ਫੈਡਰਲ ਸਰਕਾਰ ਦੀ ਹਰਮਨਪਿਆਰਤਾ ਬਰਕਰਾਰ: ਤਾਜ਼ਾ ਸਰਵੇਖਣ

ਵੈਨਕੂਵਰ (ਏਕਜੋਤ ਸਿੰਘ): ਐਬਾਕਸ ਡੇਟਾ ਵੱਲੋਂ ਹਾਲ ਹੀ ਵਿੱਚ ਜਾਰੀ ਕੀਤੇ ਗਏ ਨਵੇਂ ਸਰਵੇਖਣ ਮੁਤਾਬਕ ਮਾਰਕ ਕਾਰਨੀ ਦੀ ਅਗਵਾਈ ਵਾਲੀ ਫੈਡਰਲ ਸਰਕਾਰ ਦੀ ਹਰਮਨਪਿਆਰਤਾ ਵਿੱਚ ਆਈ ਗਿਰਾਵਟ ਹੁਣ ਰੁਕ ਗਈ ਹੈ। ਐਬਾਕਸ ਡੇਟਾ ਦੇ ਚੇਅਰਮੈਨ ਅਤੇ ਸੀ.ਈ.ਓ. ਡੇਵਿਡ ਕੋਲੇਟੋ ਨੇ ਦੱਸਿਆ ਕਿ 3080 ਕੈਨੇਡੀਅਨ ਬਾਲਗਾਂ ‘ਤੇ ਕੀਤੇ ਗਏ ਇਸ ਤਾਜ਼ਾ ਰਾਸ਼ਟਰੀ ਸਰਵੇਖਣ ਤੋਂ ਪਤਾ ਲੱਗਦਾ ਹੈ ਕਿ ਇਸ ਮਹੀਨੇ ਦੇ ਸ਼ੁਰੂ ਵਿੱਚ ਜੋ ਬਦਲਾਅ ਦੇਖੇ ਗਏ ਸਨ, ਉਹ ਹੁਣ ਲਗਾਤਾਰ ਜਾਰੀ ਨਹੀਂ ਹਨ। ਦੋ ਹਫ਼ਤੇ ਪਹਿਲਾਂ ਸਰਕਾਰ ਦੀ ਪ੍ਰਵਾਨਗੀ ਦਰ ਘਟਣ ਅਤੇ ਲੋਕਾਂ ਵਿੱਚ ਆਸ਼ਾਵਾਦ ਦੀ ਕਮੀ ਦੇ ਸੰਕੇਤ ਮਿਲੇ ਸਨ, ਪਰ ਤਾਜ਼ਾ ਅੰਕੜੇ ਦਰਸਾਉਂਦੇ ਹਨ ਕਿ ਵੋਟਰਾਂ ਦਾ ਰੁਝਾਨ ਹੁਣ ਕਾਫੀ ਹੱਦ ਤੱਕ ਸਥਿਰ ਹੋ ਗਿਆ ਹੈ।
ਵੋਟਰਾਂ ਦੀ ਪਸੰਦ ਦੀ ਗੱਲ ਕਰੀਏ ਤਾਂ ਅੱਜ 45 ਫੀਸਦੀ ਵਚਨਬੱਧ ਵੋਟਰ ਲਿਬਰਲ ਪਾਰਟੀ ਦਾ ਸਮਰਥਨ ਕਰਦੇ ਹਨ। ਇਸ ਦੇ ਮੁਕਾਬਲੇ ਕੰਜ਼ਰਵੇਟਿਵ ਪਾਰਟੀ ਨੂੰ 37 ਫੀਸਦੀ ਲੋਕਾਂ ਦਾ ਸਮਰਥਨ ਹਾਸਲ ਹੈ। ਇਸ ਨਾਲ ਲਿਬਰਲ ਪਾਰਟੀ ਨੇ ਰਾਸ਼ਟਰੀ ਪੱਧਰ ‘ਤੇ ਅੱਠ ਅੰਕਾਂ ਦੀ ਲੀਡ ਬਣਾਈ ਹੋਈ ਹੈ। ਦੂਜੇ ਪਾਸੇ ਐਨ.ਡੀ.ਪੀ. 9 ਫੀਸਦੀ ਅਤੇ ਬਲਾਕ ਕਿਊਬਿਕਵਾ 6 ਫੀਸਦੀ ‘ਤੇ ਖੜ੍ਹੇ ਹਨ। ਫੈਡਰਲ ਸਰਕਾਰ ਦੀ ਪ੍ਰਵਾਨਗੀ ਦਰ ਵਿੱਚ ਵੀ ਮਾਮੂਲੀ ਸੁਧਾਰ ਹੋਇਆ ਹੈ। ਸਰਵੇਖਣ ਮੁਤਾਬਕ 55 ਫੀਸਦੀ ਲੋਕ ਫੈਡਰਲ ਸਰਕਾਰ ਦੇ ਕੰਮ ਨੂੰ ਸਹੀ ਮੰਨਦੇ ਹਨ, ਜਦਕਿ 