ਾਨਦਾਰ ਤਜਰਬਾ ਪ੍ਰਦਾਨ ਕਰੇਗਾ। ਸਰੀ ਗਿਲਡਫੋਰਡ ਤੋਂ ਵਿਧਾਇਕ ਗੈਰੀ ਬੈੱਗ ਨੇ ਕਿਹਾ ਕਿ ਸਰੀ ਖੇਡਾਂ ਲਈ ਇੱਕ ਵਿਸ਼ਵ ਪੱਧਰੀ ਸਥਾਨ ਹੈ। This report was written by Ekjot Singh as part of the Local Journalism Initiative.