ਫੀਫਾ ਵਿਸ਼ਵ ਕੱਪ 2026 ਦੌਰਾਨ ਔਰਤਾਂ ਦੀ ਸੁਰੱਖਿਆ ਯਕੀਨੀ ਬਣਾਉਣ ਲਈ ਵਿਸ਼ੇਸ਼ ਮੁਹਿੰਮ

ਵੈਨਕੂਵਰ (ਏਕਜੋਤ ਸਿੰਘ): ਵੈਨਕੂਵਰ ਵਿੱਚ ਹੋਣ ਜਾ ਰਹੇ ਫੀਫਾ ਵਿਸ਼ਵ ਕੱਪ 2026 ਦੌਰਾਨ ਲੱਖਾਂ ਸੈਲਾਨੀਆਂ ਦੀ ਆਮਦ ਨੂੰ ਦੇਖਦਿਆਂ ਭਾਈਚਾਰਕ ਸੰਸਥਾਵਾਂ ਨੇ ਔਰਤਾਂ ਦੀ ਸੁਰੱਖਿਆ ਨੂੰ ਲੈ ਕੇ ਇੱਕ ਅਹਿਮ ਕਦਮ ਚੁੱਕਿਆ ਹੈ। ਬੈਟਰਡ ਵੂਮੈਨਜ਼ ਸਪੋਰਟ ਸਰਵਿਸਿਜ਼ ਅਤੇ ਗੁੱਡ ਨਾਈਟ ਆਊਟ ਵੈਨਕੂਵਰ ਨੇ ਸੋਮਵਾਰ ਨੂੰ 6 ਹਫ਼ਤਿਆਂ ਦੇ ਟੂਰਨਾਮੈਂਟ ਦੌਰਾਨ ਲਿੰਗ ਅਧਾਰਿਤ ਹਿੰਸਾ ਨੂੰ ਰੋਕਣ ਲਈ ਸਾਂਝੇ ਯਤਨਾਂ ਦਾ ਐਲਾਨ ਕੀਤਾ ਹੈ। ਇਹ ਮੁਹਿੰਮ ਸਿਰਫ ਸਟੇਡੀਅਮਾਂ ਜਾਂ ਜਨਤਕ ਥਾਵਾਂ ਤੱਕ ਸੀਮਿਤ ਨਹੀਂ ਰਹੇਗੀ ਬਲਕਿ ਘਰਾਂ, ਕੰਮ ਵਾਲੀਆਂ ਥਾਵਾਂ ਅਤੇ ਨਾਈਟ ਲਾਈਫ ਵਿੱਚ ਵੀ ਸੁਰੱਖਿਆ ਯਕੀਨੀ ਬਣਾਉਣ ਉੱਤੇ ਜ਼ੋਰ ਦੇਵੇਗੀ। ਇਹਨਾਂ ਸੰਸਥਾਵਾਂ ਦਾ ਮੰਨਣਾ ਹੈ ਕਿ ਸੜਕਾਂ, ਕਲੱਬਾਂ ਅਤੇ ਘਰਾਂ ਦੀ ਸੁਰੱਖਿਆ ਨੂੰ ਇੱਕੋ ਨਜ਼ਰੀਏ ਨਾਲ ਦੇਖਣ ਦੀ ਲੋੜ ਹੈ। ਇਸ ਮੁਹਿੰਮ ਤਹਿਤ ਬੀਡਬਲਯੂਐਸਐਸ ਵੱਲੋਂ ਆਪਣੀ ਵਿਸ਼ੇਸ਼ ਸੰਕਟਕਾਲੀਨ ਹੈਲਪਲਾਈਨ ਨੂੰ ਟੂਰਨਾਮੈਂਟ ਦੌਰਾਨ 24 ਘੰਟੇ ਅਤੇ ਹਫ਼ਤੇ ਦੇ 7 ਦਿਨ ਚਾਲੂ ਰੱਖਣ ਦਾ ਫੈਸਲਾ ਕੀਤਾ ਗਿਆ ਹੈ। ਇਸ ਨਾਲ ਪੀੜਤਾਂ ਨੂੰ ਕਿਸੇ ਵੀ ਸਮੇਂ ਜਾਣਕਾਰੀ, ਭਾਵਨਾਤਮਕ ਸਹਾਰਾ ਅਤੇ ਬਚਾਅ ਯੋਜਨਾ ਵਰਗੀਆਂ ਸਹੂਲਤਾਂ ਮਿਲ ਸਕਣਗੀਆਂ। ਇਸ ਤੋਂ ਇਲਾਵਾ ਫੀਫਾ ਸੇਫਟੀ ਕਾਰਡ ਪਹਿਲਕਦਮੀ ਵੀ ਸ਼ੁਰੂ ਕੀਤੀ ਗਈ ਹੈ ਜੋ ਹਿੰਸਾ, ਧਮਕੀਆਂ ਜਾਂ ਪਰੇਸ਼ਾਨੀ ਦਾ ਸਾਹਮਣਾ ਕਰ ਰਹੇ ਲੋਕਾਂ ਨੂੰ ਜਾਗਰੂਕ ਕਰੇਗੀ। ਸੰਸਥਾ ਵੱਲੋਂ ‘ਦ ਸਪੇਸ ਬਿਟਵੀਨ’ ਨਾਮ ਦਾ ਇੱਕ ਜਾਗਰੂਕਤਾ ਵੀਡੀਓ ਵੀ ਜਾਰੀ ਕੀਤਾ ਗਿਆ ਹੈ ਜੋ ਦਿਖਾਉਂਦਾ ਹੈ ਕਿ ਕਿਵੇਂ ਘਰੇਲੂ ਹਿੰਸਾ ਸਰੀਰਕ ਕੁੱਟਮਾਰ ਤੋਂ ਪਹਿਲਾਂ ਡਰ, ਨਿਗਰਾਨੀ ਅਤੇ ਇਕੱਲਤਾ ਦੇ ਰੂਪ ਵਿੱਚ ਸ਼ੁਰੂ ਹੁੰਦੀ ਹੈ। ਗੁੱਡ ਨਾਈਟ ਆਊਟ ਵੈਨਕੂਵਰ ਨੇ ਟੂਰਨਾਮੈਂਟ ਦੌਰਾਨ ਨਾਈਟ ਲਾਈਫ ਨੂੰ ਸੁਰੱਖਿਅਤ ਬਣਾਉਣ ਲਈ ਕਈ ਆਊਟਰੀਚ ਪ੍ਰੋਗਰਾਮਾਂ ਦਾ ਐਲਾਨ ਕੀਤਾ ਹੈ। ਇਹ ਸੰਸਥਾ ਕਲੱਬਾਂ ਅਤੇ ਰੈਸਟੋਰੈਂਟਾਂ ਵਿੱਚ ਕੰਮ ਕਰਨ ਵਾਲੇ ਲੋਕਾਂ ਅਤੇ ਆਮ ਜਨਤਾ ਨੂੰ ਜਾਗਰੂਕ ਕਰੇਗੀ। ਗੁਲਾਬੀ ਕੱਪੜਿਆਂ ਵਿੱਚ ਉਹਨਾਂ ਦੀ ਟੀਮ ਸੜਕਾਂ ਉੱਤੇ ਮੌਜੂਦ ਰਹੇਗੀ ਜੋ ਕਿਸੇ ਵੀ ਲੋੜਵੰਦ ਦੀ ਮਦਦ ਕਰੇਗੀ। ਅੰਤਰਰਾਸ਼ਟਰੀ ਅੰਕੜੇ ਦੱਸਦੇ ਹਨ ਕਿ ਵੱਡੇ ਫੁੱਟਬਾਲ ਮੁਕਾਬਲਿਆਂ ਦੌਰਾਨ ਸ਼ਰਾਬ ਅਤੇ ਸੱਟੇਬਾਜ਼ੀ ਕਾਰਨ ਘਰੇਲੂ ਹਿੰਸਾ ਦੇ ਮਾਮਲੇ ਵੱਧ ਜਾਂਦੇ ਹਨ। This report was written by Ekjot Singh as part of the Local Journalism Initiative.