ਵੈਨਕੂਵਰ (ਏਕਜੋਤ ਸਿੰਘ): ਨੋਵਾ ਸਕੋਸ਼ੀਆ ਦੇ ਪ੍ਰੀਮੀਅਰ ਟਿਮ ਹਿਊਸਟਨ ਦੇ ਚੈਂਬਰਜ਼ ਆਫ਼ ਕਾਮਰਸ ਵਿੱਚ ਭਾਸ਼ਣ ਦੌਰਾਨ ਅਚਾਨਕ ਹੰਗਾਮਾ ਖੜ੍ਹਾ ਹੋ ਗਿਆ ਜਿਸ ਕਾਰਨ ਉਨ੍ਹਾਂ ਨੂੰ ਪੁਲਿਸ ਸੁਰੱਖਿਆ ਹੇਠ ਬਾਹਰ ਕੱਢਣਾ ਪਿਆ। ਹਿਊਸਟਨ ਬੁੱਧਵਾਰ ਨੂੰ ਵੋਲਫਵਿਲ ਵਿੱਚ ਅਕੈਡੀਆ ਯੂਨੀਵਰਸਿਟੀ ਵਿਖੇ ਅਨਾਪੋਲਿਸ ਵੈਲੀ ਚੈਂਬਰ ਆਫ਼ ਕਾਮਰਸ ਨੂੰ ਸੂਬੇ ਦੀ ਆਰਥਿਕਤਾ ਬਾਰੇ ਆਪਣੇ ਦ੍ਰਿਸ਼ਟੀਕੋਣ ਉੱਤੇ ਸੰਬੋਧਨ ਕਰ ਰਹੇ ਸਨ। ਜਦੋਂ ਹਿਊਸਟਨ ਪਹਿਲਾਂ ਯੂਨੀਵਰਸਿਟੀ ਪਹੁੰਚੇ ਤਾਂ ਲਗਭਗ 50 ਸ਼ਾਂਤਮਈ ਪ੍ਰਦਰਸ਼ਨਕਾਰੀ ਬਾਹਰ ਖੜ੍ਹੇ ਸਨ ਜੋ ਮੁੱਖ ਤੌਰ ਉੱਤੇ ਅਨਾਪੋਲਿਸ ਵੈਲੀ ਵਿੱਚ ਪੰਜ ਲਾਇਬ੍ਰੇਰੀਆਂ ਦੇ ਸੰਭਾਵੀ ਬੰਦ ਹੋਣ ਬਾਰੇ ਚਿੰਤਾਵਾਂ ਵੱਲ ਧਿਆਨ ਖਿੱਚਣਾ ਚਾਹੁੰਦੇ ਸਨ।
ਹਾਲਾਂਕਿ ਹਿਊਸਟਨ ਦੇ ਭਾਸ਼ਣ ਦੇ ਦੌਰਾਨ ਬਾਹਰ ਇਕੱਠੀ ਹੋਈ ਭੀੜ ਹੋਰ ਉੱਚੀ ਹੋ ਗਈ ਅਤੇ ਪ੍ਰਦਰਸ਼ਨਕਾਰੀ ਕਈ ਹੋਰ ਮੁੱਦਿਆਂ ਉੱਤੇ ਵਿਰੋਧ ਕਰਨ ਲੱਗੇ। ਇਨ੍ਹਾਂ ਵਿੱਚ ਮਿਕਮਾਕ ਭਾਈਚਾਰੇ ਦੁਆਰਾ ਆਪਣੀ ਕੈਨਾਬਿਸ ਦੀ ਵਿਕਰੀ ਨੂੰ ਨਿਯੰਤਰਿਤ ਕਰਨ ਦੀ ਯੋਗਤਾ, ਮਾਈਨਿੰਗ ਨੂੰ ਉਤਸ਼ਾਹਿਤ ਕਰਨ ਦੀ ਸੂਬੇ ਦੀ ਯੋਜਨਾ ਅਤੇ ਸੰਧੀ ਦੇ ਅਧਿਕਾਰਾਂ ਦੀ ਪਾਲਣਾ ਵਰਗੀਆਂ ਮੰਗਾਂ ਸ਼ਾਮਲ ਸਨ। ਜਦੋਂ ਪ੍ਰੀਮੀਅਰ ਇਮਾਰਤ ਤੋਂ ਬਾਹਰ ਆਏ ਤਾਂ ਜਿਸ ਗੱਡੀ ਵਿੱਚ ਉਹ ਸਵਾਰ ਹੋਏ ਉਸ ਨੂੰ ਪ੍ਰਦਰਸ਼ਨਕਾਰੀਆਂ ਨੇ ਚਾਰੇ ਪਾਸਿਓਂ ਘੇਰ ਲਿਆ। ਇੱਕ ਵਿਅਕਤੀ ਐਸਯੂਵੀ ਦੇ ਉੱਪਰ ਚੜ੍ਹ ਗਿਆ ਜਦਕਿ ਦੂਜੇ ਵਾਹਨ ਨੂੰ ਰੋਕਣ ਦੀ ਕੋਸ਼ਿਸ਼ ਵਿੱਚ ਅੱਗੇ ਖੜ੍ਹੇ ਹੋ ਗਏ। ਇਸ ਹੰਗਾਮੇ ਦੌਰਾਨ ਗੱਡੀ ਦਾ ਅਗਲਾ ਸ਼ੀਸ਼ਾ (ਵਿੰਡਸ਼ੀਲਡ) ਵੀ ਟੁੱਟ ਗਿਆ।
ਹਿਊਸਟਨ ਕਈ ਮਿੰਟਾਂ ਤੱਕ ਅੰਦਰ ਹੀ ਰਹੇ ਅਤੇ ਉਨ੍ਹਾਂ ਦੇ ਸੁਰੱਖਿਆ ਕਰਮਚਾਰੀ ਗੱਡੀ ਤੇ ਪ੍ਰਦਰਸ਼ਨਕਾਰੀਆਂ ਵਿਚਕਾਰ ਖੜ੍ਹੇ ਰਹੇ ਜਦੋਂ ਤੱਕ ਕਿ ਪੁਲਿਸ ਅਫਸਰਾਂ ਨੇ ਉਨ੍ਹਾਂ ਨੂੰ ਸੁਰੱਖਿਅਤ ਬਾਹਰ ਕੱਢ ਕੇ ਵਾਪਸ ਇਮਾਰਤ ਵਿੱਚ ਨਹੀਂ ਪਹੁੰਚਾਇਆ। ਪ੍ਰੀਮੀਅਰ ਬਾਅਦ ਵਿੱਚ ਇੱਕ ਸਰਕਾਰੀ ਆਰਸੀਐਮਪੀ ਵਾਹਨ ਵਿੱਚ ਕੈਂਪਸ ਤੋਂ ਰਵਾਨਾ ਹੋਏ। ਆਰਸੀਐਮਪੀ ਅਨੁਸਾਰ ਕਿਸੇ ਦੇ ਜ਼ਖਮੀ ਹੋਣ ਦੀ ਕੋਈ ਰਿਪੋਰਟ ਨਹੀਂ ਹੈ ਅਤੇ ਇੱਕ ਵਿਅਕਤੀ ਨੂੰ ਗ੍ਰਿਫਤਾਰ ਕਰਨ ਤੋਂ ਬਾਅਦ ਬਿਨਾਂ ਦੋਸ਼ਾਂ ਦੇ ਰਿਹਾਅ ਕਰ ਦਿੱਤਾ ਗਿਆ। ਹਿਊਸਟਨ ਦੇ ਦਫ਼ਤਰ ਨੇ ਇੱਕ ਬਿਆਨ ਜਾਰੀ ਕਰਦਿਆਂ ਕਿਹਾ ਕਿ ਭਾਵੇਂ ਉਹ ਸ਼ਾਂਤਮਈ ਵਿਰੋਧ ਦੇ ਅਧਿਕਾਰ ਦਾ ਸਤਿਕਾਰ ਕਰਦੇ ਹਨ ਪਰ ਇਸ ਘਟਨਾ ਤੋਂ ਬਾਅਦ ਜੋ ਕੁਝ ਹੋਇਆ ਉਹ ਕਿਸੇ ਵੀ ਤਰ੍ਹਾਂ ਸ਼ਾਂਤਮਈ ਨਹੀਂ ਸੀ। ਫੈਡਰਲ ਪ੍ਰਧਾਨ ਮੰਤਰੀ ਮਾਰਕ ਕਾਰਨੀ ਅਤੇ ਵਿਰੋਧੀ ਧਿਰ ਦੀ ਨੇਤਾ ਕਲਾਉਡੀਆ ਚੈਂਡਰ ਨੇ ਵੀ ਸੰਪੱਤੀ ਦੀ ਭੰਨਤੋੜ ਅਤੇ ਨਿੱਜੀ ਸੁਰੱਖਿਆ ਨੂੰ ਖਤਰੇ ਵਿੱਚ ਪਾਉਣ ਦੀ ਇਸ ਘਟਨਾ ਦੀ ਸਖਤ ਸ਼ਬਦਾਂ ਵਿੱਚ ਨਿੰਦਾ ਕੀਤੀ ਹੈ। This report was written by Ekjot Singh as part of the Local Journalism Initiative.
ਨੋਵਾ ਸਕੋਸ਼ੀਆ ਦੇ ਪ੍ਰੀਮੀਅਰ ਟਿਮ ਹਿਊਸਟਨ ਦੇ ਪ੍ਰੋਗਰਾਮ ਦੌਰਾਨ ਹੰਗਾਮਾ