30 ਫੀਸਦੀ ਲੋਕ ਇਸ ਤੋਂ ਅਸੰਤੁਸ਼ਟ ਹਨ। ਪ੍ਰਧਾਨ ਮੰਤਰੀ ਮਾਰਕ ਕਾਰਨੀ ਦੀ ਨਿੱਜੀ ਰੇਟਿੰਗ ਵੀ ਪਲੱਸ 21 ਅੰਕਾਂ ਦੇ ਨਾਲ ਮਜ਼ਬੂਤ ਅਤੇ ਬਿਨਾਂ ਕਿਸੇ ਬਦਲਾਅ ਦੇ ਬਰਕਰਾਰ ਹੈ, ਜੋ ਉਹਨਾਂ ਨੂੰ ਕੰਜ਼ਰਵੇਟਿਵ ਨੇਤਾ ਪੀਅਰ ਪੋਇਲੀਵਰੇ ਦੇ ਮੁਕਾਬਲੇ ਜਨਤਕ ਪ੍ਰਭਾਵ ਵਿੱਚ ਅਹਿਮ ਫਾਇਦਾ ਦਿੰਦੀ ਹੈ।
ਲੋਕਾਂ ਦੀਆਂ ਭਾਵਨਾਵਾਂ ਅਜੇ ਵੀ ਮਿਲੀਆਂ-ਜੁਲੀਆਂ ਹਨ। ਲਗਭਗ 42 ਫੀਸਦੀ ਲੋਕਾਂ ਦਾ ਮੰਨਣਾ ਹੈ ਕਿ ਕੈਨੇਡਾ ਸਹੀ ਦਿਸ਼ਾ ਵੱਲ ਜਾ ਰਿਹਾ ਹੈ, ਜਦਕਿ 44 ਫੀਸਦੀ ਲੋਕਾਂ ਅਨੁਸਾਰ ਦੇਸ਼ ਗਲਤ ਰਸਤੇ ‘ਤੇ ਹੈ। ਲੋਕ ਦੁਨੀਆ ਦੀ ਸਥਿਤੀ ਅਤੇ ਅਮਰੀਕਾ ਦੀ ਦਿਸ਼ਾ ਬਾਰੇ ਨਿਰਾਸ਼ਾਵਾਦੀ ਨਜ਼ਰੀਆ ਰੱਖਦੇ ਹਨ। ਮਹਿੰਗਾਈ ਅਜੇ ਵੀ ਦੇਸ਼ ਸਾਹਮਣੇ ਸਭ ਤੋਂ ਅਹਿਮ ਮੁੱਦਾ ਬਣੀ ਹੋਈ ਹੈ। ਇਸ ਤੋਂ ਇਲਾਵਾ ਅਰਥਚਾਰਾ, ਸਿਹਤ ਸੰਭਾਲ, ਰਿਹਾਇਸ਼ ਦੀਆਂ ਕੀਮਤਾਂ ਅਤੇ ਡੋਨਾਲਡ ਟਰੰਪ ਦੇ ਪ੍ਰਸ਼ਾਸਨ ਬਾਰੇ ਚਿੰਤਾਵਾਂ ਵੀ ਲੋਕਾਂ ਦੇ ਧਿਆਨ ਦਾ ਕੇਂਦਰ ਹਨ। ਕਾਰਨੀ ਦੇ ਪ੍ਰਧਾਨ ਮੰਤਰੀ ਬਣਨ ‘ਤੇ ਜੋ ਉਮੀਦਾਂ ਦੀ ਲਹਿਰ ਉੱਠੀ ਸੀ, ਉਹ ਭਾਵੇਂ ਸਥਿਰ ਹੋ ਗਈ ਹੈ, ਪਰ ਸਰਕਾਰ ਦੇ ਸਮਰਥਨ ਵਿੱਚ ਕੋਈ ਲਗਾਤਾਰ ਗਿਰਾਵਟ ਨਜ਼ਰ ਨਹੀਂ ਆ ਰਹੀ। ਕੋਲੇਟੋ ਅਨੁਸਾਰ ਫਿਲਹਾਲ ਰਾਜਨੀਤੀ ਵਿੱਚ ਕੋਈ ਤੇਜ਼ ਬਦਲਾਅ ਨਹੀਂ ਹੋ ਰਿਹਾ ਅਤੇ ਲਿਬਰਲ ਪਾਰਟੀ ਆਪਣੀ ਸਥਿਤੀ ਮਜ਼ਬੂਤ ਰੱਖਣ ਵਿੱਚ ਕਾਮਯਾਬ ਨਜ਼ਰ ਆ ਰਹੀ ਹੈ। This report was written by Ekjot Singh as part of the Local Journalism Initiative.